Read tshwa Tisimu 51 Bible Online

Tisimu 51 - tshwa bible

Tisimu 51

¹Ka muchuli. Lisimu la Davida laha a nga kawukwa hi Natani hi kota ya ku enghena ka Batexeba. Nungungulu, nzi mahele wuxinji khwatsi hi wunene ga wena; Fuvisa a zihambuko za mina kukotisa a wunyingi ga tipswalo ta wena.

²Nzi hlaze nziku pa kugoheni ka mina, U nzi basisa kuonheni ka mina.

³Hakuva nza vumela a zihambuko za mina, A kuonha ka mina ku kona mahlweni ka mina xontlhe xikhati.

⁴Nzi onhile mahlweni ka wena wece, Nzi maha lezi zi bihileko mahlweni ka wena. Kasi u fela ku kumeka na u lulamile kuwulawuleni ka wena, Ni kuva ni nongameto laha u lamulako. [167]

⁵Languta, nzi belekelwe kubiheni, Mamani i xurile nyimba lahasi ka xionho. [168]

⁶Wena wa ranza zinene lomu mbilwini; Nzi gonzise a kutlhariha lomu nzeni ka mina.

⁷Nzi basise hi hisope lezaku nziva a hlazekileko; Nzi hlaze, nzi maha wo basa ku hunza gapongo. [169]

⁸Maha mina nzizwa a kutsaka ni kunengela, Kasi a marambu laya wena u ma tshovileko ma fela ku tsaka.

⁹U nga ha cuwuki a zionho za mina; U fuvisa zigoho za mina zontlhe.

¹⁰Nungungulu, nzi vangele a mbilu yi hlazekileko; Vuxa luswa a moya wa kutiya xikari ka mina.

¹¹U nga nzi hlongoli mahlweni ka wena, U nga susi ka mina a Moya wa wena wa ku basa.

¹²Nzi tlhelisele a kutsaka ka kuhanyisa ka wena, U nzi tiyiseta hi moya wu vumelako. [170]

¹³Zonake nzi ta gonzisa a vahambunyeti a tindlela ta wena, A vaonhi va ta hunzuluka vata ka wena.

¹⁴Nungungulu, nzi tlhatlhe nanzwini wa nkhata, O Nungungulu wa kuhanyisa ka mina; Kasi a lirimi la mina la yimbelela a kululama ka wena. [171]

¹⁵Hosi, vulula milomu ya mina, Zonake a nomu wa mina wu ta tshawutela a kudumisa ka wena.

¹⁶Hakuva a ku xalaliswi hi miphahlo, nzi wa ta ku nyika yona; A ku ranzi a minyikelo ya kuhiswa.

¹⁷A muphahlo lowu wu xalalisako Nungungulu hi moya loʼwu tshovekileko; Nungungulu, cima u nga ta nyenya a mbilu leʼyi tshovekileko, yi xanisekelako zionho. [172]

¹⁸Maha khwatsi ka Zioni hi wuxinji ga wena, Aketa a tigingisi ta Jerusalema.

¹⁹Zonake u ta tsaka hi miphahlo ya kululama, A miphahlo ya kuhiswa ni leyi yi hiswako yontlhe; Hi kona va ta nga phahlela hi tikuzi hehla ka alati ga wena.