Read tshwa Mutshawuteli 9 Bible Online

Mutshawuteli 9 - tshwa bible

Mutshawuteli 9

¹Zontlhe lezi nzi zi ehleketile mbilwini, nzi zi hlotisisa, lezaku lava va lulamileko ni lava va tlharihileko, zinwe ni mitiro yabye, va lomu canjeni ga Nungungulu; a va zi tivi lezi zi nga mahlweni kabye, kutani liranzo hambu livengo.

²Zontlhe zilo zi humelela ka vontlhe hi ndlela yinwe; xiavelo xinwe xi nyikiwa loyi a lulamileko ni wa kubiha, loyi a nga nene ni ku basa, ni loyi a nga basangiko, loyi a phahlelako ni loyi a nga phahleliko. Leyi a nga nene i ringana ni muonhi, loyi a hlambanyako i fanana ni loyi a chavako ku hlambanya. [22]

³Loku hi kubiha xikari ka zilo zontlhe zi mahiwako lahasi ka gambo, hi lezaku xilo xinwe xi humela vontlhe. Ina, a timbilu ta vana va vanhu ti tele hi kubiha, a wuhunguki gi lomu timbilwini tabye kuhanyeni kabye; anzhako ka lezo vaya ka vafileko.

⁴Loyi a nga xikari ka vahanyako i na ni kutsumba, hakuva a mbyana yi hanyako yi hunza a nghala yi fileko.

⁵A vahanyako va zi tiva lezaku va tafa, kanilezi a vafileko a va tivi nchumu, ge, kuva ni nchachazelo, hakuva a va ha alakanyiwi.

⁶A liranzo labye, ni livengo labye, ni wukhuxu gabye, zi fuvile; cima a va hi na xiavelo ni ka xihi xilo xi mahiwako lahasi ka gambo.

⁷Famba, u yaga kuga ka wena hi kutsaka, unwa vinya ga wena hi mbilu yi tsakileko; hakuva Nungungulu i sina a amukele a mitiro ya wena. [23]

⁸A tinguwo ta wena ngha tiva leti ti basileko masiku wontihe, a hloko ya wena yi nga tshami yi nga hi na mafura.

⁹Hanya hi kutsaka ni sati loyi u mu ranzako wontihe a masiku ya wena ma nga nyawuliko, lawa yena a ku nyikileko lahasi ka gambo, a kuhanya ka wena kontlhe ku nga nyawuliko; hakuva lexo hi xona xiavelo xa wena a wutomini legi ga kukarateka lahasi ka gambo.

¹⁰Ni xihi lexi a canja ga wena gi xi tirako, xi mahe hi ntamu wa wena: hakuva a ku na ntiro, hambu makungo, ni kutiva, ge, hambu wutlhari le Xeoli lomu u yako kona. [24]

¹¹Nzi lo tlhela nzi wona lahasi ka gambo lezaku a kupalisaneni, a xitsutsumi a xi dawuli, a nhenha a yi hluli yimpini, a zakuga a zi lumbi lava vo tlhariha, a wukosi a hi ga lava va kupima, ni kudzunziwa a hi ka titlhari; hakuva vontlhe va chikelelwa hi xikhati, zi dzuka zi va humela.

¹²Hakuva munhu a nga xi tivi xikhati xakwe; khwatsi hi zidluwani zi phasiwako hi likoka, ni tinyanyani ti phasiwako hi tlhamu, hilezo ni vana va vanhu va phasiswako zona xikhatini xa kubiha, va welwa hi khombo hi xitshuketi. [25]

¹³Nzi lo wona ginwani wutlhari lahasi ka gambo, gi nzi hlamalisileko nguvu:

¹⁴Ku wa hi ni mufana wu tsongwani, wu nga hi ni vaaki va tsongwani; wu lo vukelwa hi hosi ya hombe, yi nga wu ranzela yi aka ligingisi la hombe lo wu bhiyela.

¹⁵Kanilezi lomu mutini ku wa hi ni tlhari ya xisiwana, leyi yi nga tlhatlhisa a muti lowo hi wutlhari ga yona; hambu zi hi tano, a nga alakanyiwi hi munhu.

¹⁶Zonake nzi te ngalo: A wutlhari gi nene ku hunza ntamu; ahembaloko, a wutlhari ga xisiwana ga kanyisiwa, ni timhaka takwe a ti ingisiwi hi munhu.

¹⁷A timhaka ta vatlharihileko leti ti wulawuliwako hi kurula, ta zwala ku hunza kubuwelela ka wahombe xikari ka zipumbu.

¹⁸A wutlhari ga vuna ku hunza matlhari, kanilezi a muonhi munwe wa onha wunene ginyingi.