Read tshwa Xizimba xa ka Solomoni 4 Bible Online

Xizimba xa ka Solomoni 4 - tshwa bible

Xizimba xa ka Solomoni 4

¹U sasekisile kuyini xiranzwa xanga! U sasekisile kuyini! A mahlo ya wena me khwatsi matuva lomu ka veli ya wena; Ni misisi ya wena yi khwatsi mitlhambi ya timhuti Leti ti mbambamelako xitsungeni xa Gileadi.

²A meno ya wena ma fanana ni tlhambi wa tiyivu ti kayilweko, Leti ti tako hi le kuhlaziweni; Tontlhe ti beiekileko mahahla, A ku na yinwe xikari ka tona yi nga nyumba.

³A milomu ya wena yi fanana ni tihinza ta xiwunguwungu, A nomu wa wena wu sasekile. A marama ya wena ma fanana ni xipanze xa pomegranada Lomu ka veli ya wena.

⁴A nhamu ya wena yi fanana ni khokhola ga Davida Legi gi akelweko matlhari, Laha ku hayekilweko kona 1,000 wa zitlhangu, Zontlhe na zi hi zitlhangu za tinhenha.

⁵A mavele ya wena me khwatsi timhutana timbiri, Ti nga mahahla ya mhuti, Leti ti gako xikari ka makonʼwa.

⁶Kala gica ni minzhuti yi nyamalala Nzi taya xitsungeni xa mure, Ni le gangeni ga makha.

⁷Xiranzwa xanga, u sasekile nguvu, A ku na bawa ni gitsongwani.

⁸Tana na mina hi suka Lebanoni, makoti wa mina, Suka na mina le Lebanoni. Relela hi le xixungweni xa Amana, Hi le xixungwe xa Senire na Hermoni, Hi lomu minkeleni ya tinghala ni lomu zitsungeni za tiyingwe. [1]

⁹Wena u wutlile a mbilu ya mina makweru wanga, makoti wa mina; U wutlile a mbilu ya mina hi ku nzi wonisa xipswati, Hi ketani yinwe ya nhamu ya wena.

¹⁰Li nanzihisa kuyini a liranzo la wena, makweru wanga, makoti wa mina! A liranzo la wena li hunza vinya; Ni kunuhela ka mafura ya wena ku hunza tontlhe tixaka ta makha.

¹¹A milomu ya wena, makoti wanga, yi dona wulombe; A wulombe ni masi zi lahasi ka lirimi la wena; Ni kunuhela ka tinguwo ta wena ku khwatsi kunuhela ka Lebanoni. [2]

¹²Makweru, makoti wanga, i simu gi bhiyelweko; I xibuka xi valelweko, a hlowo yi tiyisilweko.

¹³A zimilwa za wena i simu ga tisinya ta mapomegranada, Ta mihanzu yo nanziha; A henna ni zibyalo za narda,

¹⁴A narda ni safroni, Kalamusi ni kinamoni, ni tontlhe tisinya ta hlakati; A mure ni alosi, ni mipepo yontlhe yo nuhela.

¹⁵U hlowo ya masimu, A xibuka xa mati ma khulungako, A congo wu humelako Lebanoni.

¹⁶Vuka, wena moya wa le Nwalungu, tana wena Dzonga! Pupuxa hehla ka simu ga mina, kasi a kunuhela ka gona ku ta zwala; A muranziwa wa mina a enghene sinwini gakwe, Aga mihanzu ya gona yo nanziha.