Read tshwa Tisimu 83 Bible Online

Tisimu 83 - tshwa bible

Tisimu 83

¹Lisimu la Asafa. Nungungulu, u nga miyeli, U nga rutisi, Nungungulu, u nga su tiwitiwi bhi!

²Hakuva a valala va wena va maha guwa, Ni lava va ku vengako va tlakusa hloko.

³Va maha gujeguje go vukela a vanhu va wena, Va tsema xikungo xo vukela lava u va lonzowotako.

⁴Vaku ngalo: Ngonani hi ta va lovisa va nga have tiko, Kasi a vito ga Israeli gi nga ha alakanyiwi.

⁵Va bohile xikungo hi mbilu yinwe, Va vumelene kasi ku ku vukela:

⁶A va matenda ya Edome ni vaIxmaeli, A vaMoabi ni vaHagari;

⁷Gebali na Amoni, na Amaleki, A maFilistia ni vaaki va le Tire,

⁸Assiria kambe i tlhangene navo, Va ya vuna a vana va Loti. (Sela.) [289]

⁹Maha kabye kota lezi u nga mahisa zona ka vaMidiani, Ni ka Sisera, ni ka Jabini le congwaneni wa Kixoni; [290]

¹⁰Lava va nga lobyiswa le Endor, Va mahile koho wa misava.

¹¹Maha tihosana tabye tiku khwatsi hi Orebi na Zeebi, Ni tihosana tabye tontlhe tiku khwatsi hi Zeba na Zalmunna. [291]

¹²Hakuva ve ngalo; A hi tekeni a tindlu ta Nungungulu.

¹³Nungungulu wa mina, va mahe va fanana ni tsutsungwani wa xihuhuri, Ni mungu wu kukuletwako hi mheho. [292]

¹⁴Kukotisa a nzilo wu hisako khwati, Ni khwatsi hi nhova yi swako zitsungeni,

¹⁵Va hlongolisise lezo hi bhubhutsa ga wena, U va chavisa hi xingulu xa wena.

¹⁶Chela tingana tinghoheni tabye, Kasi va lava a vito ga wena, Jehova.

¹⁷Ngha va kanganyiseka, va karateka kala kupinzuka, Ina, a va wise tingana va lova.

¹⁸Kasi va fela ku tiva lezaku hi wena wece u nga ni vito ga Jehova, Loyi a Hunzeleleko Kutlakuka misaveni yontlhe.