Read tshwa Isaya 11 Bible Online

Isaya 11 - tshwa bible

Isaya 11

¹Lomu ka xibho xa Jese ku ta huma a hluke, Ni ximilwa xi ta huma hi le mitswini yakwe, xi pswala mihanzu.

²A Moya wa Jehova wu ta tshama hehla ka yena, A moya wa wutlhari ni kupima, A moya wa wusungukati ni wa ntamu. A moya wa ku tiva ni wa ku chava Jehova.

³I ta tsakela ku chava Jehova. A nga ta lamula hi lezi a mahlo yakwe ma zi wonako, Ge hambu ku kona hi kuzwa ka tindleve takwe.

⁴Kanilezi lava va vumalako i ta va lamula hi kululama, A tshanza hi nongameto timhakeni ta lava va tsimbeketilweko misaveni; I taba misava hi nhonga ya nomu wakwe, A lovisa vaonhi hi moya wa nomu wakwe. [32]

⁵A kululama ku tava lifunga la xiwunu xa yena, Ni kukholeka ku tava bhandi gakwe.

⁶Zonake a hlolwa gi ta tshama ni yivana, A yingwe yi ta etlela zinwe ni ximhutana; A role ni xinghalana ni homu yi nonileko zi ta zwanana, Zi risiwa hi nwanana tsongwani.

⁷A pswele ga homu gi taga zinwe ni ga urso, A marole ya zona ma ta etlela zinwe; A nghala yi taga byanyi khwatsi i homu.

⁸A xihlangi xa ha anwako xi ta hlakanela nkeleni wa vuwumati, Ni xinwanana xi Rumilweko xi ta henya a mahlo ya xihihigani.

⁹A xitsungeni xontlhe xa mina xa kubasa ku nga ta gohiwa nchumu hambu ku onhiwa, Hakuva ku tiva Jehova ku tava ku enetile misava, Khwatsi hi lezi a mati ma fenengetiieko a kueta ka bimbi.

¹⁰Masikwini lawo ku tava kona a ximilwa mutswini wa ka Jese, lexi a matiko ma ta nga yimiselwa khwatsi i nghapa; a vamatiko va ta mu lava, ni wuhumulelo gakwe gi ta ngangamela. [33]

¹¹A xikhatini lexo a Hosi yi ta engeta yi nawuluta a canja ga yona, kasi ku hlanguta a misalela ya vanhu va yona, lava va seleko Assiria, ni le Gipite, ni le Patrosi, ni le Kuxe, ni le Elame, ni le Xinari, ni le Hamate, ni lomu zihlaleni za bimbi.

¹²A matiko yi ta ma yimisela a nghapa, Yi tsombanyisa lava va hlongolweko va ka Israeli, Ni ku tlhanganyisa lava va hangalakileko va ka Juda, Va suka matlhelweni ya mune ya misava. [34]

¹³A wukhuxu ga ka Efraime kambe gi ta mbhela, Ni valala va Juda va ta lobyiswa; Efraime a nga ha tava na wu khuxu ha Juda, Na Juda a nga ta hlokisa Efraime.

¹⁴Kanilezi va ta purumela makatleni ya maFilistia le Muhlwa-gambo, Va ta hlasela zinwe a vana va Mutsuwuka-gambo; Va ta khoma Edome na Moabi, Ni vana va Amoni va ta va ingisa.

¹⁵Jehova i ta womisa a ravi ga bimbi ga Gipite, I ta tlakusa a canja gakwe hehla ka Eufrate, A wu panza wu maha ntlhanu wa micongwana ni mimbiri, Lezaku vanhu va tlhatuka na va hi ni zilato.

¹⁶Ku tava kona a gonzo lomo ga misalela ya vanhu vakwe, Lava va ta nga sala le Assiria; Khwatsi hi legi gi nga wa hi kona A sikwini legi Israeli a nga huma hi le Gipite.