Read tshwa Mavingu 3 Bible Online

Mavingu 3 - tshwa bible

Mavingu 3

¹Nwananga, u nga rivali nayo wa mina, anilezi a mbilu ya wena a yi hlayise zileletelo za mina; [6]

²Hakuva zi ta engetela masiku ya wena, i malembe ya kuhanya ka wena, zinwe ni kurula ka wena.

³A wuxinji ni zinene ngha zi nga humi ka wena, i bohelele nhanwini ya wena; i tsale lomu mbilwini ya wena:

⁴Kasi wa fela ku kuma tipswalo ni kupimisisa ahlweni ka Nungungulu ni ka vanhu.

⁵Tsumba Jehova hi mbilu ya wena yontlhe, nga tsumbi kupimisisa ka wena wutsumbu. [7]

⁶U ta mu ingisa tindleleni tontlhe ta wena, ena i ta lulamisa a tisoko ta wena.

⁷U nga ti hlayi lezaku u tlharihile, hava Jehova, u huma kubiheni. [8]

⁸Wu tava muri a nkaveni wa wena, i mongo marambyini ya wena.

⁹Dumisa Jehova hi tshomba ya wena, i mavele yo ranga ya pfuno wa wena: [9]

¹⁰Kasi magomba ya wena ma ta tala, i mapipa ya wena ma ta tala hi vinya giswa.

¹¹Nwananga, u nga kanyisi kulaya ka Jehova, nga tsanwiswi hi kukawuka kakwe: [10]

¹²Hakuva loyi Jehova a mu ranzako, wa mu kawuka, hwatsi hi dadani a tsayisako nʼwana loyi a mu ranzako.

¹³I katekile munhu loyi a kumako wutlhari, i loyi a kumako kupimisisa.

¹⁴Hakuva a ku bhinzula zona ka hunza a ku bhinzula siliva, i bhinzu ga zona gi hunza bhinzu ga nzalama.

¹⁵Gi hunza makoral hi lisima, ontlhe lezi zi ku navelako a zi ringani na gona.

¹⁶A kuleha ka masiku ku le canjeni ga gona ga xinene, canjeni ga gona ga xibhabha ku na ni kupima ni wudzunzo.

¹⁷A tindlela ta gona tindlela ti tsakisako, i tisoko ta gona ti tele hi kurula.

¹⁸I sinya ya wutomi ka lava va gi kumako, katekile loyi a gi hlayisako.

¹⁹Hi wutlhari Jehova i lo yimisa misava, i kupimisisa i lo yimisa matilo.

²⁰Hi wutivi gakwe a mati ya le kueteni ma lo phuxuka, i marefu ma wisa nzhokati.

²¹Nwananga, u nga vumeli lezi zilo zi nwalala mahlweni ya wena, layisa wutlhari gi tiyileko ni kupimisisa.

²²Zonake zi tava wutomi ga muhefemulo wa wena, i zimanimani ka nhamu ya wena.

²³Zonake u ta famba na u tiyile ndleleni ya wena, i nenge wa wena cima wu nga ta khunguvanyeka.

²⁴Loku uya kuetleleni cima u nga ta chava, na, u ta etlela, ni wurongo ga wena gi ta nanziha.

²⁵U nga dzukiswi hi chawo wa xitshuketi, e hambu kuhlokiswa ka vakubiha laha ku ta ngata.

²⁶Hakuva Jehova i tava kutsumba ka wena, ta ponisa a nenge wa wena lo tlhanwini.

²⁷U nga ali ni xivuno xa wena ka loyi a vumalako, oku zi hi ntanwini wa wena lezaku u zi maha.

²⁸U nga wuli ka muakelane wa wena uku: Famba u ta wuya kambe, zi ta ku nyika manziko! Kasi lezo lexi a xi lavako ka wena xi kona. [11]

²⁹U nga alakanyeli kubiha hi muakelane wa wena, oku a tsumba lezaku i tshamile hi kurula ka wena.

³⁰U nga holovi ni munhu mahala, oku yena a nga ku gohelangi nchumu.

³¹U nga naveli a munhu wa lunya, nga hlawuli ni yinwe ya tindlela takwe.

³²Hakuva a wakubiha manyala ka Jehova, anilezi i xaka ga valulamileko.

³³A xiruko xa Jehova xi lomu ndlwini ya vakubiha, anilezi yena wa katekisa wuakelo ga valulamileko. [12]

³⁴Hizinene wa tseketsela vatseketseli, anilezi wa nyika tipswalo ka lava va ti koramisako. [13]

³⁵A titlhari ti taga tshomba ya wu dzunzo, anilezi a zipumbu zi ta wiswa ti-nganeni.