Read tshwa Isaya 40 Bible Online

Isaya 40 - tshwa bible

Isaya 40

¹Chavelelani, chavelelani a vanhu va mina, Ku wula Nungungulu wa nwina.

²Wulawulani hi wuxinji ka Jerusalema. Muba nyiwo kakwe lezaku a wukhumbi gakwe gi mbhelile, Lezaku kugoha kakwe ku tsetselelwe, Hakuva a ka zionho zakwe i amukele a nzhiho kambiri hi ka canja ga Jehova.

³A gezu ga loyi a bako hungu, giku: Longisani a ndlela ya Jehova lomu xiwuleni, Lulametani a gonzo ga Nungungulu wa hina lomu ligwangweni. [91]

⁴A minzhelelo yontlhe yi ta seletelwa, Zontlhelele zitsunga ni miganga zi ta bohliswa; A matshamu ma gombonyekileko ma ta lulametwa, Ni matshamu ya magomagoma ma ta ecetelwa.

⁵Ni kungangamela ka Jehova ku ta wonekeliswa, Yontlhe nyama yi ta ku wona khatiginwe. Hakuva a nomu wa Jehova wu wulile lezo.

⁶A gezu go kari giku: Kanela! Munwani a hlamula, aku: Nzi ta kanela yini? A nyama yontlhe yi fanana ni byanyi, Ni kusaseka kontlhe ka yona ku fanana ni xitsangi xa khwati. [92]

⁷A byanyi ga woma, ni xitsangi xa wuna Loku a moya wa Jehova wu hunzile hehla ka xona. Kunene, a vanhu hi byanyi.

⁸A byanyi ga woma, ni xitsangi xa wuna, Kanilezi a mhaka ya Nungungulu wa hina yi ta simama kala kupinzuka. [93]

⁹Kanzihani xitsungeni xo tlakuka Nwina lava mu nehelako Zioni a mahungu yo saseka, Tlakusani magezu ya nwina hi ntamu, Nwina lava mu nehelako Jerusalema mahungu yo saseka. Tlakusani magezu ya nwina, mu nga chavi, Byelani miti ya ka Juda, muku: Langutani Nungungulu wa nwina.

¹⁰Langutani, Hosi Jehova i tata khwatsi i nhenha, A ku ta fuma hi canja gakwe. Langutani, wata ni nchachazelo wakwe, Ni muphango wakwe wa mu rangela.

¹¹I ta gisa a tlhambi wakwe khwatsi hi murisi; I ta tsombanyisa a tiyivana mawokweni yakwe, A ti rwala laha xifuveni xakwe, A fambisa khwatsi leti ti anwisako. [94] Himani a ringanako na Nungungulu?

¹²Himani a pimileko a bimbi hi canja gakwe, Loyi a pimileko matilo hi lipimo la titiho takwe? Himani a pimileko hi xirunzu a tshuri wa misava, A pima zitsunga ni miganga laha xikalwini?

¹³Himani loyi a nga hlolako a moya wa Jehova? Himani a nga muha wusungukati, ni ku mu gonzisa.

¹⁴I lombile wusungukati ka mani, kasi a gonziswa a ndlela ya nongameto? Ni ku mu gonzisa a wutivi, ni ndlela ya wutlhari?

¹⁵Langutani, a matiko me khwatsi i dona ga mati gi donelako fukweni, Ma ku khwatsi i tshuri wa lomu xikalwini; Ni matiko ya laha bimbini ma fanana ni tsutsungwani laha ndengelengeni.

¹⁶A khwati ga Lebanoni a gi ringani a nzilo wa ganzelo, Ni zifuyo za kona a zi na ku ringana a timhamba ta ku hiswa.

¹⁷Langutani, wontihe matiko a hi nchumu mahlweni kakwe, A hi ya manyawu mahlweni kakwe, a ma hlayiwi nchumu.

¹⁸Nungungulu mu ta mu fananisa na mani, Hi xihi xifananiso mu ta nga xi maha xo ringana naye?

¹⁹A meseri wa nyekisa a xifananiso, Ni mufuli wa nameka a nzalama ka xona, A xi bombisa hi tiketani ta siliva.

²⁰Loye a vumalako i hlawula a sinya yi nga boliko, I ti lavela a meseri loyi a tlharihileko A ku ta mu vatlela a xifananiso lexi xi to kala xi nga tsekatseka

²¹A mu zi tivi ke? A mu zi zwangi? A mu tiviswangi hi kusanguleni ke? A mu zi pimangi a kutumbulukeni ka misava ke?

²²Hi yena a tshamileko le hehla ka ranzani ga misava, Ni vaaki va yona vaku khwatsi i bhanzala. Hi yena a andlalako matilo khwatsi o andlala veli, A ma gwimba kota tenda a kuva wuakelo. [95]

²³Hi yena a bohlisako tihosana lezaku ti ngavi nchumu, A koramisako valamuli va misava kasi va ngavi nchumu.

²⁴Na va ha ku byaliwa, na va ha ku xwanyiwa, A tshinya gabye na ga ha tlhava mitsu misaveni, Loku a pupuxa hehla ka vona va wuna, Ni xipupuri xi va kukuleta ku fana ni mungu.

²⁵Mu ta nzi fananisa na mani loyi nzi ta nga ringana naye ke? Ku wutisa Loyi a Basileko.

²⁶Tlakusani mahlo ya nwina le hehla, mu languta, Himani a vangileko lezi zilo? Hi yena a rangelako a mabandla ya zona hi ku ma xaxameta, Loyi a vitanako zontlhe hi mavito. Hi kota ya ntamu wakwe wa hombe ni wukulu gakwe Ku hava ni xinwe xi vumalekako.

²⁷Hikuyini u wulako, O Jakobe, Na wena Israeli, uku: A ndlela ya mina yi fihlele ka Jehova, Niku, Nungungulu a nga wuli nchumu mhakeni ya mina?

²⁸A ku zi tivi ke? A ku zi zwangi ke? Lezaku Jehova i Nungungulu wa pinzukelwa, Yena Muvangi wa magemetamusi ya misava; A nga karali, a nga mbheli ntamu; A wutlhari gakwe a gi na ku kambiwa.

²⁹Wa nyika ntamu ka lava va rerekileko, A tiyiseta lava va nga hava ntamu.

³⁰Lava vaswa va nga karala, va rereka, Ni majaha ma nga wela magumo,

³¹Kanilezi lava va lavelelako Jehova va ta kuma ntamu muswa, Va ta puruma ku fanana ni magama, Va ta tsutsuma va nga karali, Va ta famba va nga rereki.