Read tshwa Xizimba xa ka Solomoni 5 Bible Online

Xizimba xa ka Solomoni 5 - tshwa bible

Xizimba xa ka Solomoni 5

¹Nzi enghenile sinwini ga mina, makweru wanga, makoti wa mina; Nzi wungeletele a mure wa mina ni mipepo ya mina; Nzi gile a zihahla za mina ni wulombe ga mina, Nzi nwile vinya ga mina ni masi. Ganani maxaka; nwanani, mu popiwa hi liranzo.

²Nzi wa etlele, kanilezi a mbilu ya mina na yi vukile; I gezu ga muranziwa a gongonzako, Aku: Nzi vululele, makweru, xiranzwa xanga, Tuva ga mina, a basileko wa mina; Hakuva a hloko ya mina yi tele hi nzhokati, A misisi ya mina yi tsakamile hi madona ya wusiku.

³Nzi tlhatlhile a tinguwo ta mina, nzi ta ti gohisa kuyini ke? Nzi hlazile mikonzo ya mina, nzi ta yi chakisisa kuyini ke?

⁴A muranziwa wa mina i lo enghenisa a woko gakwe hi laha moleni wa livati, Ni mbilu ya mina yi lo nyawukela yena.

⁵Nzi lo vuka nzi ya vululela muranziwa wa mina, A mandla ya mina na ma dona mure, Ni titiho ta mina ti lo xililika mure ku tsakamiswa xikhotso xa livati.

⁶Nzi lo vululela a muranziwa wa mina, Kanilezi i wa sina a sukile; A muhefemulo wa mina wu lo nyawutana loku a wulawulile na mina. Nzi lo mu lava, kanilezi a nzi mu kumangi; Nzi mu vitanile, kanilezi a nga nzi hlamulangi.

⁷A varinzeli lava va fambafambako lomu mutini va lo nzi kuma, Va lo nziba, va nzi bayisa; Ni vahlayisi va ligingisi va lo nzi tekela veli ya mina.

⁸Nza mu hlambanyisa, nwina vanhwana va Jerusalema, Loku mu kuma muranziwa wa mina, Mu ta mu byela lezaku nzi babya hi liranzo.

⁹Xini lexi a muranziwa wa wena a hunzako vanwani ha xona, O wena u sasekileko xikari ka vavasati? A munghana wa wena i hunza vanwani hi yini, Ko kala u hi leletela za kunghaho?

¹⁰A muranziwa wa mina i basile na pswhukile, Hi yena wo ranga xikari ka zana ga mazana.

¹¹A hloko yakwe yi fanana ni nzalama yi basileko, A misisi yakwe nja matsimbo, ya ntima khwatsi xikunguwa.

¹²A mahlo yakwe me khwatsi matuva loku ma hi le micongweni, Ma hlazilwe hi masi, na ma tshamile mbhirini ya congo.

¹³A marama yakwe ma fanana ni nzima ya mipepo, ni zitsangi zo nuhela; A milomu yakwe khwatsi makonʼwa ma donelako mure.

¹⁴A mandla yakwe ma fanana ni tiphera ta nzalama ti mehelweko tidayimani, A miri wakwe wu fanana ni timhonzo ta ndlovu, ti nameketilweko maribye ya safire.

¹⁵A milenge yakwe yi khwatsi timhanze ta maribye yo basa, Ti zimekilweko xikhatweni xa nzalama yo basa. A xiwumbeko xakwe i fanana ni Lebanoni, i sasekile ku fanana ni misedari.

¹⁶A nomu wakwe wu hunzelele ku nanziha; Ina, i sasekile nguvunguvu. I maha lezo muranziwa wa mina, hi yena munghana wa mina, O nwina vanhwana va Jerusalema.