Read tshwa Isaya 43 Bible Online

Isaya 43 - tshwa bible

Isaya 43

¹Kanilezi makunu ku wula Jehova, loyi a ku vangileko Jakobe, Loyi a ku wumbileko wena Israeli, i ngalo: U nga chavi nchumu, hakuva nzi ku tlhatlhisile, Nzi ku vitanile hi vito ga wena, u wa mina. [105]

²Hambu loku u tsemakanya matini, nzi tava na wena, Loku U tsemakanya micongo, cima u nga ta mhemba, Loku u famba lomu nzilweni u nga taswa, Ge hambu ku hiswa hi malangavi. [106]

³Hakuva mina nzi Jehova a Nungungulu wa wena, Loyi a Basileko wa ka Israeli, a muhanyisi wa wena. Nzi nyikile Gipite a kuva nzhiho wa wena, Na Etiopia na Seba wutshanwini ga wena.

⁴Hakuva wena wa ranzeka mahlweni ka mina, Ni ku dzunzeka, kambe nzi ku ranzile; Hikwalaho nzi ta ku tirula hi vanhu, Nzi nyikela matiko kasi ku ku hanyisa.

⁵U nga chavi, hakuva nzi zinwe na wena; Nzi ta neha a vanana va wena hi le Mutsuwuka-gambo, Nzi ku tsombanyisa u huma hi le Muhlwa-gambo.

⁶Nzi taku ka Nwalungu: Humesa! Ni ka Dzonga: U nga alisi! Wuyisa a varisanyana va mina hi le kule, Ni vanhwana va mina hi le magemeta-musi ya misava;

⁷Vontlhe lava va vitanwako hi vito ga mina, Lava nzi va vengeleko wudzunzo ga mina, Lava nzi va wumbileko, nzi va maha.

⁸Humesani a vanhu va zikhumu laʼva nga ni mahlo, Ni ziwiri lezi zi nga ni tindleve.

⁹A matiko wontihe a ma tsomhanyiswa, ni vanhu vontlhe va hlengeletana. Himani xikari kabye a nga hi byelako a zilo lezi? A va hi tivise hi lezi va nga zi vumba; A va humese a timboni tabye to kombisa a kululama kabye, Kasi vanhu loku va zizwa va taku: Lisine!

¹⁰Nwina mu timboni ta mina, ku wula Jehova; Mu nanza ga mina legi nzi gi hlawuleko, Kasi ma fela ku zi tiva, mu kholwa hi mina, Mu pima lezaku hi mina yena. Hi mahlweni ka mina a ku na nga mahiwa Nungungulu, Ge hambu nzhako ka mina a nga ta kuva kona munwani.

¹¹Mina, hi mina Jehova, A handle ka mina a ku na muhanyisi.

¹²Hi mina nzi zi wulileko, nzi hanyisa, nzi wuya nzi vumba; Ku wa nga hi na nungungulu munwani xikari ka nwina. Hikwalaho nwina ma nzi kustumunyela Lezaku nzi Nungungulu, ku wula Jehova.

¹³A kusukela lezi ni kuya mahlweni nzi yaloye, A nga kona a nga tlhatlhisako canjeni ga mina. Loku nzi ranza ku maha nchumu himani a ta nga nzi kaneta?

¹⁴Jehova a Mutlhatlhisi wa nwina, Loyi a Basileko wa ka Israeli, i ngalo: Hi kota ya nwina nzi rumile a muhlaseli le Babuloni, Nzi hlongola vontlhe vahombe va kona, A maKaldea va ta tsutsuma lomu matarwini yabye va nga tsaka ha wona.

¹⁵Hi mina Jehova, a Wa ku Basa wa nwina, A muvangi wa Israeli, a Hosi ya nwina.

¹⁶Ku wula Jehova loyi a bhoxileko ndlela lomu bimbini, Ni tisoko lomu matini ya hombe, [107]

¹⁷Loyi a yisako kona a tikareta ni mahaxi, A yimpi ni tinhenha ta yona; Vontlhe va mhemba khatiginwe, va nga ha vuki; Va lovile, va timekile khwatsi i ngoti ya kandiya.

¹⁸Mu nga ha khumbuli a zilo za kale, Ge hambu ku alakanyela a zilo za kale ka matiko.

¹⁹Langutani, nzi ta maha a xilo xiswa; Xi sina xi woneka, a mu xi woni ke? Nzi ta bhoxa ndlela lomu xiwuleni, Ni micongo lomu ligwangweni,

²⁰Kasi a zihari za khwati zi ta nzi dumisa, A mahlolwa ni timbuwu, Hakuva nzi ta vanga mati lomu xiwuleni Ni micongo lomu xigwangweni, Kasi a vanhu va mina va hlawulekileko vanwa.

²¹A tiko legi nzi ti maheleko gona gi ta nzi dzunza.

²²Kanilezi wena Jakobe a ku nzi kombelangi, A ku ti karatangi ha mina, wena Israeli!

²³A ku nzi nehelangi a tiyivu ta minyikelo ya ku hiswa; Ge hambu ku nzi bonga hi miphahlo ya wena; A nzi ku bhinzisangi hi minyikelo ya mapa, Ge hambu ku ku rera hi mipepo.

²⁴A ku nzi xavelangi a lihlanga la ku nuhela, A ku nzi xurisangi hi mafura ya timhamba ta wena; Kanilezi u nzi xanisile hi zionho za wena, U nzi karata hi zigoho za wena.

²⁵Hi mina ntsena nzi vinyako a zihambunyeto za wena hi kota ya mina wutsumbu, Ni zionho za wena nzi nga ta ha zi alakanya.

²⁶Nzi alakanyisa, hi wulawulisana; Tlhatlhambutela a mhaka ya wena, Kasi wa kumeka na u lulamile. [108]

²⁷A nyapanze wa wena i onhile, Ni vatlhamuseli va wena va nzi onhele.

²⁸Hikwalaho nzi tsongahatile a tihosana ta yindlu yo basa, Nzi nyikele Jakobe a kuva a lobyiswa, Na Israeli a kuva a rukiwa.