Read tshwa Mavingu 7 Bible Online

Mavingu 7 - tshwa bible

Mavingu 7

¹Nwananga, hlayisa timhaka ta mina, veketela zileletelo za mina mbilwini ya wena.

²Hlayisa zilayelo za mina, u ta hanya; hlayisa a nayo wa mina kukotisa a nzololwani ya tihlo ga wena.

³Zi bohe titihweni ta wena, zi tsala hehla ka mbilu ya wena. [20]

⁴Wula ka wutlhari, uku: Wena u makweru; i kupimisisa u ku vitana lezaku i nakuloni:

⁵Kasi za ku ponisa ka wasati wa xibhayi; ka sati wa muakelane loyi a xengetelako hi timhaka takwe.

⁶Hakuva laha njhaneleni ya yindlu ya mina, zi lo cuwuka hi lomu ka mavanga ya yona,

⁷Nzi lo wona xikari ka zipumbu, zi langutisisa xikari ka lava vaswa, jaha legi gi nga hi hava kupimisisa,

⁸Na a famba hi ndlela, kusuhani ni gwitsi laha ku nga hi ni wasati loye, lo kongoma ndlwini yakwe,

⁹A xikhatini xa gambo, laha na gi ya kupeleni, i xikhatini xa munyama wa wusiku.

¹⁰Languta a wasati i lo mu khinga, a ambele zo ti kombisa lezaku xibhayi, ni mbilu ya wumbyori;

¹¹Wa guwa ni xikanikani, mikonzo yakwe cima a yi tshami ndlwini yakwe;

¹²Zalezo a wonekako lahandle, hi xikhanzakanya i le ndleleni, tshama a rinzela lomu mahanzakanyeni wontihe ya maruwa.

¹³Zonake i lo mu khoma a mu pswopswa, i nghohe yi nga hiko na tingana, aku kakwe:

¹⁴Nzi humesile muphahlelo wa kubonga, egi siku nzi tatisile zifungo za mina; [21]

¹⁵Hikwalaho nzi humile ku ku khinga, Zi ku lavile nguvu, makunu nzi ku kumile.

¹⁶Nzi andlele mubhedi wa mina hi tinguwo to saseka, i tinguwo ti lukilweko hi wukene ta le Gipite.

¹⁷Nzi nwatsekele mafura ya mure mubhedini wa mina, i aloese, ni kinamona.

¹⁸Tana hi ta ti tsakisa hi liranzo kala gica, hi ti tsakise wutsumbu ga hina, hi ranzana.

¹⁹Hakuva a nuna wa mina a nga kona, enzele kule.

²⁰I fambile ni nkwama wa mali, ta wuya kaya loku a hweti yi tala.

²¹Lezo wa mu kanganyisa hi timhaka takwe to tala, i milomu yakwe yo xengetela wa mu kurumeta.

²²Zalezo wa mu lanzela, ukotisa a homu yi yako kutlhabyiweni, hwatsi xipumbu xi yako kutsayisweni;

²³Kala ligalala li tlhava xivinzi xakwe, ukotisa xinyanyani xi tsutsumelako ku wela tlhanwini, a xi nga zi tivi lezaku wu ta lovisa wutomi ga xona.

²⁴Hikwalaho, vana vanga, nzi ingiseni, uzwa a timhaka ta nomu wa mina.

²⁵A timbilu ta nwina ngha ti nga kokiwi hi tindlela takwe, u nga pengi mu lanzela tisoko takwe.

²⁶Hakuva vanyingi a nga va lamata vawa lahasi, na, xidlemo xa hombe a nga xi lovisa.

²⁷A yindlu yakwe i ndlela yi yako Xeole, i kongomako tindlwini ta kufa.