Read tshwa Tisimu 94 Bible Online

Tisimu 94 - tshwa bible

Tisimu 94

¹Jehova, Nungungulu wa kuphotela, Ti wonekelise, Nungungulu wa kuphotela. [324]

²Vuka, Mulamuli wa misava, Tlhelisela lava va matshanza.

³Jehova, kala rini a vakubiha na va ha tsaka? Kala rini a vakubiha na va ha giya?

⁴Va byabyatsa za ku ti kukumukisa; Vontlhe vagohi va ti kulisa.

⁵Va pswandlasa a tiko ga wena, Jehova, Va xanisa a tshomba ya wena.

⁶Va daya tinoni ni valuveli, Va daya ni zisiwana.

⁷Vaku: Jehova a nga zi woni, Nungungulu wa Jakobe a nga va khataleli.

⁸Pimisisani nwina zipumbu xikari ka vanhu, Na nwina maphuphulu, mu ta tlhariha rini?

⁹Loyi a nga milisa a ndleve a nga tazwa ke? Loyi a nga maha tihlo a nga ta wona ke? [325]

¹⁰Loyi a layako a matiko ni ku nyika munhu wutlhari, A nga ta tsayisa ke?

¹¹Jehova wa tiva a maalakanyo ya munhu, Lezaku a ma vuni nchumu. [326]

¹²Jehova, i katekile a munhu loyi u mu layako, Loyi u mu gonzisako hi nawo wa wena, [327]

¹³Lezaku a rutisa masikwini ya zikarato, Kala a rinzi gi kelelwa loyi wakubiha.

¹⁴Hakuva Jehova a nga ta hoxa tiko gakwe, Hambu ku tsika a tshomba yakwe.

¹⁵A kulamula ku ta tlhela ku mahiwa hi nongameto, Ni lava va kubasa timbilu va ta ku lanzela.

¹⁶Himani a to nzi lwela ka vobiha, Ni ku nzi vuna mahlweni ka vagohi ke?

¹⁷Loku Jehova a wa nga nzi vunangi. A muhefemulo wa mina ngha wu hatlisile ku aka kufeni.

¹⁸Loku nziku: A nenge wa mina wa retemuka, A wuxinji ga wena, Jehova, gi lo nzi seketela.

¹⁹Laha nzi nga karateka mbilwini, Wena u tangalisile a muhefemulo wa mina.

²⁰Xana u ngava ni wuhlengeli ni vafumeli vo biha ke, Lava va tsimbeketako, vaku: I nawo?

²¹Va hlengeletanela a muhefemulo wa loyi a lulamileko, Va kona lava va nga hiko na nanzu.

²²Kanilezi Jehova hi khokhola ga mina, Nungungulu wa mina hi ribye ga wuponelo ga mina.

²³I ta tlhelisela hehla kabye a kubiha kabye, A va lovisa kubiheni kabye; Futsi, Jehova Nungungulu wa hina i ta va hetisa.