Read tshwa Mavingu 25 Bible Online

Mavingu 25 - tshwa bible

Mavingu 25

¹Lawa kambe mavingu ya Solomoni, lawa a vavanuna va Hezekia, a hosi ya ka Juda, va nga ma tsala.

²Wudzunzo ga Nungungulu a ku fihla xilo; anilezi a wudzunzo ga tihosi hi ku kambisisa a mhaka. [61]

³A kutlakuka ka tilo, ni kueta ka misava, i timbilu ta tihosi, a zi na ku hloliwa.

⁴Susa manyelo ka siliva, onake a muwumbi i ta maha a xibya ha yona.

⁵Susa wa kubiha mahlweni ka hosi, onake a xitshamu xakwe xa wuhosi xi ta tiyiswa hi kululama.

⁶U nga ti kulisi mahlweni ka hosi, nga tshami wutshanwini ga vanhu va hombe.

⁷Hakuva zi sasekile ka wena loku vaku: Tshinela leno, ku hunza ku tsongahatiwa mahlweni ka hosi eyi u yi wonako hi mahlo. [62]

⁸U nga tsutsumeli ku ti enghenisa kukanetisaneni, nga tsanzeka ku ti hlamulela hi magumo, aha a muakelane wa wena na ku wisa tingana.

⁹Xuxa mhaka ya wena ni muakelane wa wena, anilezi u nga bhoxi a mifihlakalo ya munwani;

¹⁰Hakuva loyi a zi zwako a nga ku wisa tingana, i manyata ya wena ma nga ha suki ka wena.

¹¹A mhaka yi wulwako hi fanelo i fanana ni mnlalanja ya nzalama xibyeni xa siliva.

¹²A mululeki a layako hi wutlhari a ndleve yi ingisako fanana ni phera ya nzalama, ni xingwavila xa nzalama yi hlutilweko.

¹³A tsukano wu tsumbekileko ka lava va wu rumako, u fanana ni kutitimela ka gapongo xikhatini xa kutshovela; akuva wa rutisa a muhefemulo wa nwinyi wakwe.

¹⁴Loyi a ti dzunzako hi wuhana, kasi a nga nyikeli nchumu, fanana ni marefu ni mheho yi nga hiko na vula. [63]

¹⁵A hosana ya khongotelwa hi kutimisela ko leha; i lirimi lo olova la tshova marambu.

¹⁶U kumile wulombe ke? Gana lipimo li ku ringanako; nga taku u kolwa ha gona u tlhela u hlata.

¹⁷U nga tati nkonzo lomu ndlwini ya muakelane wa wena, akuva a nga karala ha wena a sangula ku ku venga.

¹⁸A munhu loyi a kustumunyako hava a vukela muakelane wakwe, ibombonzwani, ni supado, ni ligalala lo pswotika.

¹⁹A munhu a nga kholekangiko, a ku mu tsumba xikhatini xa zikarato, fanana ni tino gi tshovekileko, ni nenge wu khuyukileko.

²⁰A ku yimbelela lisimu ka loyi a nga ni mbilu yi binzileko, u khwatsi ku tlhatlha a nguwo hi xikhati xa xirami, ni ku chela vinagre hehla ka nitro.

²¹Loku a nala wa wena azwa ndlala, muhe zakuga aga; i loku azwa tora, muhe mati anwa; [64]

²²Hakuva zi tava a nhulu ya makhala ya nzilo hehla ka hloko yakwe, a Jehova i ta ku chachazela.

²³A mheho ya Nwalungu yi neha vula; inghaho ni lirimi li lumbetako li maha tinghohe ti tsuva.

²⁴I chuko ku tshama le gwitsini ga xixungwe xa yindlu, u hunza ku tshama lomu ndlwini ya hombe ni wasati wa timholova.

²⁵A mahungu yo nanziha ma humako kule, a fanana ni mati yo titimela ka muhefemulo wu nga ni tora.

²⁶A munhu wo lulama loyi a rurumelako mahlweni ka wa kubiha, fanana ni xibuka xi vindlukileko, ni hlowo yi bolileko.

²⁷A hi zi nene kuga nguvu wulombe, inghaho ni ku ti lavela wudzunzo, a zi na wudzunzo.

²⁸Loyi a nga fumeliko muhefemulo wakwe, fanana ni muti lowu wu wileko, wu nga hiko na ligingisi.