Read tshwa Isaya 2 Bible Online

Isaya 2 - tshwa bible

Isaya 2

¹A mhaka leyi Isaya, nʼwana Amozi, a nyikilweko yona xungetano na Juda na Jerusalema,

²A masikwini yo gumesa a xitsunga xa yindlu ya ka Jehova xi ta yimiswa le xixungweni xa zitsunga, yi tlakusiwa hehla ka zitsunga zinwani; wontihe matiko ma taya kona. [8]

³A matiko yo tala ma taya, ma yaku: Ngonani, a hi kanziheni hiya xitsungeni xa ka Jehova, a ndlwini ya Nungungulu wa Jakobe, i ta hi gonzisa a tindlela takwe; zonake hi ta famba mipfutleni yakwe. Hakuva a nayo wu ta huma hi le Zioni, ni mhaka ya Jehova yi ta huma hi le Jerusalema.

⁴I ta lamula xikari ka mifumo, a tsema timhaka ta matiko manyingi. Va ta tlomba tisupado tabye ti maha zikomu, hi matlhari yabye va ta fula mibhera. A tiko gi nga ha talwa ni ginwani, ge hambu a ku gonza kulwa. A siku ga Jehova.

⁵Yindlu ya Jakobe, ngonani hi famba kuwonekeleni ka Jehova!

⁶Jehova, u tsikile a vanhu va wena, a yindlu ya Jakobe, hakuva va tele hi mikhuwo ya le Mutsuwuka-gambo, zitumbe khwatsi maFilistia, va catana wunghana ni vamatiko.

⁷A tiko gabye gi tele hi siliva ni nzalama, a titshomba ta gona a ti mbheli; a tiko gabye gi tele hi mahaxi, ni tikareta tabye a ti mbheli.

⁸Kambe a tiko gabye gi tele hi zifananiso, va khozela a ntiro wa mandla yabye wutsumbu, lezi zi mahilweko hi titiho tabye.

⁹Hikwalaho a munhu wa nyalidede i ta koramiswa, ni munhu wa hombe i ta tsongahatwa; ngha u nga va tsetselela

¹⁰Enghena xitsungeni, u fihlala lomu tshurini, mahlweni ka kuchaviseka ka Jehova, ni kungangamela ka wukulu gakwe.

¹¹A mahlo ya matshanza ya munhu ma ta tsongahatwa, ni ku ti kukumukisa ka vanhu ku ta koramiswa; hi Jehova yece a ta nga kuliswa a ka siku lego.

¹²Hakuva gi tava kona a siku ga Jehova wa tiyimpi, ga ku tsongahata ha gona laʼva matshanza ni laʼva ti kukumukisako, ni wihi loyi a tlakusilweko i ta reletwa. [9]

¹³Gi tata hehla ka tontlhe tisedare ta le Lebanoni, leti to leha ni ti tlakukileko, ni mikuhlu yontlhe ya le Baxani,

¹⁴ni hehla ka zitsunga zontlhe zi tlakukileko, ni miganga yontlhe yi tlakukileko,

¹⁵ni hehla ka makhokhola wontihe ma tlakukileko, ni makhurisi wontihe ya ntamu,

¹⁶ni hehla ka wontihe mataru ya le Tarxixi, ni zontlhe lezi zi tsakisako mahlo.

¹⁷A kutikulisa ka vanhu ku ta tsongahatwa, ni kutikukumuxa ka vavanuna ku ta reletwa; hi Jehova yece a ta nga kulisiwa a ka siku lego.

¹⁸A zifananiso zi ta fuviswa bhi!

¹⁹A vanhu va ta tsutsumela timhakweni ta maribye, ni lomu minkeleni ya misava, hi ku chava Jehova ni kungangamela ka wukulu gakwe, laha a ta nga suka a chavisa misava.

²⁰A ka siku lego a vanhu va ta hoxa ka mabhonyani ni ka makhoha a zifananiso zabye za siliva ni za nzalama, lezi va nga ti mahela kasi ku zi khozela;

²¹loku va tsutsumela lomu timhakweni ta maribye ni mikovotlweni ya zitsunga, hi ku chava Jehova ni kungangamela ka wukulu gakwe, laha a ta nga suka a chavisa misava.

²²Hikwalaho mu nga ha tsumbi munhu loyi a nga ni kuhefemula ntsena tinhovini takwe; hakuva i vuna yini munhu ke?