Read tshwa Mavingu 27 Bible Online

Mavingu 27 - tshwa bible

Mavingu 27

¹U nga ti kukumuxi wutsumbu ga wena ha manziko, akuva a ku zi tivi lezi a siku gi ta nga zi neha. [65]

²Dzunziwa hi vanwani, na ku nga hi nomu wa wena wutsumbu; kuve munwani na ku nga hi milomu ya wena wutsumbu. [66]

³A ribye ga binza, na gonawu vunye; anilezi a zanga ya xipumbu yi hunza a zilo lezo zimbiri.

⁴A khulo gi bihile, ni zanga hi ntalo wa mati, imani a nga zi kotako ku yima mahlweni ka xiluse ke?

⁵A kukawuka kuwonekeleni ku nene, u hunza a liranzo leli hi fihlilweko.

⁶A timbanga ti vangiwako hi munghana ti kombisa kutsumbeka kakwe, anilezi a kupswopswa ka nala ka khohlisa.

⁷Loyi a xurileko wa nyenya wulombe; anilezi ka loyi a nga ni ndlala zontlhe zi bavako za nanziha.

⁸Khwatsi hi xinyanyani xi nzulanzulako kule ni xisaka xa xona, inghaho ni munhu loyi a sukako wutshanwini gakwe a fambafamba.

⁹A mafura ni lezi zi nuhelako, za tsakisa a mbilu; inghaho ni wusungukati gi humako mbilwini ya munghana, ga nanziha.

¹⁰A munghana wa wena ni mughana wa raru wa wena, u nga va tsiki; e hambu ku enghena ndlwini ya nakuloni a siku u nga zikaratweni: oyi a nga muakelane wa wena wa hunza a nakuloni loyi a nga le kule.

¹¹Nwananga, tlhariha u maha a mbilu ya mina yi tsaka; asi nza fela ku mu hlamula loyi a nzi rukako.

¹²A munhu a tlharihileko wa wona mhango a fihlala, anilezi a zipumbu ziya mahlweni zi ya xaniseka.

¹³Tekani a nguwo yakwe, hakuva i ti bohile hi nanzu wa munwani, u rihiseni hi kota ya wasati wa matiko.

¹⁴Loyi a dzunzako a munghana wakwe hi gezu ga hombe na ga hi mixo, ta hlayelwa lezaku wa mu rukatela.

¹⁵A yindlu leyi yi vutako hi siku ga vula, i wasati wa timholova, za fanana.

¹⁶Ni wihi loyi a mu beletelako i beletela mheho, i woko gakwe ga xinene gi khomile mafura.

¹⁷A xiketse xi lota xiketse; ilezo ni munhu, wa vuxa a zanga ya munhu munwani.

¹⁸Loyi a hlayisako a sinya ya kuwu, i taga mihanzu ya yona; inghaho ni loyi a hlayisako a nwinyi wakwe i ta dzunziwa.

¹⁹Khwatsi hi nghohe yi wonekako lomu matini, yi fanana ni nwinyi wa yona, inghaho ni mbilu ya munhu yi fanana ni ya munwani.

²⁰A Xeole ni Abaddoni cima a zi xuri, inghaho ni mahlo ya munhu cima a ma eneliswi.

²¹A mbita yo nyekisela nja siliva, ni nzhimbo ngwa nzalama; ezo a munhu wa ringwa hi wudzunzo gakwe.

²²Hambu loku u wa ta kanza a xipumbu lomu churini, kanza hi musi u patsa ni mavele lawa ma gayiwako, ima a wupumbu gakwe gi nga ta huma.

²³Tlhariha u tiva a tiyivu ta wena, hlayisa khwatsi a mitlhambi ya wena;

²⁴Hakuva a wukosi a hi ga kala kupinzuka, i xidlodlo xa wuhosi a hi xa zontlhe zizukulwana.

²⁵A byanyi go woma gi susiwa, ni legi ga lihlaza ga huma; khubyanyi ga zitsunga ga wungeletela.

²⁶A tiyivana ti tava ta tinguwo ta wena; i timbuti ti ta xava simu.

²⁷A masi ya timbuti ma tava zakuga za wena ni za ngango wa wena, i malanza ya wena ya xisati.