Read tshwa Xizimba xa ka Solomoni 8 Bible Online

Xizimba xa ka Solomoni 8 - tshwa bible

Xizimba xa ka Solomoni 8

¹O, loku ku wo khwatsi u makweru, Loyi a anwileko a vele ga mamani! Laha na nzi nga kumana na wena lahandle, ngha nzi wa ta ku pswopswa; Ina, na nzi nga hi na xisolo.

²Ngha nzi ku heleketa, nzi ku neha ndlwini ya mamani, Kasi u wa ta nzi gonzisa; Ngha nzi wa ta ku nwisa a vinya go nanziha, Gi mahilweko hi nheme ya pomegranada wa mina.

³A woko ga xibhabha ngha gi hi hasi ka hloko ya mina, Ni woko gakwe ga xinene gi nzi wukarela.

⁴Nza mu hlambanyisa nwina vanhwana va Jerusalema, Mu nga khindlimuxi hambu ku vuxa liranzo Na li nga se ku zi ranza.

⁵Himani loyi a tako hi le xiwuleni, A khegeleko laha ka muranziwa wakwe? Nzi lo ku vuxa na u hi hasi ka sinya ya mamasa, Laho u belekelweko kona hi mamani wa wena, Kwalaho a ngazwa kubayiseka, a ku beleka.

⁶Nzi nameketa mbilwini ya wena kota xifungo, Khwatsi hi xifungo laha wokweni ga wena; Hakuva a liranzo li nani ntamu wo fanana ni wa kufa; Ni xiluse xi nonoha kukotisa Xeoli; A kuhisa ka xona ku khwatsi kuhisa ka nzilo, I langavi ga Jehova.

⁷A mati ya ku tala a ma na ku tima liranzo, Ge, hambu a ntalo a wu na ku li mbembisa; Hambu loku munhu a wa ta nyikela yontlhe tsomba ya yindlu yakwe hi kota ya liranzo I wa ta nyenyiwa futsi.

⁸Hi na ni makabyana tsongwani, Yena a nga se kuva na mavele; Hi ta maha yini ha yena A siku legi a ta nga wutiwa?

⁹Loku yena a wa hi ligingisi, Hi wa ta aka hehla kakwe a khokhola ga siliva; Ni loku yena a wa hi nyangwa Hi wa ta yi vala hi livati la tibakwa ta sedare.

¹⁰Nzi ligingisi, ni mavele ya mina ma fanana ni makhokhola ya lona, Hikwalaho kuwoneni kakwe nzi lo fanana ni loyi a kumileko kurula.

¹¹Solomoni i wa hi ni xivina le Baal-Hamoni, I lo nyikela xivina ka vahlayisi; Munwe ni munwani i lo humesela a mbanzo wa xona a 1,000 wa zipanze za siliva.

¹²A xivina xa mina nwinyi, nza xi hlayisa mina wutsumbu, Lezi za 1,000 za wena Solomoni, Ni vahlayisi va mihanzu va tava ni 200.

¹³Wena loyi u tshamako masinwini, A vanghana va wena va navela kuzwa gezu ga wena; Nzi mahe nzi gizwa!

¹⁴Suka, u tsutsuma, xiranzwa xanga, Kukotisa a pswele ga mhuti, kutani ximhutana, Hehla ka zitsunga za zibyalwa za kunuhela.