Read tshwa Isaya 37 Bible Online

Isaya 37 - tshwa bible

Isaya 37

¹Laha hosi Hezekia a nga wa zi zwile, i lo hanzula tinguwo takwe, a ambala tisakwa, aya ndlwini ya Jehova. [87]

²I lo ruma Eliakimu a nduna ya yindlu ya hosi, na Xebna a mutsali, ni vapristi va hombe na va ambele tisakwa, a kuya ka muprofeti Isaya a nʼwana Amozi,

³va yaku kakwe: Hezekia e ngalo: Inyamutlha i siku ga hlomulo, ni ga kulayiwa, ni ga tingana; hakuva a vanana va chikelelwe hi xikhati xa kuhefemulwa, kanilezi a ntamu wa ku va beleka a wu kona.

⁴Kutani Jehova a Nungungulu wa wena i zwile tontlhe a timhaka ta Rabxake leti a nga rumiwa tona hi nwinyi wakwe, a hosi ya le Assiria, a ku ta rukatela a Nungungulu a hanyako; lezaku Jehova a Nungungulu wa wena i ta mu lamula hi kota ya timhaka leti a ti zwileko; hikwalaho kombelela a misalela yi nga kona.

⁵Laha a malanza ya hosi ma ngata ka Isaya,

⁶yena aku kabye: Mu ta wula lezi ka nwinyi wa nwina. Jehova i ngalo: U nga chavi hi kota ya timhaka leti u ti zwileko, leti a malanza ya hosi ya le Assiria ma nzi rukateleko ha tona.

⁷Nzi ta enghenisa a moya wunwani ka yena, hi kota ya mahungu a ta nga mazwa, lezaku a tlhelela tikweni gakwe; zonake nzi ta mu wisa hi supado tikweni gakwe.

⁸Loku Rabxake a tlhelile i loya kuma a hosi ya le Assiria na yilwa na Libna, hakuva i wa zwile lezaku yena i sukile le Lakixe.

⁹Kanilezi Sennakeribe i lozwa na ku wulawulwa ha Tirhaka a hosi ya le Etiopia, vaku: I hlomile yimpi a ku talwa na wena. Laha na a zi zwile, i lo rumela mitsukano ka Hezekia, aku:

¹⁰Mu ta wula ka Hezekia a hosi ya ka Juda, muku: U nga khohliswi hi Nungungulu wa wena loyi u mu tsumbako, uku: A Jerusalema gi nga ta nyikelwa mandleni ya hosi ya le Assiria.

¹¹Wena u zwile hi tihosi ta le Assiria lezaku ti hlasele matiko wontihe. Wena u ta poniswa ke?

¹²A matiko lawa ma nga hlaselwa hi vadadani va mina ma ponisilwe hi vanungungulu va wona ke? A tiko ga Gozani, na Harani, na Rezefa, ni vanana va ka Edeni laʼva nga le Telassari.

¹³Yi kwihi a hosi ya le Hamate ni ya le Arfade, ni hosi ya muti wa Sefarvaime, ni ya le Hena, ni ya le Iva ke?

¹⁴Laha Hezekia a nga amukela a papilo mandleni ya mitsukano, a gi gonza, i loya ndlwini ya Jehova, aya gi andlala mahlweni ka Jehova.

¹⁵Hezekia i lo kombela ka Nungungulu, aku:

¹⁶Jehova wa tiyimpi, Nungungulu wa ka Israeli, loyi a tshamako xikari ka makerubima, wena wece u Nungungulu wa matiko wontihe ya misava; wena u mahile a tilo ni misava.

¹⁷Jehova, kangatela a ndleve ya wena, u ingisa; Jehova, vulula mahlo ya wena u wona. Zwana timhaka tontlhe ta Sennakeribe leti a ti rumeleko ku ta rukatela ha tona a Nungungulu a hanyako.

¹⁸Jehova, hakunene a tihosi ta Assiria ti hlasele a matiko wontihe ni tiko ga tona wutsumbu.

¹⁹Ti hisile a vanungungulu va wona hi nzilo, hakuva va wa nga hi vanungungulu, yi wa hi mitiro ya mandla ya vanhu, ya tisinya ni maribye. Hikwalaho ti zi khungumulela.

²⁰Makunu Jehova, Nungungulu wa hina, hi ponise canjeni gakwe, kasi a matiko wontihe ya misava ma ta zi tiva lezaku wena wece u Jehova.

