Read tshwa Mavingu 4 Bible Online

Mavingu 4 - tshwa bible

Mavingu 4

¹Vanana, ingisani a gonziselelo ya dadani, u yi pangamela kasi ma fela ku zwisisa.

²Hakuva nzi mu nyika a gonzo yi nene, u nga tsiki a gonziselelo ya mina.

³Hakuva mina nzi wa hi nʼwana dadani, nʼwana a nga yece a ranzekako ka mamani;

⁴Dadani i lo nzi gonzisa aku: mbilu ya wena a yi namarele timhakeni ta mina; layisa zileletelo za mina u ta hanya. [14]

⁵Hlota wutlhari ni kupimisisa, nga rivali timhaka ta nomu wa mina, u nga ti tsiki.

⁶U nga tsiki wutlhari, gi ta ku hlayisa, i ranze, gi ta ku hanyisa.

⁷A wutlhari xilo xo ranga, gi lave; ava kupimisisa hi zontlhe lezi u nga nazo.

⁸Gi kulise, gi ta ku kulisa; oku u gi angarela gi ta ku nehela wudzunzo.

⁹Gi ta bombisa a hloko ya wena hi wumbhuri, i ta ku ambexa xidlodlo xa wudumo.

¹⁰Ingisa nwananga, u amukela timhaka ta mina, malembe ya kuhanya ka wena ma tava manyingi.

¹¹Nzi ku gonzisa tindlela ta wutlhari, zi ku fambisa hi tisoko ta nongameto.

¹²Laha wena na u famba, cima a milenge ya wena yi nga ta khunguvanyeka, i loku u tsutsuma cima u nga ta khubeka.

¹³Khomisisa a gonziselelo, u nga yi tsiki; i hlayise, hakuva hi yona wutomi ga wena.

¹⁴U nga engheni tisokweni ta vakubiha, nga fambi ndleleni ya vabihileko.

¹⁵Yi potse, u nga hunzi hi ka yona, otsoloka, u hunza.

¹⁶Hakuva cima a va etleli loku va nga se maha kubiha, i wurongo cima a giti loku va nga se wisa munhu.

¹⁷Hakuva a kubiha xibaba lexi va gako xona, anwa vinya ga tihanyi.

¹⁸Kanilezi a ndlela ya valulamileko yi kotisa kuwonekela ka mixo, oku ku enzelekako kala a hlikanhi wu mbhelela.

¹⁹A ndlela ya vaonhi yi fana ni munyama, va xi tivi lexi xi va khubekisako.

²⁰Nwananga, ingisisa timhaka ta mina; emba ndleve ya wena kuwulawuleni ka mina.

²¹Ti nga suki mahlweni ya wena, i hlayise xikari ka mbilu ya wena.

²²Hakuva tona mbutomi ni ka wihi loyi a ti kumako, i hi muri mirini wakwe wontihe.

²³Hlayisa mbilu ya wena ku hunza zontlhe, akuva yona i hlowo ya wutomi.

²⁴U ngavi na nomu wa zidomudomu, milomu yi kanganyisako a yive kule na wena.

²⁵A mahlo ya wena ngha ma cuwuka hi kutshonometa, i tisiyi ta wena ti kongoma mahlweni ka wena.

²⁶Alakanya a ndlela ya milenge ya wena, tindlela ta wena tontlhe a ti tiyiswe.

²⁷U nga hunzulukeli xinenesii hambu xibhabheni, umesa konzo wa wena kubiheni. [15]