Read tshwa Mutshawuteli 2 Bible Online

Mutshawuteli 2 - tshwa bible

Mutshawuteli 2

¹Nzite mbilwini ya mina: Ngone, nzi ta ku ringa hi kutsaka, ti buzise hi litsako; kanilezi, languta, lezi kambe zi wa nga nyawuli. [3]

²Nzite: A ku hleka kuhunguka; Niku: A kutsaka ku vuna yini ke?

³Nzi lo ehleketa mbilwini ya mina a kuva nzi tsakisa a miri wa mina hi vinya—kanilezi a mbilu ya mina na yi tira hi wutlhari—zinwe ni ku khomisisa wupumbu, kala nzi wona lezi zi sasekelako vana va vanhu, a kuva va maha zona lahasi ka tilo a masiku wontihe ya kuhanya kabye.

⁴Nzi ti mahele mitiro ya hombe; nzi lo ti akela tiyindlu, ni ku ti byalela zivina. [4]

⁵Nzi lo ti mahela masimu ni masimu ya mihanzu; nzi byala tisinya ta mihanzu ya tixakaxaka.

⁶Nzi lo ti mahela mativa ya mati yo cheletela tisinya leti ti milako.

⁷Nzi lo xava tikhumbi ta xinuna ni ta xisati, ku belekiwa malanza ndlwini ya mina; nzi lo fuya mitlhambi ya hombe ya tihomu ni tiyivu ku hunza vontlhe lava va nzi rangeleko le Jerusalema.

⁸Nzi lo hlengeletela siliva ni nzalama ni titshomba ta tihosi ni ta matiko; nzi ti lavela ziyimbeleli za xinuna ni za xisati, ni lezi zi tsakisako vanhu, va nga vasati laʼvanyingi. [5]

⁹Zonake nzi maha wa hombe, nzi hunza vontlhe lava va nga nzi rangele le Jerusalema; ni lezo a wutlhari ga mina gi lo simamisa zinwe na mina.

¹⁰Zontlhe lezi zi nga naveliwa hi mahlo ya mina, a nzi ma tsimbetelangi; a nzi alelangi mbilu ya mina ni lihi litsako; hakuva yi wa tsakela ntiro wontihe wa mina; lezo hi zona nzi nga bhinzula ntirweni wontihe wa mina.

¹¹Kanilezi laha nzi nga cuwukisa mitiro leyi a mandla ya mina ma yi mahileko, nzi alakanya a kukarateka loku nzi nga hi nako loku nzi yi maha, languta, zontlhe zi wa nga nyawuli, zi wa hi ku lanza mheho ntsena; ku wa nga hi na bhinzu lahasi ka gambo.

¹²Nzi lo hunzuluka nzi cuwukisa wutlhari, ni lihuhi, ni wupumbu; hakuva a munhu loyi a lanzelako hosi a nga maha yini, loku ku nga hi lezi zi mahilweko kale?

¹³Zonake nzi lo wona lezaku wutlhari gi hunza wupumbu, khwatsi hi lezi a kuwonekela ku hunzako munyama.

¹⁴A tlhari yi nani mahlo hlokweni yakwe, kanilezi a xipumbu xi famba munyameni; ahemba lezoke, nzi lo kuma lezaku hi wumbiri gabye va humelelwa hi xilo xinwe. [6]

¹⁵Zonake nziku mbilwini ya mina: Khwatsi hi lezi zi mahekako ka xipumbu, zi ta mahekawu ka mina; loku zi hi tano za nzi vuna yini ku xi tlula hi kutlhariha? Nzite mbilwini ya mina: Lezi na zonawu a zi nyawuli!

¹⁶Hakuva a tlhari ni xipumbu, hi wumbiri gabye a va alakanyiwi kala kupinzuka; a ka zikhati za ha tako zontlhe zi ta rivaliwa. A tlhari yifa kota xipumbu!

¹⁷Hikwalaho nzi lo venga kuhanya, hakuva nzi lo tsanwa hi lezi zi mahiwako lahasi ka gambo; zontlhe a zi nyawuli, hi ku lanza mheho ntsena.

¹⁸Ina, nzi lo venga a ntiro lowu nzi nga wu mahile laha hasi ka gambo; hakuva nzi fanele ku yi siyela loyi a tako nzhako ka mina.

¹⁹Himani a nga tivako loku inaloyi a tava tlhari kutani xipumbu ke? Kasi hi yena a ta nga fumela ntiro wontihe wa mina lowu nzi ti karatileko ha wona, nzi kombisa ha wona wutlhari ga mina lahasi ka gambo. Lezo na zonawu a zi nyawuli.

²⁰Lezo a mbilu ya mina yi lo sangula ku mbhela ntamu hi ntiro lowu nzi nga ti karatileko ha wona lahasi ka gambo.

²¹Hakuva hambu loku munhu a mahile a ntiro wakwe hi wutlhari ni wutivi ni kupinyama, i ta wu siyela munhu loyi a kalako a nga ti karatangi nchumu. Lezo na zonawu a zi nyawuli, kambe zi bihile nguvu.

²²Hakuva munhu i bhinzula yini hi ntiro wakwe, ni kukarateka ka mbilu yakwe loku a ti karatako ha kona lahasi ka gambo?

²³Wontihe masiku yakwe nja kubayiseka, ni ku ti karata kakwe i hlomulo; ina, ni laha wusikwini a mbilu yakwe a yi humuli. Lezo kambe a zi nyawuli, [7]

²⁴Xi hava xilo xa chukwana ka munhu ku hunza lezaku aga, anwa, ni kuva a muhefemulo wakwe wu tsakela ntiro wakwe. Nzi lo wona lezaku lezo kambe zi humela canjeni ga Nungungulu;

²⁵Hakuva himani a zi kotako a kuga ni ku tsaka a handle ka yena?

²⁶Hakuva Nungungulu i nyika a wutlhari ni wutivi ni litsako ka munhu loyi a mu xalalisako; kanilezi a ka muonhi i mu nyika a ntiro wa ku hlengeletela ni ku wungeletela, kasi ku nyika loyi a xalalisako Nungungulu. Lezo kambe a zi nyawuli, hi ku lanza mheho ntsena.