Read tshwa Mavingu 23 Bible Online

Mavingu 23 - tshwa bible

Mavingu 23

¹Laha wena na u tshama kugeni ni mufumeli, iyisisa ku tiva lezi zi nga mahlweni ka wena:

²Khoma mukwana kolweni wa wena, oku wena u hi wa mahlomi.

³U nga naveli kuga kakwe ko nanziha, akuva zakuga za kukhohlisa.

⁴U nga karatekeli kuva u fuma; nga tsumbi wutlhari ga wena wutsumbu.

⁵U ta cuwukela lezi zi hunzako ke? akuva a wukosi ga mila tipapa, i puruma kukotisa gama giya tilweni.

⁶U ngagi kuga ka loyi a nga ni tihlo go tsona; e hambu a ku navela a tifawufawu takwe;

⁷Hakuva khwatsi hi lezi a zi alakanyako mbilwini yakwe, hi lezi a nga zona, taku ka wena; Gana, unwa; anilezi a mbilu yakwe na yi nga hi ka wena.

⁸A kuga loko u ku gileko u ta ku hlata, lahlekelwa hi timhaka ta wena to saseka.

⁹U nga wulawuli tindleveni ta xipumbu; akuva i ta kanyisa a wutlhari ga timhaka ta wena. [56]

¹⁰U nga hunzulusi a mbhingano wa kale, nga engheni sinwini ga xisiwana: [57]

¹¹Hakuva a mutiruli wa xona i na ni ntamu; ta yimela a mhaka ya xona.

¹²Nyiketela a mbilu ya wena kululekweni; i tindleve ta wena timhakeni ta wutivi.

¹³U nga tsoni nwanana ku tsayisiwa; akuva loku u muba hi limhika, a nga tafa.

¹⁴U ta muba hi limhika, tlhatlhisa muhefemulo wakwe le Xeole.

¹⁵Nwananga, loku a mbilu ya wena yi tlharihile, mbilu ya mina yi ta nengela.

¹⁶Ina, nzi ta tsaka mbilwini ya mina, aha a milomu ya wena na yi wulawula a zilo zi nene.

¹⁷U nga vumeli a mbilu ya wena yi va ni makangwa hi za vaonhi; anilezi chava Jehova gontlhe siku.

¹⁸Lezo u tava ni masiku ma ha tako, i kutsumba ka wena cima ku nga tava ka mahala.

¹⁹Ingisa, nwananga, uve tlhari; ambisa mbilu ya wena ndleleni yo lulama.

²⁰U nga ti tlhanganyisi ni vanwi va byala; e hambu ni lava va nga ni mahlomi kugeni ka nyama.

²¹Hakuva a xidakwa ni munhu wa mahlomi va tava zisiwana; i tshongotshongo gi ta ambexa munhu hi zijakati.

²²Ingisa a raru wa wena loyi a ku belekileko, nga hanyisi a nyine wa wena loku a khosahele.

²³Xava zinene, u nga zi xavisi; i wutlhari, ni gonziselelo, ni kupimisisa.

²⁴A raru wa loyi a lulamileko i ta nengela nguvu; i loyi a belekako a nʼwana wo tlhariha i ta mu tsakela.

²⁵A va tsakela raru wa wena ni nyine wa wena, i loyi a ku belekileko ngha a giya.

²⁶Nwananga, nzihe mbilu ya wena; i mahlo ya wena ngha ma tsakiswa hi tindlela ta mina.

²⁷Hakuva a xibhayi xi hi rinzi gi etileko; i xirembi i geva gi hlongileko.

²⁸Yenawu wa ongozela kota muphangi, anzisa vagohi xikari ka vanhu.

²⁹Himani a nga ni khombo? Himani a nga hlomulweni? Himani a nga timholoveni? imani a nga mikosini? Himani a nga ni timbanga handle ka nanzu? Himani a pswhukileko mahlo ke?

³⁰Hi vona lava va rivatekako hi kunwa vinya; ava va fambako va hlota a vinya gi patselweko.

³¹U nga cuwuki a vinya loku gi pswhukile; oku gi pupuma lomu ka gombe: i loku u ginwa gi relela ha goce. [58]

³²Hi kugumesa gi luma kota nyoka; i khohosa kota mamba.

³³A mahlo ya wena ma ta sangula ku wona lezi zi hlamalisako, i mbilu ya wena yi ta wulawula kukhohlisa.

³⁴Ina, u ta ku khwatsi hi loyi a etlelako xikari ka bimbi; ambu kutani loyi a nga le hehla ka mulingwati.

³⁵U taku: Va nzi bile, kanilezi a nzi bayiswangi; a nzi kwapile, kanilezi a nzi zi zwangi: zi ta vuka rini nzi ya gi lava kambe?