Read tshwa Tisimu 55 Bible Online

Tisimu 55 - tshwa bible

Tisimu 55

¹Ka muchuli hehla ka Neginote, Maxili, Lisimu la Davida. Nungungulu, ingisa mukombelo wa mina; U nga fulareli kukhongela ka mina,

²Nzi ingise, u nzi hlamula; A nzi na kurula kurileni ka mina, nza keta,

³Hi kota ya gezu ga nala, Ni kulumela ka lava vobiha; Hakuva va nzi vangela hlomulo, Va nzi vukela hi zanga.

⁴A mbilu ya mina ya bayisa nzeni ka mina, Ni kuchava ka lufo ku wele hehla ka mina.

⁵A kuchava ni kururumela zi wele hehla ka mina, A manyeho ma nzi khubunyetile.

⁶Mina nzite: E, loku nzi wa hi ni tipapa kota tuva, Nzi wa ta puruma kule nzi ya humula. [175]

⁷Nzi wa ta tsutsumela kule, Nzi ya tshama xiwuleni. (Sela.)

⁸Nzi wa ta hatlisa nzi nyemuka, Nzi chava xipupuri ni bhubhutsa.

⁹Jehova, va lovise, u hambanyisa a tirimi tabye, Hakuva nzi wonile lunya ni timholova lomu mutini. [176]

¹⁰Mumu ni wusiku va fambafamba va renzelekela tigingisi ta wona; A kubiha ni kuxaniseka zi lomu xikari ka wona.

¹¹A lunya li kona nzeni ka wona, Kutsimbeketa ni kukanganyisa a zi suki tindleleni ta wona.

¹²Hakuva a hi nala loyi a nzi rukateleko, ngha nzi timisela; A hi loyi a nzi vengako, loyi a ti kulisako ha mina, Ngha nzi mu fihlalele.

¹³Kanilezi hi wena, loyi u eceneko na mina, U nga nakulori ni munghana wa mina. [177]

¹⁴Hina lava hi nga xuxa zinwe hi kuzwanana, Hi famba zinwe na xidlemo ndlwini ya Nungungulu.

¹⁵Ngha kufa ku va tela hi xitshuketi, Va relela vaya Xeole na va ha hanya; Hakuva a kubiha ku lomu tindlwini tabye ni xikari kabye. [178]

¹⁶Kanilezi mina nzi rila ka Nungungulu: Jehova i ta nzi hlanguta.

¹⁷Nzi ta kombela, nziba huwa laha gambyeni, ni mixo ni hlikanhi; Yena i tazwa a gezu ga mina. [179]

¹⁸I tlhatlhisile muhefemulo wa mina a wu nyika kurula, Hakuva mbanyingi lava va nzi vukelako.

¹⁹Nungungulu i ta zizwa, a va hlamula, Yena loyi a tshamako xitshanwini xakwe xa wuhosi kala kupinzuka. (Sela.) Hakuva a va hunzuluki, A va chavi Nungungulu.

²⁰A wakubiha i hlomile a vukela loyi a hanyileko naye hi kurula, A tshova xivumelwano xakwe.

²¹A magezu ya nomu wakwe ma nanziha ku hunza mawomba, Kanilezi ku hi ni kuholova mbilwini yakwe. A magezu yakwe ma olova ku hunza mafura, Kasi lezo ti hi tisupado ti hlomulweko.

²²Rula a nzhwalo wa wena ka Jehova, i ta ku seketela, Cima a nga ta vumela loyi a lulamileko a ku tsekatsekiswa. [180]

²³Wena Nungungulu, u ta va cukumeta nkeleni wa kulobyiswa, Lava va nga zigevenga ni vakhohlisi va nga ta hanya khihlanya ga masiku yabye; Kanilezi mina nzi ku tsumbile.