Read tshwa Tisimu 69 Bible Online

Tisimu 69 - tshwa bible

Tisimu 69

¹Ka muchuli wa Xoxanimu. Lisimu la Davida. Nungungulu, nzi ponise; Hakuva a mati ma nzi tshinelela. [224]

²Nza rikha maropeni yo eta, laha nzi tsanzekako ku yima. Nzi wele matini yo eta, lawa ma nzi nyupetako.

³Nzi karele hi kurila, a nkolo wa mina wu womile, A mahlo ya mina ma mbhela hi ku langutela Nungungulu wa mina.

⁴Lava va nzi vengako handle ka nanzu Va tele ku hunza misisi ya hloko ya mina; Va na ni ntamu lava va hlotako ku nzi lovisa, Na va hi valala va mina handle ka xigelo. Nzi fanele ku tlhelisa lezi nzi nga yivangiko. [225]

⁵Nungungulu, wena wa tiva a wupumbu ga mina, Ni zigoho za mina a zi ku fihlalelangi.

⁶Hosi, Jehova wa tiyimpi, lava va ku langutelako, Ngha va nga wiswi tingana hi kota ya mina. Lava va lavako wena Nungungulu wa Israeli, Va nga dzuki va tsanzeka hi kota ya mina.

⁷Hakuva nzi cepetilwe hi kota ya wena, Nzi su koyo tingana.

⁸Nzi mahile mupfumba ka vanakulori, Loyi a nga tibyiwiko hi vana va mamani. [226]

⁹Hakuva a ku pangamela a yindlu ya wena ku nzi mitile; Ni ziruko za lava va ku rukatelako zi nzi wele. [227]

¹⁰Nzi lo rila nzi hlokisa a muhefemulo wa mina hi kuyila, Lezi kambe nzi lo rukiwa ha zona.

¹¹Nzi lo ambala a nguwo ya xirilo, Zonake nzi lo maha xihlekiso kabye.

¹²Lava va tshamako hubyeni va wulawula ha mina, Nzi lisimu la lava va popilweko.

¹³Kanilezi a mukombelo wa mina wu tlakukela ka wena, Jehova, Hi xikhati xi nene. Nungungulu, nzi hlamule hi wukulu ga wuxinji ga wena Hi lisine la kuhanyisa ka wena. [228]

¹⁴Nzi humese maropeni, u nga nzi tsiki nzi rikha; A nzi tlhatlhiswe ka lava va nzi vengako, Ni le matini ya kueta.

¹⁵U nga nzi tsiki nzi mhemba matini ya ntalo,. Ni lieswila kambe ngha li nga nzi miti; Ni rinzi gi nga vali a nomu wa gona hehla ka mina.

¹⁶Jehova, nzi hlamule, hakuva wuxinji ga wena gi nene, Hunzulukela ka mina hi kota ya wumbilu ga wena ga hombe.

¹⁷U nga fihleli a nanza ga wena a nghohe ya wena, Hakuva nzi le mhangweni, hatlisa ku nzi hlamula.

¹⁸Tshinela muhefemulweni wa mina u wu tirula; Nzi tlhatlhise hi kota ya valala va mina.

¹⁹U tiva kusoliwa ka mina, Ni tingana ta mina, ni kukanyiswa ka mina; Vontlhe vaxanisi va mina va woniwa hi wena.

²⁰A kurukiwa ku panzile mbilu ya mina, ya nzi tikela; Nzi cuwukela a kuxanisekelwa, kanilezi a ku kona; Ni vatangalisi, kanilezi a nzi va kumangi.

²¹Va lo nziha a nyongwa akuva zakuga za mina, Ni ku tima tora ga mina va nzi nwisa vinagre. [229]

²²Ngha meza yabye yi maha a ziyo kabye, Yiva ntlhamu kutshamekeni kabye. [230]

²³A vave ni xilutsu kasi a mahlo yabye ma nga woni; Ngha ziwunu zabye zi simamisa zi dzevetana.

²⁴Chulula zanga ya wena hehla kabye, A khulo ga wena a gi va kamanyete.

²⁵A muti wabye ngha wu hangalaka, Ku ngavi na muaki matendeni yabye. [231]

²⁶Hakuva va xanisa loyi u mu bileko, Va wulawula hi kubayiseka ka lava u va tlhavileko.

²⁷Enzelekisa a zigoho zabye, Va nga engheni kululameni ka wena. [232]

²⁸Ngha va vinyiwa bhukwini ga wutomi, Va nga tsaliwi zinwe ni valulamileko. [233]

²⁹Kanilezi mina loyi nzi hlokiswako ni ku xaniswa, A kuhanyisa ka wena a ku nzi tlakuse, O Nungungulu.

³⁰Nzi ta dumisa a vito ga Nungungulu hi lisimu, Nzi mu kulisa hi kukhesa.

³¹Lezo zi ta tsakisa Jehova ku hunza a nkuzi, Leyi yi nga ni timhonzo ni masonzo.

³²A vakurula va ta zi wona va tsaka; Nwina lava mu hlotako Nungungulu, a timbilu ta nwina a ti hanye!

³³Hakuva Jehova wazwa lava va vumalako, A nga kanyisi a tiperesu takwe. [234]

³⁴Ngha a tilo ni misava zi mu dumisa, A mabimbi ni zontlhe lezi zi makanyako lomo.

³⁵Hakuva Nungungulu i ta ponisa Zioni, I ta akisa a miti ya ka Juda; Kasi va tshama lomo va fumela tiko.

³⁶Ni pswalo wa malanza yakwe wu ta gi maha a tshomba yabye, Lava va Fanzako vito gakwe va ta aka kona. [235]