Read tshwa Isaya 19 Bible Online

Isaya 19 - tshwa bible

Isaya 19

¹Langutani, Jehova i khilele hehla ka refu go hatlisa, A kongoma Gipite. A zifananiso za le Gipite zi ta rurumela mahlweni kakwe, Ni timbilu ta maGipite ti ta panzeka nzeni kabye.

²Nzi ta kucetela maGipite akuva ma vukela maGipite; Lezaku munhu alwa ni nakulobye, a muakelane a vukela mu-akelane-kulobye, A muti wu vukela muti, a mufumo wu vukela mufumo.

³A moya wa Gipite wu ta titivala nzeni kabye, Nzi ta hangalasa makungo yabye, Va ta tsutsumela zifananisweni ni ka vangoma, Ni lava va humesako mimoya ya vafileko ni vavumbi.

⁴Nzi ta nyikela maGipite mandleni ya hosi ya lunya; Va ta fumelwa hi hosi ya tihanyi, Ku wula Hosi Jehova wa tiyimpi.

⁵A mati ya bimbi ma tapswha. Ni mati ya congo ma ta koka, wu woma.

⁶A micongo yi ta cakacela, Ni mageva ya le Gipite ma ta kwengeka mapswa, A tihlanga ni xihuvani zi ta wuna.

⁷A wuriselo gi nga lomu mbhirini ya Nilo, Ni masimu ma byalilweko kusuhani ni Nilo Zi ta woma, zi lova, zi nga havi kona.

⁸A varingeli va zidluwani va ta rila, Vontlhe va hoxako zimemba lomu congweni va taba nkosi, Ni lava va hoxako tikoka lomu matini va tava ni gome.

⁹Lava va fufelako wukene ni lava va khatako tinguwo to basa, Va tava ni tingana.

¹⁰A timhanze leʼti tiyisako tiko ti ta tshoveka, Ni lava va tirelako mali va ta bayiseka moyeni.

¹¹A tihosana ta le Zoana zipumbu; A masungukati laʼyo tlhariha ya Faro ma hungukile. Mu wutisa kuyini ka Faro, muku: Nzi nʼwana wa titlhari, Nzi nʼwana wa tihosi ta kaleloko?

¹²Ti kwihi a titlhari ta wena ke? A va ku byele ka! loku va zi tiva Lezi Jehova wa tiyimpi a xuvileko xungetano ni Gipite.

¹³A tihosana ta le Zoana ti mahile zipumbu; A tihosana ta Nofe ti khohlisilwe, Gipite gi pengisilwe hi vanyapanze va tixaka ta gona.

¹⁴Jehova i va chelile a moya wa sululwani, Va mahile Gipite gi dedereka mitirweni ya gona yontlhe, Khwatsi hi munhu a popilweko a dederekako kuhlateni kakwe.

¹⁵Gipite gi nga ta humelela ni ka wihi ntiro Lowu wu mahiwako hi hloko, kutani hi nkila, Hambu a hi ravi ga cinzu, kutani a mbunga.

¹⁶A ka siku lego Gipite i ta fanana ni vavasati; i ta rurumela a chava a xibhakela xa Jehova wa tiyimpi xi tlakusiwako, xi va vukela.

¹⁷A tiko ga Juda gi ta chaviseka ka va le Gipite; vontlhe va ta nga byeliwa ha gona va ta rurumela, hi kota ya makungo ya Jehova wa tiyimpi xungetano na vona.

¹⁸A ka lego siku ku tava kona a ntlhanu wa miti le Gipite leyi yi ta nga wulawula a lirimi la Kanani, yi hlambanya hi vito ga Jehova wa tiyimpi; a munwe wu ta vitanwa lezaku i muti wa lobyiselelo.

¹⁹A ka xikhati lexo ku tava kona a ganzelo ga Jehova lomu xikari ka Gipite, ni le mbhinganweni ku ta yimiswa a mhinga leʼyi ta nga basiselwa Jehova.

²⁰Xi tava xikombiso ni wumboni ka Jehova wa tiyimpi lomu tikweni ga Gipite; hakuva va ta rila ka Jehova hi kota ya vatsimbeketi, na yena i ta va rumela a muhanyisi, a muyimeli, loyi a ta nga va tlhatlhisa.

²¹Na Jehova i ta tibyiwa le Gipite, a maGipite ma ta tiva Jehova a ka siku lego; va ta khozela hi miphahlelo ni minyikelo ya zakuga; ina, va ta funga zifungo ka Jehova, va zi tatisa.

²²Lezo Jehova i taba Gipite, i ta giba a tlhela a gi chuma; va ta hunzuluka ka Jehova, na yena i ta ingisa mikombelo yabye, a va chuma.

²³A ka siku lego ku tava kona a gonzo go suka hi le Gipite, giya Assiria; a maAssiria ma tata le Gipite, ni maGipite ma tata le Assiria; zonake a maGipite ma ta khozela Jehova zinwe ni maAssiria.

²⁴A ka siku lego Israeli i tava wa wunharu zinwe na Gipite na Assiria, kasi ava xikatekiso xikari ka misava.

²⁵Jehova wa tiyimpi i ta va katekisa, aku: Gi katekile a Gipite, a tiko ga mina, na Assiria a ntiro wa mandla ya mina, na Israeli a tshomba ya mina.