Read tshwa Mutshawuteli 5 Bible Online

Mutshawuteli 5 - tshwa bible

Mutshawuteli 5

¹Hlayisa a konzo wa wena loku uya lomu ndlwini ya Nungungulu; a ku tshinela kasi ku ingisa ku sasekile ku hunza miphahlelo ya zipumbu, hakuva a zi zi tivi lezaku zi maha kubiha. [12]

²U nga hatlisisi a nomu wa wena, a mbilu ya wena ngha yi nga hatlisi ku wulawula mahlweni ka Nungungulu. Nungungulu i le tilweni, wena u laha misaveni; hikwalaho ngha timhaka ta wena tive titsongwani.

³Khwatsi hi miloro yi humako wunyingini ga timhaka, hilezo a gezu ga xipumbu gi tibyiwa hi kuwulawula ko tala.

⁴Loku u maha xifungo ka Nungungulu, u nga hlweli ku xi tatisa, hakuva yena cima a nga tsakiswi hi zipumbu; tatisa xifungo xa wena. [13]

⁵I chukwana lezaku u nga fungi, ku hunza ku maha xifungo u nga xi tatisi.

⁶U nga vumeli nomu wa wena wu yisa miri wa wena kuonheni, ge hambu ku wula mahlweni ka ntsumi wa Nungungulu lezaku u lo hoxisa. Hikuyini Nungungulu a ta nga zangarela a gezu ga wena; a onha a mitiro ya wena ke?

⁷Hakuva a wunyingini ga miloro ni lezi zi nga nyawuliko ku kona timhaka to tala. Kanilezi wena, chava Nungungulu.

⁸Loku u wona kutsimbeketwa ka zisiwana ni kuhambunyetwa ka milayo lomu tikweni, lezo ngha zi nga ku hlamalisi; hakuva loyi a tlakukileko wa cuwukiwa hi loyi a mu hunzako, ni hehla ka vona vontlhe ku na ni vanwani va tlakukileko nguvu.

⁹Ku sasekele a tiko loku gi hi ni hosi leyi yi ti karatako hi mitiro ya masimu.

¹⁰Loyi a ranzako mali a nga kolwi hi mali, Ni loyi a ranzako kufuma a uga kolwi hi bhinzu. Lezo kambe a zi nyawuli. [14]

¹¹Loku a tshomba yi anza, ni vagi va yona va anzawu; loku zi hi tano, zi vuna yini a nwinyi wa yona, loku ku nga hi ku yi cuwuka hi mahlo ntsena?

¹²A wurongo ga munhu loyi a tirako ga nanziha, hambu loku aga nguvu kutani ku tsongwani; kanilezi a kuxura ka a fumileko a ku mu nyiki wurongo.

¹³Ku kona a kubiha ka hombe nzi ku wonileko lahasi ka gambo, hi lezaku a tshomba yi vekilweko hi nwinyi yi ngava khombo gakwe.

¹⁴A tshomba leyi yi lahleka hi khombo go kari; kasi loku a pswala nʼwana a nga hi na nchumu canjeni gakwe. [15]

¹⁵Khwatsi hilezi a nga huma rumbyini ga nyine na a hi ximbyiri, i ta tlhelisa zalezo, cima a nga ta teka nchumu xa ntiro wakwe a suka naxo.

¹⁶Kambe kubiha ka hombe, lezaku i tlhelisa lezi a nga tisa zona; i bhinzu muni a nga nago hi ku tirela mheho ke?

¹⁷Ni ka masiku wontihe yakwe i gela munyameni; na a hi ni hlomulo wa hombe, ni kubayiseka ni zanga.

¹⁸Nzi wonile lezaku zi sasekile a kuva munhu aga, anwa, a ti buzisa hi zontlhe lezi a zi tirileko lahasi ka gambo a masiku wontihe lawa Nungungulu a mu nyikileko wona; hakuva lexo hi xona xiavelo xakwe.

¹⁹Loku Nungungulu a nyikile munhu wukosi ni titshomba, a mu vumela a ku ziga, ni ku ti tekela xiavelo xakwe, ni ku tsakela ntiro wakwe, lexo xinyikiwo xa Nungungulu.

²⁰Hakuva a nga ta alakanya nguvu a masiku ya kuhanya kakwe, hakuva Nungungulu i mu hlamula hi ku tsakisa mbilu yakwe.