Read tshwa Isaya 44 Bible Online

Isaya 44 - tshwa bible

Isaya 44

¹Makunu zwana, O Jakobe wena nanza ga mina, Wena Israeli, loyi nzi ku hlawuleko!

²I wula lezi Jehova loyi a ku mahileko, Loyi a nga ku wumba rumbyini ga nyine wa wena, a muvuni wa wena, Aku: U nga chavi nchumu Jakobe, nanza ga mina, Wena Jexuruni loyi nzi ku hlawulileko. [109]

³Hakuva nzi ta nyika mati ka lava va nga ni tora, Ni micongwana a misaveni yi womileko; Nzi ta chulula a Moya wa mina hehla ka vana va wena, Ni xikatekiso xa mina hehla ka mahluke ya wena;

⁴Ma ta mila xikari ka byanyi Kukotisa ziphutsu wukhulungelweni ga mati.

⁵Munwe i taku: Mina nzi wa Jehova: A munwani i ta ti vitana hi vito ga Jakobe; A wa wunharu i ta tsala canjeni gakwe, aku: Nzi lumba Jehova, A ti vitana hi vito ga Israeli a kuva xibongo xakwe.

⁶Jehova, a Hosi ya ka Israeli, Ni Mutiruli wakwe, Jehova wa tiyimpi, i ngalo: Nzi wo sangula, ni wo gumesa, Ahandle ka mina a ku na Nungungulu. [110]

⁷Himani a ta nga kanela kota mina, a zi xaxameta, Kusukela ka lezi nzi yimisileko a tiko ga kaleloko? A va byele a zilo zi ta nga humelela.

⁸Mu nga chavi, ge hambu ku rurumela! A nzi ku byelangi kale, nzi zi tlhatlhambutela ke? Nwina mu vakustumunyu va mina. I kona munwani Nungungulu a handle ka mina ke? Ge, a gi kona ginwani ribye, a nzi gi tivi. [111]

⁹Vontlhe vamahi va zifananiso a hi nchumu, ni mitiro leyi va tsakako ha yona a yi vuni nchumu. A vakhozeli va zona a va woni, a va pimi, va kala va wiswa tingana.

¹⁰Himani a nga nga maha a nungungulu, a wumba xifananiso xi wuya xi nga mu vuni nchumu?

¹¹Langutani, vontlhe lava va xi khozelako va tawa tingana, hakuva a vamahi va xona mbanhu ntsena. A va tsombane vontlhe va yima khatiginwe; va ta chava vontlhe va wiswa tingana.

¹²A mufuli wa nyunzo i vekela simbi lomu nzilweni hi lipharo, a yi betha hi mikono, a yi tira hi ntamu wa mawoko yakwe. Kanilezi loku a hi ni ndlala i ta karala, ni loku a nganwi mati wa rereka.

¹³A muvatli wa tshambuluta a lipimo lakwe, a tsala minzhati hi lapis, a vatla hi xihloka, a pima hi lipimo; lezo a maha xifananiso xa munhu, a xiwumbeko xo saseka xa munhu, kasi a fela ku xi veka lomu ndlwini.

¹⁴Wa ti tsemela tisinya ta tisedare, a teka ni xenhe ni kuhlu, a zi hlawula xikari ka tisinya ta khwati. A byala sinya ya sululwani zonake a vula yi yi milisa.

¹⁵Zonake munhu a maha tihunyi hi tisinya leto, hakuva i ta zi teka a ya wora; wa dzivela nzilo ha yona a bhika zakuga; kambe a maha a nungungulu ha yona, a mu khozela, a vatla xifananiso ha yona a xi khizamela.

¹⁶A hisa xipanze xa sinya nzilweni, a xinwani xipanze a bhika ha xona, a woca nyama, aga a xura; a tlhela a wora, aku: Nzazwa kukufumela, hakuva nzi na ni nzilo!

¹⁷Zonake hi sinya yi seleko wa vatla a nungungulu ha yona, a korama mahlweni kakwe, a mu khozela, a kombela ka yena, aku: Nzi ponise, hakuva wena u nungungulu wa mina!

¹⁸A vakunghahi a va tivi nchumu, a va pimi nchumu, hakuva a mahlo yabye ma valilwe, a va zi koti ku wona, ni timbilu tabye laha kaku va nga pimi nchumu.

¹⁹A nga kona a ehleketako, a hambu ni ku pimisisa, aku ngalo: Nzi hisile a khihlanya ga sinya leyi, nzi bhika tipawu hehla ka makala, nzi woca nyama nziga; xana nzi nga maha manyalataniso hi leyi yi seleko ke? Nzi nga khizamela a xipanze xa sinya ke?

²⁰Iga khuma, a hambukiswa hi mbilu yi khohlakeleko, lezaku a tsanzeka ku ponisa a muhefemulo wakwe; hambu ni ku wula, aku: Lezi nzi zi khomileko canjeni ga mina a hi wunwa ke?

²¹Alakanya timhaka leti, wena Jakobe, wena Israeli, Hakuva u nanza ga mina, nzi ku mahileko; Israeli, u nanza ga mina, nzi nga ta ku rivala.

²²Nzi vinyile a zihambunyeto za wena khwatsi i refu, Ni zionho za wena khwatsi i hunguva. Tlhelela ka mina, hakuva nzi ku tirule.

²³Yimbelelani nwina matilo, hakuva Jehova i zi tirile! Matshamu ya kueta ya misava, kanyulukani! Tlhavani zizimba nwina zitsunga, Na wena khwati ni tisinya to ntlhe ti nga ka wena; Hakuva Jehova i tlhatlhisile Jakobe, A ti dumisa ha Israeli.

²⁴Jehova, a mutiruli wa wena, Loyi a ku wumbileko rumbyini ga nyine wa wena, i ngalo: Nzi Jehova loyi a mahako zilo zontlhe, Nzi andlele a matilo ha nzoce Nzi andlala a misava ha nzoce. [112]

²⁵Nza tsetsula a mawunwa ya vahembi, Nzi maha vavumbi va hunguka. A titlhari nza ti tlhelisa nzhako, Nzi hunzula wutlhari gabye giva wupumbu;

²⁶Kanilezi nza tiyisa a mhaka ya nanza ga mina, Nzi tatisa a makungo ya mitsukano ya mina. Hi mina nzi wulako ka Jerusalema, nziku: A vanhu va ta tshama ka wena, Nziku ka miti ya ka Juda; Mu ta aketwa; Nzi ta vuxa a marumbi ya kona.

²⁷Hi mina nzi nge ngalo ka kueta ka bimbi, Pswhana! Nzi ta pswhisa a micongo ya wena.

²⁸Nzi wula ka Kurusi, nziku: Murisi wa mina! I ta maha kontlhe kuranza ka mina; A ka Jerusalema i taku: U ta aketwa; Ni ka tempeli: A xiseketelo xa wena xi ta akiwa luswa.