Read tshwa Tisimu 60 Bible Online

Tisimu 60 - tshwa bible

Tisimu 60

¹Ka muchuli hehla ka Xuxane-edute, Miktamu ya Davida ya ku gonzisa; laha a ngalwa na Aramu-naharaime na Aramu-zoba, Joabe na ata a ta daya 12,000 wa va ka Edome nzhelelweni wa munyu. Nungungulu, u hi hoxile, u hi hangalasile; U tsanwile, hi vuxe luswa.

²U tsekatsekisile misava, yi khayeka; Holisa a tifa ta yona, hakuva ya dzudzumela.

³U kombisile a vanhu va wena a zilo zo binza; U hi nwisile a vinya gi popisako. [186]

⁴Lava va ku chavako u va nyikile a nghapa, Lezaku va chavela kona va pona mawura. (Sela.)

⁵Ponisa hi woko ga wena ga xinene, u hi hlamula, Kasi a varanzekako va wena va hanyiswa.

⁶Nungungulu i wulile wutshanwini gakwe go basa, aku; Nzi ta hlula, Nzi ta avanyisa Xekemu, nzi pima a nkova wa Sukoti.

⁷Gileadi wa mina, na Manasse wa mina; Efraime i ndlondla ya hloko ya mina, Juda i nhonga ya mina ya wuhosi. [187]

⁸Moabi hi xinamelo xa mina xo hlambela kona; Nzi hoxa a xilato xa mina hehla ka Edome; Filistia, giya hi kota ya mina. [188]

⁹Himani a ta nga nzi fambisa le mutini wa khokhola? Himani a ta nga nzi chiketa le Edome?

¹⁰Wena Nungungulu, a ku hi hoxangi ke? Nungungulu, a ku humi ni tiyimpi ta hina ke?

¹¹Hi vune ka nala, Hakuva a kuvuna ka munhu a ku nyawuli.

¹²Hi xivuno xa Nungungulu hi ta tira hi wurena, Hi yena a ta nga kanzihela a valala va hina.