Read tshwa Tisimu 57 Bible Online

Tisimu 57 - tshwa bible

Tisimu 57

¹Ka muchuli, Aitaskite, Miktamu ya Davida, laha a nga tsutsuma ka Saule lomu muhumeni. Nzi zwele wuxinji, Nungungulu, nzi zwele wuxinji, Hakuva a muhefemulo wa mina wu chavela ka wena; Ina, nzi ta chavela nzhutini wa tipapa ta wena, Kala ma hunza makhombo laya.

²Nzi ta rila ka Nungungulu loyi a Hunzeleleko Kutlakuka, Ka Nungungulu loyi a nzi mahelako zilo zontlhe.

³I ta rumela hi le tilweni a nzi ponisa, Loku nzi rukatelwa hi loyi a lavako ku nzi daya. (Sela.) Nungungulu i ta rumela wuxinji gakwe ni kutsumbeka kakwe.

⁴A muhefemulo wa mina wu lomu xikari ka tinghala; Nzi etlele xikari ka lava va pupuxako nzilo; A vanhu lava a meno yabye ma nga matlhari ni tigalala, Lava a tirimi tabye ti nga tisupado to kariha.

⁵Nungungulu, ngha u tlakuswa hehla ka matilo, Ni wudzunzo ga wena a give hehla ka misava yontlhe.

⁶Va dembile mitlhamu lahasi ka mikonzo ya mina; A muhefemulo wa mina wu koramile; Va nzi kelele rinzi, Vona wutsumbu va tlhela va wela ka gona. (Sela.)

⁷A mbilu ya mina yi tiyile, Nungungulu, A mbilu ya mina yi tiyile; Nzi ta yimbelela nzi dumisa.

⁸Vuka muhefemulo wa mina, vukani nwina timbila ni xitende! Mina nzi ta vuxa wuronga ga mixo.

⁹Hosi, nzi ta ku bonga xikari ka vanhu, Nzi ta ku khesa hi tisimu xikari ka matiko.

¹⁰Hakuva a wuxinji ga wena ga hombe, gi chikela matilweni; Ni kutsumbeka ka wena ku chikela marefini.

¹¹Nungungulu, ngha u tlakuswa hehla ka matilo! A wudzunzo ga wena a give hehla ka misava yontlhe.