²¹Zonake Isaya nʼwana Amozi, i lo rumela mhaka ka Hezekia, aku: Jehova, Nungungulu wa ka Israeli i ngalo: Lezi u kombeleko hi kota ya Sennakeribe a hosi ya le Assiria,

²²A timhaka leti Jehova a ti wulawulileko ha yena hi leti: A mubulwa wu nga nhwana wa le Zioni wu ku kanyisile, Wa ku hleka, a zivisa hloko yakwe ka wena.

²³Himani loyi u nga mu rukatela u mu tseketsela ke? U tlakusile a gezu ga wena ni mahlo ya wena hehla ka mani? U vukele Loyi a Basileko wa ka Israeli.

²⁴Hi malanza ya wena u rukatele a Hosi, Uku: Hi tikareta ta mina leʼtinyingi Nzi kanzihile hehla ka zitsunga, a mareveni ya Lebanoni, Nzi ta tsema tisinya to leha ta tisedare. Ni leʼta kusaseka ta kipres; Nzi ta enghena kala nzi chikela xixungweni xa magumo, Ni lomu khwatini go saseka nguvu;

²⁵Nzi kelile tihlowo, nzinwa mati, Hi mikonzo ya mina nzi ta womisa a micongo yontlhe ya le Gipite.

²⁶Kasi a ku zi zwangi lezi nzi zi mahileko kaleloko, Nzi zi wulawulile masikwini ya kale? Makunu nza zi maha zi tatiseka, Lezaku a miti ya makhokhola u yi maha marumbi.

²⁷A vaaki va kona va lo vumala ntamu, Va lo dzuka, va va ni tingana; Vo khwatsi i byanyi ga khwati ni khubyanyi go nyuka; Va fana ni byanyi gi milako hehla ka tiyindlu, Ni mavele ma swileko na ma nga se ku rumbuka.

²⁸Loku u tshama, kutani u huma hambu ku enghena, nza zi tiva, Ni loku u nzi vukela hi zanga.

²⁹Hi kota ya ku nzi vukela ka wena, Ni matshanza ya wena ma chikeleko tindleveni ta mina, Hikwalaho nzi ta ku bhoxa mukhalo nhovini ya wena, Nzi ku vekela matomu ya mina nonwini wa wena, Nzi ku tlhelisa hi ndlela leyi u tileko ha yona.

³⁰A xikombiso xa wena xi tava lexi: Inyanwaka mu taga mituke; hi lembe ga wumbiri mu taga zo ti milela ha zoce kambe. Kanilezi a lembe ga wunharu mu ta byala, mu tshovela, mu rima zivina za nwina, muga mihanzu ya zona.

³¹Ni misalela leyi yi ponileko ya yindlu ya ka Juda yi ta tlhava timitsu lahasi, yi pswala mihanzu.

³²Hakuva hi le Jerusalema ku ta huma misalela, ni lava va nga pona xitsungeni xa Zioni. Lezo zi ta maheka hi kupangama ka Jehova wa tiyimpi.

³³Hikwalaho xungetano ni hosi ya le Assiria, Jehova i ngalo: A nga ta enghena ka muti lowu Hambu ku phanda a ligalala ka wona; Ge hambu a ku tshinela ka wona ni xitlhangu, Ni ku wu bhiyela lihlavu.

³⁴I ta tlhela hi ndlela leyi a tileko ha yona, A nga ta enghena ka muti lowu, ku wula Jehova.

³⁵Hakuva nzi ta vikela muti lowu, nzi wu ponisela Wutsumbu ganga ni nanza ga mina Davida.

³⁶A ngelosi ya Jehova yi lo huma yiya wugovelweni ga maAssiria yi ya daya 185,000 wabye; laha vanhu va nga vuka ni mixo zi wa hi zirumbi ntsena.

³⁷Zonake Sennakeribe a hosi ya le Assiria yi lo suka yi tlhela yi ya tshama le Niniva.

³⁸A xikhati xo kari laha a nga wa khozela lomu ndlwini ya nungungulu wakwe Nisroko, a vana vakwe Adrammeleki na Xareza va lo mu daya hi supado, va tsutsumela tikweni ga Ararate. A nwana wakwe Esar-haddoni i lo fuma wutshanwini gakwe.