Read tshwa Mavingu 9 Bible Online

Mavingu 9 - tshwa bible

Mavingu 9

¹A wutlhari gi akile a yindlu ya gona, i vatlile timhanze ta gona ta ntlhanu ni timbiri.

²Gi tlhavile tihomu ta gona, gi kamile vinya; i longisile a meza ya gona.

³Gi rumile malanza ya gona ya xisati, i yimile matshanwini yo tlakuka ya muti gi vitana, giku:

⁴Ni wihi loyi a nga xipumbu a ate laha ka loyi a nga hiko na kupimisisa, giku:

⁵Ngonani mu taga zakuga za mina, wanani a vinya legi nzi gi kamileko.

⁶Tsikani wupumbu, mu ta hanya: ambani hi ndlela ya kupimisisa.

⁷Loyi a lulekako mutseketseli i ti lavela tingana, i loyi a kawukako wakubiha i ti vangela a bawa.

⁸U nga luleki mutseketseli ha kuva a nga ku venga: awuka a tlhari, yi ta ku ranza.

⁹Gonzisa a tlhari, yi ta tlhariha nguvu; onzisa a munhu a lulamileko, i ta enzeleka gonzweni yakwe.

¹⁰A masangulo ya wutlhari hi ku chava Jehova; i ku tiva Loyi a Basileko, kupimisisa.

¹¹Hakuva a masiku ya wena ma enzelekiswa ha mina, i malembe ya wutomi ga wena ma ta engetelwa.

¹²Loku u tlhariha, u ta vuneka hi wutlhari ga wena, anilezi loku u tseketsela, hi wena wece u ta nga ku rwala.

¹³A wasati wa xipumbu i na ni guwa; nga tlharihangi, a nga tivi nchumu.

¹⁴Hakuva i tshama laha nyangweni ya yindlu yakwe, aha xitshanwini, matshanwini yo tlakuka ya muti,

¹⁵A vitana lava va hunzako, ava va ti fambelako hi ndlela yabye, aku:

¹⁶Loyi a nga xipumbu a ate laha! i ka loyi a nga hiko na kupimisisa, aku kakwe:

¹⁷A mati ma yibyilweko ma nanziha, i xibaba xi giwako kufihlaleni xa tsakisa.

¹⁸Kanilezi a nga zi tivi lezaku a vakufa va laho, i lezaku lava a va rambileko va lomu nzeni ka Xeole.