Read tshwa Mavingu 10 Bible Online

Mavingu 10 - tshwa bible

Mavingu 10

¹A mavingu ya Solomoni nʼwana a tlharihileko i tsakisa dadani wakwe: anilezi a nʼwana wa xipumbu i hlomulo ka nyine wakwe.

²A titshomba ta kubiha a ti vuni nchumu; anilezi a kululama ku tlhatlhisa kufeni.

³Jehova a nga ta tsika muhefemulo wa a lulamileko wuzwa ndlala, anilezi wa ala a kunavela ka wa kubiha.

⁴Loyi wa woko go loloha wa maha xisiwana; anilezi a canja ga loyi a pangamileko gi vanga wukosi.

⁵A nʼwana wo tlhariha wa hlengeletela xikhatini xa ximumu, anilezi loyi a etlelako xikhatini xa kutshovela, wa vanga tingana.

⁶A zikatekiso zi le tihlokweni ta valulamileko, anilezi a nomu wa loyi wa kubiha wu na ni mona.

⁷Kualakanyiwa ka loyi a lulamileko ku katekile; anilezi a vito ga wa kubiha gi ta bola.

⁸A munhu a nga ni mbilu yo tlhariha wa vumela zileletelo; anilezi loyi a nga ni nomu wa zidomudomu i tawa.

⁹Loyi a fambako hi kululama i famba hi kurula; anilezi loyi a fambako hi tindlela ta hava i ta tibyiwa.

¹⁰Loyi a tsopetako hi tihlo wa vanga wusiwana: anilezi loyi a nga ni nomu wa zidomudomu i tawa.

¹¹A nomu wa a lulamileko i hlowo ya wutomi; anilezi a nomu wa loyi wa kubiha wu na ni mona.

¹²A livengo li vuxa timholova, anilezi a liranzo li fenengeta zihambunyeto zontlhe.

¹³A wutlhari gi kumiwa ka milomu ya munhu a nga ni kupima; anilezi a nhonga yi fanele a hlana wa loyi a nga hiko na kupimisisa.

¹⁴A titlhari ti hlengeletela wutivi; anilezi a nomu wa zipumbu wu yisa kulobyisweni.

¹⁵A wukosi ga munhu a fumileko hi muti wakwe wo tiya, Kanilezi a kulobyiswa ka zisiwana, mbusiwana ga zona.

¹⁶A ntiro wa loyi a lulamileko wu mu kumela kuhanya; anilezi a bhinzu ga loyi wa kubiha gi yisa xionhweni. [24]

¹⁷Loyi a hlayisako gonziselelo i lomu ndleleni ya wutomi; anilezi loyi a alako ku lulekwa wa lahleka.

¹⁸Loyi a fihlako livengo i na ni nomu wa mawunwa, i loyi a hlevako, xipumbu.

¹⁹A ka loyi a wulawulako nguvu a ku vumaleki xionho; anilezi loyi a khomako nomu wakwe i tlharihile.

²⁰A lirimi la a lulamileko i siliva yi basileko: mbilu ya wa kubiha a yi vuni nchumu.

²¹A milomu ya a lulamileko yi gisa vanyingi; anilezi a zipumbu zifa hi ku vumala wutlhari.

²²A zikatekiso za Jehova za fumisa munhu; ima a nga engeteli wusiwana ha zona.

²³A ka xipumbu a ku maha kubiha ku khwatsi ku hlakana; anilezi a wutlhari litsako ka loyi a nga ni kupimisisa.

²⁴Lexi a xi chavako a wa kubiha xi ta mu wela; anilezi a wa kululama i ta mahelwa mixuvo yakwe.

²⁵Loku xipupuri xi hunzile a wa kubiha a nga ha hi kona; anilezi a wa kululama xiseketelo xa simasima. [25]

²⁶A munhu wa lolo i kotisa vinagre menweni, ka lava va mu rumako, ni musi mahlweni yabye.

²⁷A ku chava Jehova ku engetela masiku; anilezi a malembe ya wa kubiha ma ta komaniswa.

²⁸A kutsumba ka wa kululama ku tava kutsaka; anilezi a kulangutela ka wa kubiha ku ta lova.

²⁹A ndlela ya Jehova yi hi khokhola ga valulamileko; anilezi yi hi kulobyiswa ka vamahi va kubiha.

³⁰A wa kululama cima a nga ta tsekatseka; anilezi a wa kubiha a nga ta aka tikweni.

³¹A nomu wa a lulamileko wu humesa wutlhari; anilezi a lirimi la kukanganyisa li ta tsemiwa.

³²A milomu ya wa kululama ya tiva lezi zi amukelekako; anilezi a milomu ya wa kubiha yi wulawula kukanganyisa.