Read tshwa Isaya 48 Bible Online

Isaya 48 - tshwa bible

Isaya 48

¹Ingisani lezi, nwina va yindlu ya Jakobe, Nwina lava mu vitanwako hi vito ga Israeli, Lava mu humelako marambyini ya ka Juda, Nwina lava mu hlambanyako hi vito ga Jehova, Mu dumisako a Nungungulu wa ka Israeli, Kanilezi na ku nga hi zinene ni kululama;

²Hakuva va ti vitana hi vito ga muti wu basileko, Va ti seketela hi Nungungulu wa ka Israeli, Loyi a vito gakwe a nga Jehova wa tiyimpi.

³Nzi tlhatlhambutele a zilo zo ranga hi kale; Zi humela nonwini wa mina, nzi zi kombisa; Hi xitshuketi nzi lo zi maha zi humelela.

⁴Hakuva nzi wa zi tiva lezaku wa nonoha, Lezaku a nhamu ya wena i siha wa xiketse, Ni ximombo xa wena i suku. [120]

⁵Nzi ku tlhatlhambutele kale, Nzi ku tivisile zona na zi nga se ku maheka, Aku kasi u nga wula, uku: Zi mahilwe hi xifananiso xa nungungulu wa mina, Zi vangilwe hi nungungulu wa mina a vatlilweko kutani a wumbilweko.

⁶U wa zi zwile, languta zi tatisekile! Xana a mu vumeli ku kustumunya ha zona ke? Makunu nza ku tivisa a zilo ziswa, A zilo zi fihlilweko, lezi u nga kala u nga zi tivi.

⁷Za hi ku vangiwa zalezi, a hi kale; Cima a ku na ngazwa nchumu ha zona kala nyamutlha lezi, Aku kasi u nga wuli, uku; Nzi wa zi tiva!

⁸Cima a ku na nga zizwa, ge hambu ku zi tiva, A ndleve ya wena yi wa nga se ku vululiwa; Hakuva nzi wa zi tiva lezaku a ku tsumbeki, Kusukela rumbyini ga nyine wa wena u vitanilwe lezaku u muhambunyeti.

⁹Kanilezi hi kota ya vito ga mina nzi ta timisela, Hi kota ya wudumo ga mina nzi ta ti khoma, Lezaku nzi nga ku lovisi.

¹⁰Languta, nzi ku hlutile, kanilezi a nzi kumangi siliva; Nzi ku ringile lomu mpingweni ga hlokiselelo.

¹¹Hi kota ya mina wutsumbu nzi ta zi maha; Hakuva nzi nga vumelisa kuyini lezaku a vito ga mina gi nyenyeziswa? Nzi nga ta nyikela wudzunzo ga mina ka munwani.

¹²Jakobe, nzi ingise, Na wena Israeli, loyi nzi ku vitanileko; Hi mina yena, nzi wa kuranga, ni kambe nzi wa kugumesa. [121]

¹³I canja ga mina gi akileko a xiseketelo xa misava, Ni canja ga mina ga xinene gi lo andlala tilo; Nzi lo zi vitana zi tumbuluka khatiginwe. [122]

¹⁴Tsombanani nwina nwentlhe, mu ingisela: Himani xikari ka vona a vumbileko lezi, Lezaku loyi a ranziwako hi Jehova i ta maha kuranza kakwe hehla ka Babuloni, Ni woko gakwe gi talwa ni maKaldea?

¹⁵Hi mina wutsumbu nzi zi wulileko; Ina, nzi mu vitanile, Nzi mu tisile, nzi vuvumisa a ndlela yakwe.

¹⁶Tshinelani ka mina, muzwa lezi: Kusukela kusanguleni a nzi wulawulangi xihundleni; Laha a zilo lezi zi nga maheka nzi wa hi kona. Makunu Hosi Jehova i nzi rumile zinwe ni Moya wakwe. [123]

¹⁷Jehova a Mutiruli wa wena, Loyi a Basileko wa ka Israeli, I ngalo: Hi mina Jehova, Nungungulu wa wena, Loyi a ku gonzisako lezi zi ku vunako, Loyi a ku rangelako ndleleni leyi u faneleko ku famba ha yona.

¹⁸O, loku ku wo khwatsi wa ingisa zileletelo za mina! Zonake a kurula ka wena ku wa ta khulunga ku khwatsi i congo, Ni kululama ka wena ku wa ta ku khwatsi mabyandlati ya bimbi,

¹⁹Ni vana va wena va wa ta ku khwatsi i seke, Ni pswalo wa marumbu ya wena wu wa ta kotisa vunye; A vito ga wona cima gi wa nga ta susiwa, Ge hambu ku fuviswa mahlweni ka mina. [124]

²⁰Humani lomu Babuloni, mu chavela kule ni maKaldea, Zi tlhatlhambuteni na mu yimbelela hi kutsaka, Muba hungu kala magemetamusi ya misava, muku: Jehova i tirule nanza gakwe Jakobe! [125]

²¹A va zwangi tora laha a nga va rangela ziwuleni, Hakuva i lo va khulungisela mati hi lomu ribyeni, I lo panza a ribye, a mati ma bhukula. [126]

²²A vakubiha a va na kurula, ku wula Jehova.