Read tshwa Mavingu 18 Bible Online

Mavingu 18 - tshwa bible

Mavingu 18

¹A munhu loyi a ti hambanyisako ni vanwani i hlota ku ti tsakisa ntsena; a hlokolokela zontlhe lezi zi nga ni fanelo.

²A xipumbu a xi tsakiswi hi ku hlota kupimisisa, i lava ntsena ku humesa lezi zi nga mbilwini ya xona.

³Loku kuta wa kubiha, ita ni kuhanyisa; tingana na tona tita ni kusola.

⁴A timhaka ta nomu wa munhu ti khwatsi i mati yo eta; i hlowo ya wutlhari yi khwatsi xibuka xi khulungako.

⁵A zi saseki ku yimela loyi wa kubiha, asi ku vukela loyi a lulamileko kulamuleni. [42]

⁶A nomu wa xipumbu wu xi enghenisa timholoveni, i nomu wakwe wu mu vitanela timbirimbi.

⁷A nomu wa xipumbu hi wona mulovisi wa xona, i milomu yakwe i ziyo wa muhefemulo wakwe.

⁸A timhaka ta muhlevi ti khwatsi zakuga zo nanziha, i enghena lomu nzeni, a rumbyini.

⁹Loyi a lolohako ntirweni wakwe, aloye i nakulobye wa mulovisi.

¹⁰A vito ga Jehova i khokhola go tiya; oyi a lulamileko wa chavela ka gona a pona.

¹¹A wukosi ga munhu a fumileko hi khokhola gakwe; ualakanyeni kakwe i khurisi gi tlakukileko.

¹²Loku a kulova ku nga se nga chikela, a mbilu ya munhu yi na ni matshanza; i ku ti tsongahata ku ranga mahlweni ka wudzunzo.

¹³Loyi a hlamulako mhaka na a nga se ku yizwa, kombisa wupumbu gakwe, a ti wisa tingana.

¹⁴A moya wa munhu wa mu tiyiseta gomeni gakwe; anilezi himani a nga zi kotako ku rwala a moya wu tshovekileko ke?

¹⁵A mbilu ya munhu a tlharihileko ya kuma wutivi; i ndleve ya tlhari yi hlota wutivi.

¹⁶A xinyikiwo xa munhu xa mu mahela wutshamu; i mu tshineta mahlweni ka vanhu va hombe,

¹⁷Loyi a rangako a hlamula hubyeni, ko khwatsi i lulamile; anilezi a munwani wata a ta mu ringa.

¹⁸A hlolo yi maha timholova ti mbhela; i lamula ni tinhenha.

¹⁹Za hehuka a ku khozisa a muti wu bhiyelweko, ku hunza a makabye a zangarileko; i timholova ti khwatsi zikwinyaro za khokhola.

²⁰A rumbu ga munhu gi ta xuriswa hi mbhanzo wa lirimi lakwe; ta xura hi lezi zi humako milonwini yakwe.

²¹A kufa ni kuhanya ku le ntanwini wa lirimi; i lava va li ranzako va taga a mbhanzo wa lona.

²²Loyi a kumileko sati i kumile a kukateka; a kuma thomo hi ka Jehova.

²³A zisiwana zi wulawula hi ku khongotela; anilezi loyi a fumileko i hlamula hi lunya,

²⁴Loyi a hlotako a vanghana vo tala i ti lavela khombo; Kanilezi ku na ni munghana loyi a tsumbekileko ku hunza makabye.