Read tshwa Mavingu 28 Bible Online

Mavingu 28 - tshwa bible

Mavingu 28

¹A va kubiha va tsutsuma na va nga hlongolwi hi munhu; anilezi lava va lulamileko va tiya kota xinghalana. [67]

²Loku a tiko gi hluwukile, a tihosi ti tele; anilezi a wuhosi gi tiyisiwa hi vanuna va kupimisisa ni wutivi.

³A muvumali loyi a tsimbeketako a zisiwana fanana ni vula leyi yi kukuletako yi nga siyi ni zakuga.

⁴Lava va tsikako nayo va dzunza va kubiha; anilezi lava va hlayisako nayo valwa navo.

⁵A vanhu va bihileko a va pimi lezi zi lulamileko; anilezi lava va hlotako Jehova va pima zilo zontlhe.

⁶I chukwana a xisiwana lexi xi fambako hi tindlela ta xona to lulama, u hunza loyi a fambako hi tidlela takwe ta kubiha na fumile.

⁷Loyi a hlayisako nayo i nʼwana a tlharihileko; anilezi loyi a hlengelako ni vabewuti, wa wisa tingana raru wakwe.

⁸Loyi a anzisako a tshomba yakwe hi bhinzu gi bihileko, yi hlengeletelela loyi a hawukelako Zisiwana.

⁹Loyi a valako ndleve yakwe legaku a ngazwi nayo, i mukombelo wakwe wu tava manyalataniso.

¹⁰Loyi a hambukisako va kululama tindleleni ta kubiha, ta wela rinzini legi a gi kelileko; anilezi a valulamileko va taga tshomba yo saseka. [68]

¹¹A munhu a fumileko i tlharihile kuwoneni kakwe wutsumbu; anilezi wa pimiwa hi zisiwana lezi zi nga ni kupimisisa.

¹²Loku a valulamileko va hlula, ku na ni wukosi ga hombe; anilezi loku laʼvo biha va tlakuka, a vanhu vo fihlala.

¹³Loyi a fihlako zionho zakwe cima a nga ta kateka; anilezi loyi a zi wulelako, a zi tsika, i ta mahelwa wuxinji. [69]

¹⁴I katekile a munhu loyi a nga ni livalo xontlhe xikhati; anilezi loyi a nonohisako a mbilu yakwe i ta wela khombyeni.

¹⁵Khwatsi hi nghala yi dzumako, ni urso legi gi nga ni ndlala, inghaho ni mufumeli wo biha loyi a fumelako zisiwana.

¹⁶Ni hosi leyi yi nga hiko na kupimisisa yonawu mutsimbeketi wa hombe; anilezi loyi a vengako ku navela mali i ta lehisa masiku yakwe.

¹⁷A munhu loyi a binzeliwako hi nkhata wa munwani, tsutsumela rinzini, ngha a nga hi kona a mu tsimbetelako. [70]

¹⁸Loyi a fambako hi kululama i ta hanyiswa; anilezi loyi a fambako hi tindlela ta kubiha, zalezo i tawa.

¹⁹Loyi a rimako a simu gakwe i tava ni zakuga zo tala; anilezi loyi a lanziselako lezi zi nga vuniko nchumu, i tava ni wusiwana ga hombe.

²⁰A munhu a kholekileko i tava ni zikatekiso zinyingi; anilezi loyi a navelako ku fuma hi ku hatlisa a nga ta kala a nga tsayiswi. [71]

²¹A ku chava dzumba ga munhu a zi sasekangi; akuva hi xipanze xa xibaba, a munhu a nga tshova nayo.

²²A munhu wa wutsona wa hatlisa ku fuma; ima a nga alakanyi lezaku a wusiwana gi ta wela hehla kakwe.

²³Loyi a kawukako munhu anzhako ka xikhati i ta dzunziwa, u hunza loyi a xengetelako hi lirimi lakwe.

²⁴Loyi a phangako raru wakwe kutani nyine wakwe, aku: Cima a zi bihangi; aloye i xaka ga mulovisi. [72]

²⁵Loyi a nga ni mbilu ya matshanza wa vuxa mazunga; anilezi loyi a tsumbako Jehova i ta xura.

²⁶Loyi a tsumbako mbilu yakwe wutsumbu xipumbu; anilezi loyi a fambako hi wutlhari i ta tlhatlhiswa.

²⁷Loyi a nyikako ka zisiwana cima a nga ta vumala; anilezi loyi a ti valako mahlo yakwe, i tava ni ziruko zo tala.

²⁸Loku a va kubiha va tlakuka, a vanhu vo fihlala; anilezi loku va lova, a va kululama va enzeleka.