Read tshwa Isaya 24 Bible Online

Isaya 24 - tshwa bible

Isaya 24

¹Langutani, Jehova wa maha misava yiva xiwula, wa yi hahlula; Wa hunzula xiyimo xa yona, a hangalasa vaaki va yona.

²A mupristi i ta fanana ni vanhu; A nwinyi i ta fanana ni nanza; A khosikazi i ta fanana ni nanza ga xisati; A muxavisi i ta fanana ni muxavi: A mulombisi i ta fanana ni mulombi; Ni mulonzi i ta fanana ni loyi a nga ni nanzu.

³A misava yi tava xiwula xo mbhelela, Yi ta gohiwa ku hunza mpimo; Hakuva Jehova i wulile gezu lego.

⁴A misava yi le nkosini, ya lova; A misava yi tsanwile, yi na ni gome; A vahombe va misava va vumala ntamu.

⁵Ni misava yi nyenyezisilwe hi vaaki va yona, Hakuva va hambunyetile milayo, va hunzule ziyimiso; Va tshova xivumelwano xa kala kupinzuka.

⁶Hikwalaho a nzhukano yi khadamule misava, Ni vaaki va yona va konekile. Hikwalaho a vaaki va misava va hisiwa, a hi vanyingi va seleko.

⁷A vinya giswa ga rila, a xivina xi hloka; Ni lava va nga tsaka va konya.

⁸A guwa ga zigubhu gi miyele, a guwa ga migiyo gi mbhelile; A litsako la xitende li gumesile.

⁹Va nga ta tlhava zizimba kunweni ka vinya, A byala gi ta bava ka laʼva gi nwako.

¹⁰A muti wa vilinganya wu hahlukile, A yindlu ni yindlu yi valilwe, ku nga engheni munhu.

¹¹Lomu maphangweni ku na ni woyonga go rila vinya. Kontlhe kutsaka ku phumisilwe; A mihlakano ya misava yi mbhelile.

¹²A mutini ku sala marumbi ntsena, Ni nyangwa ya wona yi panzekile.

¹³Zonake lomu misaveni xikari ka matiko, ku ta ku khwatsi ku jujiwa a sinya ya oliva, ni loku ku kutsuliwa a xivina.

¹⁴Va ta tlakusa magezu yabye, va yimbelela hi litsako hi kota ya wukulu ga Jehova, vaba huwa hi le bimbini.

¹⁵Dumisani Jehova le Mutsuwuka-gambo, ni lomu kukomama ni bimbi, khesani a vito ga Jehova, Nungungulu wa ka Israeli.

¹⁶Ku sukela magemeta-musi ya misava hi zwile zizimba, zi nge: A wudzunzo a ka loyi a lulamileko! Kanilezi mina nziku: Ku wonza ka mina, ku wonza ka mina! Khombo ka mina! A vakanganyisi va kanganyisa; ina, a vakanganyisi va kanganyisile nguvu.

¹⁷A kuchava, ni rinzi ni ziyo zi ku rinzele, wena muaki wa misava.

¹⁸Loyi a ta nga tsutsuma hi kota ya chawo, i ta wela rinzini; ni loyi a ta nga huma rinzini, i ta phasiswa hi ziyo. Hakuva a tinjhanela ta le hehla ti vululekile, ni ziseketelo za misava za tsekatseka. [51]

¹⁹A misava yi panzekile, a misava yi avanyekile; misava ya tsekatsekiswa;

²⁰a misava yi ta dedereka ku fanana ni xidakwa; yi ta hohloka ku fanana ni xaxa. Yi bhinziwa hi zihambunyeto za yona; yi tawa, yi nga ha vuki kambe.

²¹A ka siku lego Jehova i taba yimpi yi nga le hehla tilweni, ni tihosi ta misava laha misaveni.

²²Va ta tsomhanyiswa khwatsi hi tiperesu ti tsombanyiswako lomu rinzini, va valelwa lomu paxweni; anzhako ka masiku manyingi va ta tsayiswa.

²³Zonake a hweti yi tava ni tingana, ni gambo gi wiswa tingana; hakuva Jehova wa tiyimpi i ta fuma le xitsungeni xa Zioni ni le Jerusalema, ni masingalakati yakwe ma ta wona kungangamela kakwe.