Read tshwa Isaya 28 Bible Online

Isaya 28 - tshwa bible

Isaya 28

¹Khombo ka xidlodlo xa matshanza xa zidakwa za le Efraime, Ni ka xitsangi xi wunileko xi nga wubombi gabye, Xi nga le hehla ka nkova wu nonileko wa laʼva hluliwako hi vinya.

²Langutani, a Hosi ya ruma a nala a nga ni ntamu, ni wa ku tiya; Wata khwatsi hi bhubhutsa ga vula ya maralala, Kukotisa a ntalo wa mati ya hombe, lawa ma phandlulako kontlhe, I ta zi hoxa misaveni hi ntamu. [60]

³A xidlodlo xa matsanza xa zidakwa za ka Efraime Xi ta kanzihelwa hi mikonzo.

⁴Ni xitsangi xi wunileko xa wu mbhuri gakwe, Lexi xi nga le hehla ka nkova wu nonileko, Xi ta fanana ni nkuwu lowu wu rangelako ximumu, Lowu ange loku a muhunzi a wu wona a khaya a gi mita.

⁵A ka siku lego Jehova wa tiyimpi i tava xidlodlo xa wuhosi, Ni mubhodi wa wumbhuri a ka misalela ya tiko gakwe;

⁶I tava moya wa nongameto ka yena loyi a ta ngava mulamuli, Ni wunhenha ka lava va ta nga hlongola valala le nyangweni.

⁷Kanilezi laha kambe a vanhu va dedereka hi kota ya vinya, Va khunguvanyeka hi byala; A vapristi ni vaprofeti va dedereka hi byala, Va popilwe hi vinya, va dedereka hi byala; Va khuvatana loku va profeta ni ku maha wuwoyiwoyi kulamuleni.

⁸A timeza tontlhe ti tele hi mahlata ni chaka, Laha kaku a gi kona wutshamu gi basileko.

⁹Vaku: I ta gonzisa mani wutlhari ke? I ta maha mani a pima a mhaka? Kasi hi zihlangi lezi za ha ku lumulwako, Lezi za hi ku tsikisiwako vele ke?

¹⁰Hakuva a zilayelo zakwe a zi gumesi, A zilayelo zakwe zita xinwe hehla ka xinwani; Kutsongwani laha, ni kutsongwani lahaya!

¹¹Inaka, Jehova i ta wulawula ni tiko legi Hi vanhu va manghakamela ni lirimi limbe, [61]

¹²Lava a nga va byela, aku: A humulo hi gwalegi, Tsikani vakareleko va humula; Laha ku kona kurula, kanilezi a va layangi kuzwa. [62]

¹³Hikwalaho a gezu ga Jehova gi tata kabye, giku: A zilayelo za mina a zi gumesi, A zilayelo zita xinwe hehla ka xinwani; Inyamutlha nzi wula lezi, manziko nzi wula leziya! Kasi loku va famba va fela kuwa ha xinzhakwani, Va tshoveka, va phasiwa, va khomiwa.

¹⁴Hikwalaho, zwanani a mhaka ya Jehova, Nwina vatseketseli lava mu fumelako vanhu va le Jerusalema.

¹⁵Hilezi mu nge ngalo: Hi mahile xivumelwano ni kufa, Hi zwanana ni Xeoli; Hambu loku a tsayiselelo wu kukuleta ku fanana ni ntalo, Wu nga ta hi chikelela, Hakuva a mawunwa hi ma mahile wuchavelo ga hina, Hi fihlala lahasi ka kukhohlisa.

¹⁶Hikwalaho Hosi Jehova i ngalo: Langutani, nza veka a ribye giva xiseketelo le Zioni, A ribye gi ringilweko, a ribye ga magumo, ga lisima, a xiseketelo xi tiyileko; Loyi a gi tsumbako a nga ta tsutsuma. [63]

¹⁷A nongameto wu tava lipimo la kona, Ni kululama ku tava xiringaniso. A maralala ma ta kukuleta a wuchavelo ga mawunwa, Ni wufihlalelo gi ta khulungelwa bi mati.

¹⁸A xivumelwano xa nwina ni kufa xi ta vinyetelwa, Ni kuzwanana ka nwina ni Xeoli ku nga ta yima; Loku wuta a ntalo wa tsayiselelo nwina mu ta kanzihelwa.

¹⁹Zikhati zontlhe loku a ntalo wu hunza wu ta mu khoma, Hakuva mixo ni mixo wu ta hunza, hlikanhi ni wusiku; Mu ta gonza hi ku dzukiswa ntsena.

²⁰Hakuva a mubhodi wu komile ka loyi a ranzako ku ti nawula, Ni kumba a wu ringani lezaku a ti phutsela ha wona.

²¹Hakuva Jehova i ta yima kota lezi a nga maha xitsungeni xa Perazima, A zangara khwatsi hi lezi a nga maha le nkoveni wa Gibeoni, Kasi a fela ku maha ntiro wakwe—a ntiro wa masingita, A hetisa a ntiro wakwe wu hlamalisako. [64]

²²Makunu hi nga tsikani ku tseketsela, Kasi ziboho za nwina zi nga engeti zi tiyisiwa; Hakuva nzi zwile hi ka Hosi Jehova wa tiyimpi Lezaku ku bilwe hungu hi kulobyiswa misaveni yontlhe.

²³Kangatelani ndleve, muzwa gezu ga mina, Ingisani, muzwa mhaka ya mina!

²⁴Xana loku murimi a xuva ku byala, o simamisa a rima ke? Wa simamisa aba marukwani ya simu gakwe ke?

²⁵Loku a nanasele a sava ga kona a nga xwanyi anase ni kumine, A byala tirigo hi ku xaxameta, Ni mavele ni mahuva matshanwini ya wona ke?

²⁶Hakuva a Nungungulu wakwe i mu gonzisile, I mu tivisile a ndlela ya kona.

²⁷Hakuva a anase a yi phophiwi hi makina, Ge hambu kumine a yi huliwi hi nghonghola ya kareta; Kanilezi a anase yi phophiwa hi nhonga, Ni kumine yi huliwa hi mugomba.

²⁸A tirigo a yi fayiwi, Kanilezi a ku hunzisiwi mpimo wa kuhula ni ku yi gaya hi nghonghola ya kareta yakwe; A yi panzelelwi hi masonzo ya mahaxi.

²⁹Lezo na zonawu zi huma hi ka Jehova wa tiyimpi, Loyi a nga ni makungo ma hlamalisako, ni wutlhari ga hombe.