Read tshwa Isaya 14 Bible Online

Isaya 14 - tshwa bible

Isaya 14

¹Hakuva Jehova i ta hawukela Jakobe, a ti langela Israeli, a va akisa tikweni gabye. A valuveli va ta tlhanganyiswa zinwe navo, va namarela ka yindlu ya Jakobe.

²A vamatiko va ta va teka, va va yisa kaya kabye; kanilezi a yindlu ya ka Israeli yi ta va fumela lomu tikweni ga ka Jehova, va maha malanza ya xinuna ni ya xisati. Va ta mahiwa tikhumbi hi lava va nga hi tikhumbi tabye, va fumela lava va nga va xanisa.

³A sikwini lego Jehova a ta nga mu humuta kuxanisekeni ka nwina ni kuchava, ni ka mikhinyavezo leyi mu nga hlokiswa hi yona,

⁴Mu ta sima a lisimu leli la ku tseketsela hosi ya le Babuloni, muku: A mutsimbeketi i gumelwe kwihi, ni muti wa nzalama wu mbelelisile kuyini!

⁵Jehova i tshovile a xigomba xa vakubiha, ni nhonga ya wuhosi ya vafumeli,

⁶Leyi yi ngaba vanhu yi nga va nyiki xikhati, A nhonga leyi yi nga fumela matiko hi zanga ni zixaniso, A nga hi kona loye a mu beletelako.

⁷Makunu a misava yontlhe yi le kuruleni, va tlhava zizimba za kutsaka.

⁸A tisinya ta kipres ta ku tseketsela, Ni tisedare ta Lebanoni tiku: Cima ka lezo u nga wisilwe a nga kona a tako ku ta hi tsema.

⁹A Xeoli lahasi xi ni nghitsinghitsi ya ku tlhangana na wena, Xi ku vuxela a vafileko ni vahombe vontlhe va misava; Xi mahile tontlhe tihosi ta matiko ti suka xitshanwini za tona za wuhosi.

¹⁰Vontlhelele va taku ka wena; Kasi na wenawu u gumelwe khwatsi hi hina ke? kasi wenawu u fanana na hina!

¹¹A wukosi ga wena gi hoxilwe le Xeoli zinwe ni guwa ga timbila ta wena, A kubola i sango ga wena, ni ziwungwani xifenengeto xa wena.

¹²U wisile kuyini hi le tilweni, wena mahlahle wa mixo, U wisisilwe kuyini lahasi, wena loyi u wisileko matiko.

¹³Hakuva a mbilwini ya wena u waku: Nzi ta kanziha tilweni, Nzi ta tlakusa xitshamu xa mina xa wuhosi hehla ka tinyeleti ta Nungungulu; Nzi ta tshama xitsungeni xa hlengeletano hi tlhelo ga Nwalungu.

¹⁴Nzi ta kanziha hehla ka marefu, Nzi ti maha nzi fanana ni loyi a Hunzeleleko-kutlakuka.

¹⁵Kasi lezo u ta wiselwa le Xeoli, lomu kueteni ka nkele.

¹⁶Lava va ku wonako, va ta ku cuwukisisa, vaku: Hi yena munhu loyi a nga maha misava yi rurumela, A tsekatsekisa mifumo ke?

¹⁷Hi yena a nga maha tiko giva xiwula, a khungumulela miti ya gona, A nga tlhatlhi tiperesu takwe, lezaku ti tlhelela kaya.

¹⁸Tihosi tontlhelele ta matiko Ti etlele ni wudzunzo yinwe ni yinwani ndlwini ya yona,

¹⁹Kanilezi wena u hoxilwe kule ni xilahla xa wena khwatsi i ravi gi nga vuniko nchumu, A nguwo ya wena hi lava va delweko, va tlhabyilweko hi supado, Lava va hoxilweko maribyeni ya rinzi, khwatsi hi xirumbi xi kanzihelweko lahasi.

²⁰Wena u nga ta lahliwa zinwe na vona, Hakuva u hahlule tiko ga wena, u dele vanhu va wena. A pswalo wa vamahi va kubiha wu nga ta ha kumbukiwa.

²¹Hihiritani a vanana vakwe hi kota ya kuhambunyeta ka vararu vabye, Kasi va nga vuki va fumela misava, Hambu ku tata tiko hi miti yabye.

²²Mina nzi ta va vukela, ku wula Jehova wa tiyimpi, nzi ta fuvisa a vito ga Babuloni ni misalela ya kona, a vana ni vazukulu, ku wula Jehova.

²³Nzi ta gi maha a wuakelo ga tinungu ni mativana ya mati yo bola, nzi ta gi swiyela hi swiyelo wa kulobyiswa, ku wula Jehova wa tiyimpi.

²⁴Jehova wa tiyimpi i hlambanyile, aku: Hizinene, zi ta maheka khwatsi hilezi nzi zi alakanyileko, Khwatsi hilezi nzi zi xuvileko, zi tava lezo.

²⁵Nzi ta tshova Assiria lomu tikweni ga mina, Nzi mu kanzihela hi mikonzo lomu zitsungeni za mina; Zonake va ta ruliwa muyoka wakwe, Ni nzhwalo wakwe wu susiwa makatleni yabye.

²⁶Lexi hi xikungo xi bohilweko ka misava yontlhe; Hi gona a canja gi nawulutilweko ka wontihe matiko.

²⁷Hakuva Jehova wa tiyimpi i zi xuvile, himani a ta nga zi thinda? Ni canja gakwe gi nawulutilwe, himani a ta nga gi tlhelisa? [38]

²⁸A xiprofeto lexi xi lo wuliwa hi lembe ga kufa ka Ahazi:

²⁹Wena tiko gontlhe ga Filistia u nga tsaki, Hikuva yi tshovekile a nhonga leyi yi nga kuba; Hakuva a mutswini wa nyoka ku ta huma xihihigani, Ni pswalo wa xona wu tava a nyoka yo tshisa yi hahako. [39]

³⁰A vanyakeke va ta xura, Ni vavumali va etlela hi kurula; Kanilezi nzi ta daya mutsu wa wena hi ndlala, Ni misalela ya wena yi ta lobyiswa.

³¹Kanyuluka, O nyangwa! Bana huwa, wena muti! Nyeka, wena tiko gontlhe ga Filistia; Hakuva ku huma musi hi le Nwalungu, Ku nga tava kona musali wa lenzhako yimpini ya valala.

³²Va ta hlamula yini ka mitsukano ya maFilistia? Va taku: Jehova i akile xiseketelo xa Zioni, A va tsimbeketilweko xikari ka vanhu vakwe va ta chavela kona.