Read tshwa Isaya 39 Bible Online

Isaya 39 - tshwa bible

Isaya 39

¹A ka xikhati lexo Merodak-baladani, a nʼwana Baladani, a hosi ya le Babuloni, i lo rumela a papilo ni zinyikiwo ka Hezekia, hakuva i wa zwile lezaku i wa babya, niku i kalamukile. [90]

²Hezekia i lo tsaka ku wona mitsukano ya kona, a kombisa ni mabako yakwe: a siliva, ni nzalama, ni mipepo ni mafura ya lisima, ni matlhari yakwe wontihe, zontlhe lezi zi nga hi mabakweni yakwe. Ku wa nga hi kona a xilo lomu ndlwini yakwe ni mufunweni wakwe a nga kala ku va komba.

³Zonake ku lota Isaya a muprofeti ka hosi Hezekia, a taku kakwe: Va wula yini a vanhu lava ke? Vata hi kwihi? Hezekia a hlamula, aku: Vata hi tikweni gi nga kule, le Babuloni.

⁴Zonake aku: Xini va xi wonileko lomu ndlwini ya wena ke? Hezekia i lo hlamula, aku: Va wonile zontlhe lezi zi nga lomu ndlwini ya mina; a xi kona ni xinwe xa titshomba ta mina nzi nga va kombangiko.

⁵Zonake Isaya aku ka Hezekia: Zwana a gezu ga Jehova wa tiyimpi:

⁶Languta, a masiku mata, lawa zontlhe lezi zi nga ndlwini ya wena, ni zontlhe lezi a vadadani va wena va zi hlengeletelako kala siku legi, zi ta nga rwaliwa ziya Babuloni; ku nga ta sala nchumu, ku wula Jehova.

⁷Va ta teka a vana va wena, lava va humako ka wena, lava u ta nga va beleka, va va maha mithenwa lomu ziluvelweni za hosi ya le Babuloni.

⁸Hezekia aku ka Isaya: A mhaka ya Jehova leyi u yi wulileko yi nene! A engeta aku: Hakuva ku tava kona kurula ni kutshameka masikwini ya mina.