Read tshwa Mavingu 1 Bible Online

Mavingu 1 - tshwa bible

Mavingu 1

¹A mavingu ya Solomoni, nʼwana Davida, a hosi ya ka Israeli.

²Za koteka ku tiva ha wona a wutlhari ni gonziselelo, i ku tlhamusela timhaka ta kupimisisa;

³A ka wona ku nyikiwa gonziselelo ya wutlhari, i tlhelo ga nongameto, ni kulamula, ni fanelo.

⁴Ma tlharihisa lava vo kala kupima, i ku nyika lava vaswa wutivi ni kualakanyela,

⁵Loyi a tlharihileko i fela kuzwa, a enzelekisa wutivi, oyi a nga ni kupimisisa i ta ti kumela makungo ma nene,

⁶Ya ku pima mavingu ni ku vingula, timhaka ta titlhari, ni zigonzo zi fihlilweko za tona.

⁷A ku chava Jehova hi masangulo ya wutivi: anilezi a zipumbu zi kanyisa wutlhari ni gonziselelo. [1]

⁸Nwananga, zwana gonziselelo ya dadani wa wena, nga tsiki a nayo wa nyine wa wena:

⁹Hakuva lexo xi tava xidlodlo xo saseka hlokweni ya wena, i gobo nhanwini ya wena.

¹⁰Nwananga, loku vaonhi va ku kucetela, nga vumeli.

¹¹Loku vaku: A hi fambe zinwe, iya xiyelela lava va nga hiko na nanzu, asi ku halata nkhata wabye;

¹²Hi va mita kukotisa Xeole na va ha hanya, ontlhe va ta ku khwatsi hi lava va relelako lomu rinzini;

¹³Hi ta kuma zontlhe zo saseka, i ta tata tiyindlu ta hina hi muphango;

¹⁴Ti tlhanganyise zinwe na hina, ina hontlhe hi tava ni nkwama munwe.

¹⁵Nwananga, u nga dzuki u famba hi tindlela tabye, nga veki konzo wa wena tisokweni tabye.

¹⁶Hakuva a milenge yabye yi tsutsumele kubiheni, a hatlisa ku halata nkhata. [2]

¹⁷Hizinene, a tlhamu wu dembelwe mahala, oku zi mahiwa a tinyanyani na ti kari ti zi wona.

¹⁸Kasi vona va xiyelela nkhata wa vona venyi, a dembela wutomi gabye ha voce.

¹⁹Ti nghaho tindlela ta vontlhelele lava va na nga ni mahlomi kuphangeni, akuva ku khoma wutomi ga vona venyi. [3]

²⁰A wutlhari giba hungu le phangweni, i tlakusa a gezu ga gona lomu magonzweni,

²¹Giba hungu matshanwini ya hombe ya gotsovanyano, omu tinyangweni ta muti gi tshawutela giku:

²²Nwina zipumbu, ku ta kala kuva rini na ma ha ranza wupumbu ke? vatseketseli va ta xalaliswa hi kutseketsela, i zipumbu zi ta venga wutivi kala rini ke?

²³Hunzulukani hi kukawuka ka mina, angutani, nzi ta chulula a moya wa mina hehla ka nwina, zi ta mu maha mu tiva timhaka ta mina.

²⁴Hakuva mina nzi vitanile, nwina mu ala, zi lo nawuluta a canja ga mina, kanilezi ai nga kona a nga gi khatalela, [4]

²⁵Kota lezi nwina mu kanyisileko makungo ya mina, u nga khatali hi kukawuka ka mina,

²⁶Minawu nzi ta hleka hi siku ga kuhlokiswa ka nwina, zi ta tseketsela laha zi ta nga chikela lezi mu zi chavako.

²⁷Ina, laha a kuchava ka nwina ku ta ngata khwatsi i bhubhutsa, i kulobyiswa ka nwina ku ta nga kotisa xipupuri: aha a kuhlokiswa ni kuketa ku tako hehla ka nwina.

²⁸Zonake va ta vitana ka mina, kanilezi cima nzi nga ta hlamula; a ta nzi lava, kanilezi va nga ta nzi kuma. [5]

²⁹Hakuva va vengile wutivi, ima a va ti hlawulelangi ku chava Jehova:

³⁰Va alile a wusungukati ga mina, a kanyisile kukawuka ka mina kontlhe.

³¹Hikwalaho va taga mbhanzo wa mahanyela yabye, a ta xuriswa hi makungo yabye.

³²Hakuva a vo kala kupima va ta hihiritwa kupengeni kabye, i kuvuvuma ka zipumbu ku ta va lovisa.

³³Kanilezi ni wihi loyi a nzi ingisako i tshama kuruleni, ta rutisa, cima a nga tava ni kuchava makhombo.