Read tshwa Mavingu 13 Bible Online

Mavingu 13 - tshwa bible

Mavingu 13

¹A nʼwana a tlharihileko i ingisa ziluleko za raru wakwe; anilezi a mutseketseli a ngazwi kukawukwa.

²A munhu i ta eneliswa hi wunene ga mihanzu yi humako nonwini wakwe; anilezi a va nga tsumbekangiko va navela ku tira hi tihanyi.

³Loyi a khomako a nomu wakwe i hlayisa wutomi gakwe; anilezi a munhu wa zixuxa i ta wela kuloveni.

⁴A mbilu ya lolo ya navela, kanilezi a nga kumi nchumu; anilezi a mbilu ya loyi a tirako yi ta kulukiswa.

⁵A munhu a lulamileko wa venga mawunwa; anilezi a wa kubiha wa nyenyiwa, a telwa hi tingana.

⁶A kululama ka mu hlayisa loyi a fambako hi ndlela yi lulamileko; anilezi a kubiha ku wisa muonhi.

⁷I kona loyi a ti fumisako na a nga hi na nchumu; kona loyi a ti mahako xisiwana kasi i fumile.

⁸A nzhiho wa wutomi ga munhu hi kufuma kakwe; anilezi a xisiwana a xizwi kukawukwa.

⁹A kuwonekela ka laʼvo lulama hi litsako; anilezi a kandiya ya laʼvo biha yi ta timeka.

¹⁰A matshanza ma vanga kuhambana; anilezi lava va vumelako ku hiwa wusungukati va na ni wutlhari.

¹¹A kufuma loku ku kumiwako hi xihatla ku ta mbhela; anilezi loyi a hlengeletelako hi ku ti tirela i ta enzeleka.

¹²A kuhlwela ka lexi xi langutelako ku bayisisa mbilu; anilezi a kutatiseka ka mixuvo i sinya ya wutomi.

¹³Loyi a kanyisako a mhaka i ti nehela lobyiswa; anilezi loyi a khatalelako zileletelo i ta chachazelwa. [29]

¹⁴A gonziselelo ya wutlhari xibuka xa wutomi; i ponisa vanhu maziyweni ya lufo.

¹⁵A kupima ku nene ku nyika thomo; anilezi a ndlela ya vagohi yi binzile.

¹⁶Vontlhe vanhu vo tlhariha va tirisa wutivi; anilezi a xipumbu xi kombisa wupumbu ga xona.

¹⁷A ntsumi wa kubiha wu wela kubiheni; anilezi a ntsumi wu kholekileko mbutomi.

¹⁸A wusiwana ni tingana zi tava ka loyi a alako ziluleko; anilezi loyi a amukeleko kukawukwa i ta dzunziwa.

¹⁹A mixuvo leyi yi tatisekako yi tsakisa muhefemulo; anilezi a ku huma kubiheni za nyenyeka ka zipumbu.

²⁰Hlengela ni tlhari, u tava tlhariwo; anilezi loyi a mahako wunghana ni zipumbu i ta lobyiswa.

²¹A kubiha ku hlongolisa vaonhi; anilezi a wunene i nchachazelo wa valulamileko.

²²A munhu nene wa siyela vazukulu vakwe a tshomba; anilezi a tshomba ya muonhi yi siyelwa valulamileko.

²³A kuga ko tala ku huma hi kurima ka xisiwana; anilezi va kona va lovako hi ku kala zinene.

²⁴Loyi a nga tirisiko limhika i venga nʼwana wakwe; anilezi loyi a mu ranzako wa mu tsayisa.

²⁵Loyi a lulamileko waga a xura; anilezi a rumbu ga wa kubiha gi tava ni ndlala.