Read tshwa Mavingu 26 Bible Online

Mavingu 26 - tshwa bible

Mavingu 26

¹Khwatsi hi gapongo xikhatini xa ximumu, ni vula xikhatini xa kutshovela, inghaho ni wudzunzo a gi faneli xipumbu.

²Khwatsi hi manjingiri a nzulako, ni mbewulwani yi purumako, inghaho ni nzhukano yi nga hiko na xigelo a yi tiri nchumu.

³A mhika nja haxi, ni matomu nja mbongola; i nhonga nja hlana wa xipumbu.

⁴U nga hlamuli a xipumbu hi wupumbu ga xona, nga taku na wenawu u fanana naxo.

⁵Hlamula xipumbu hi wupumbu ga xona, nga ti alakanyela lezaku i tlharihile kuwoneni kakwe.

⁶Loyi a rumako mhaka hi xipumbu, a ti tsema milenge, anwa khombo.

⁷A milenge ya xilema a yi tiyangi; inghaho ni mufananiso no nwini wa zipumbu.

⁸A ku dzunza xipumbu, i fanana ni ku bohelela ribye lomu ka xibhalakatsa.

⁹A mufananiso nonwini wa zipumbu, u fanana ni muzwa lowu wu tlhavako a canja ga xidakwa.

¹⁰A munhu loyi a tholako xipumbu ni vahunzi, a fanana ni mufuli wa mawura a tlhavako vontlhe.

¹¹Khwatsi hi mbyana yi tlhelako yiga mahlata ya yona, inghaho ni xipumbu xi tlhelelako wupumbyini ga xona.

¹²U na nga wona a munhu loyi a ti wulako lezaku i tlharihile ke? xipumbu xi chukwana ku hunza loye.

¹³A lolo gi ngalo: Ku na ni nghala laha ndleleni; nghala yi lomu magonzweni.

¹⁴Khwatsi hi livati li hunzulukako zikhuleketweni za lona, inghaho ni lolo hehla ka mubhedi wakwe.

¹⁵A lolo gi peta a canja ga gona lomu ngelweni, anilezi zi mu karata ku gi tlhelisa giya nonwini wakwe.

¹⁶A lolo gi ti kuma na gi tlharihile u hunza a ntlhanu wa vanhu ni vambiri lava va hlamulako hi kupimisisa.

¹⁷A muhunzi loyi a ti enghenisako timholoveni, na ti nga mu henyi, fanana ni loyi a khomako a mbyana hi tindleve.

¹⁸Khwatsi hi munhu wo hunguka, loyi a hoxako tihunyi ta nzilo, ni tigalala, ni lufo;

¹⁹I maha lezo, loyi a khohlisako muakelane wakwe, ku: Nzi wo hlakana.

²⁰Laha ku nga hava lihunyi, a nzilo wa timeka; inghaho ni timholova, ta mbhela loku ku nga hi na muhlevi.

²¹Khwatsi hi tihunyi ni makhala zi dzivelako nzilo, inghaho ni munhu wa timholova, i vuxa mazunga.

²²A timhaka ta muhlevi ti khwatsi zakuga zo nanziha, i enghena lomu nzeni, a rumbyini.

²³A milomu yi hisako zinwe ni mbilu yi bihileko, i fanana ni xibya xa wumba xi nameketelweko manyelo ya siliva.

²⁴Loyi a vengako wa kanganyisa hi milomu yakwe, mbilwini yakwe i alakanyela kukhohlisa;

²⁵Loku a wulawula hi wunene, u nga kholwi ha yena: akuva mbilwini yakwe ku na ni ntlhanu wa manyala ni mambiri.

²⁶Hambu loku a livengo lakwe li ti fihla hi kukanganyisa, kubiha kakwe ku ta dlunyatiswa hlengeletanweni.

²⁷Loyi a ketako a rinzi i ta wela ka gona; i loyi a wumbulutako a ribye gita mu wela.

²⁸A lirimi la mawunwa la venga lava va xanisilweko ha lona; i nomu wu lapitako wa lovisa.