Read tshwa Isaya 1 Bible Online

Isaya 1 - tshwa bible

Isaya 1

¹A miwoniso ya Isaya, a nʼwana Amozi, leyi a nga yi wona xungetano na Juda ni Jerusalema a masikwini ya Uzzia, Jotamu, Ahazi, na Hezekia, a tihosi ta ka Juda.

²Zwana, o matilo; kangatela ndleve, o misava! hakuva Jehova wa wulawula, aku: Nzi wundlile vana, nzi va kulisile, kanilezi vona va nzi hluwukile. [1]

³A homu ya tiva a nwinyi wa yona, ni mbongola ya tiva a xigowolo xa nwinyi wa yona, kanilezi Israeli a nga tivi nchumu, a vanhu va mina a va pimi nchumu.

⁴Khombo ka wena tiko ga vaonhi, nwina vanhu va teleko hi kugoha, pswalo wa vamahi va kubiha, vana va kuhunguka; mu tsikile Jehova, mu kanyisa a Wakubasa wa ka Israeli, mu tlhelela nzhako.

⁵Hi yini mu ta nga nonohisa mu biwa, hi ku anzisa a kuhluwuka ka nwina? A hloko yontlhe ya babya, a mbilu yontlhe yi bayiseka.

⁶Ku sukela mikonzweni kala hlokweni a gi kona wutshamu gi hanyako, saseka timbanga ni majuku ni timbirimbi ti bolileko; a ti hlaziwangi hambu ku bohelelwa, kutani ku oloviswa hi mafura.

⁷A tiko ga nwina gi hahlukile, a miti ya nwina yi hisilwe hi nzilo; a misava ya nwina yi giwa hi vamatiko a kuwoneni ka nwina; yi mahile xiwula khwatsi hi loku yi phangilwe hi valala.

⁸Ku sele ntsena a nhanyana wa Zioni khwatsi xikupe le xivineni, khwatsi i xaxa le sinwini ga mariwa, khwatsi i muti wu vimbezelweko.

⁹Loku Jehova wa tiyimpi a wa nga hi siyelangi misalela, ngha hi wa kotile Sodoma, hi fanana na Gomora. [2]

¹⁰Zwanani mhaka ya ka Jehova nwina vafumeli va Sodoma; ingisani nayo wa Nungungulu wa hina, nwina vanhu va Gomora.

¹¹Yi nzi vuna yini a miphahlo ya nwina yo tala ke? ku wula Jehova. Nzi kolilwe hi minyikelo ya kuhiswa ya timhamba, ni mafura ya marole yo kuluka; a nzi xalaliswi hi nkhata wa tikuzi, ni wa tiyivana ni timhongo. [3]

¹²Laha na muta mahlweni ka mina, himani a mu rumileko a ku kanzihela a tihubye ta mina ke?

¹³Mu nga ha nzi neheli minyikelo yi nga nyawuliko; a libani li hi manyalataniso ka mina. Nzi nyenya a mibuzo ya hweti yiswa, ni ya masabado, ni tihlengeletano; nza venga ku wona kuonha tihlengeletanweni ti basileko.

¹⁴A muhefemulo wa mina wa venga a mibuzo ya nwina ya hweti yiswa ni mibuzo ya hombe; za nzi tikela, nzi karele hi ku zi rwala.

¹⁵Loku mu tlakusela mandla ya nwina ka mina, nzi ta ti vala mahlo; ni loku mu anzisa mikombelo, nzi nga ta yi ingisela, hakuva a mandla ya nwina ma tele hi nkhata.

¹⁶Hlambani, mu ti basisa; susani mitiro ya nwina yo biha mahlweni ka mina; tsikani ku maha kubiha.

¹⁷Gonzani ku maha zinene; hlotani nongameto, mu tsimbetela a mutsimbeketi; yimelani lava va nga hiko na vapswali, mu lwela tinoni. [4]

¹⁸Tanani, hi wulawulisana timhaka, ku wula Jehova. Hambu loku zionho za nwina zi pswhukile, zi nga basa khwatsi i gapongo; hambu loku zi pswhukisile ku zirila, zi nga ku khwatsi i woya go basa.

¹⁹Loku mu vumela ku ingisa, mu taga lezi zo nanziha za tiko;

²⁰kanilezi loku mu ala mu hluwuka, mu ta lobyisiwa hi supado; hakuva a nomu wa Jehova wu wulile lezo. [5]

²¹O, a muti wo tsumbeka wu hunzulukileko wu maha xibhayi! A muti wu nga tele hi nongameto! A kululama ku wa akile ka wona, makunu wu tele hi vadayi.

²²A siliva ya wena yi mahile manyelo, ni vinya ga wena gi chelilwe mati. [6]

²³A tihosana ta wena ti hluwukile, ti maha vanghana va makhamba. Vontlhe va ranza ku xavelelwa, va tsutsumela michachazelo. A va yimeli timhaka ta zisiwana, ni mhaka ya noni a yi chikeli ka vona. [7]

²⁴Hikwalaho a Hosi Jehova wa tiyimpi, a Nhenha ya ka Israeli, yiku: A, nzi tava ni zigingi hi lavava nzi vengako, nzi ti photela ka valala va mina.

²⁵Nzi ta tlhateka canja ga mina hehla ka wena, nzi hluta a manyelo ya wena, nzi humesa hi ka wena a xiketse xi nga basiswangiko.

²⁶Nzi ta ku tlhelisela a Valamuli vo fanana ni laʼvo ranga, ni manghanakana lawa ma fananako ni ya ku sangula. Zonake u ta vitanwa lezaku u muti wa kululama, a muti wu tsumbekileko.

²⁷Zioni i ta tlhatlhiswa hi nongameto, ni vahunzulukileko va gona hi kululama.

²⁸Kanilezi a vahambunyeti ni vaonhi va ta lobyiswa khatiginwe, ni lava va tsikako Jehova va tafa.

²⁹Hakuva va tava ni tingana hi kota ya tisinya ta mikuhlu leti mu nga tsaka ha tona, mu wiswa tingana hi kota ya masimu lawa mu ma ranzileko.

³⁰Hakuva mu ta fanana ni sinya ya nkuhlu leyi a matluka ya yona ma wutlako, mu ku khwatsi mu simu legi gi nga hiko na nzhongo.

³¹A nhenha yi ta ku khwatsi fufanyi, ni ntiro wa yona wu ta ku khwatsi i hlahle, hi wumbiri gabye va taswa zinwe, a nga kona a ta nga va timela.