Read tshwa Isaya 49 Bible Online

Isaya 49 - tshwa bible

Isaya 49

¹Ingisani nwina matiko ya le bimbini, Zwanani nwina matiko ya le kule! Jehova i nzi vitanile na nza hi rumbyini ga mamani, I nzi chulile vito na nza hi nzeni ka mamani. [127]

²I lo maha nomu wa mina wu fana ni supado yo kariha, A nzi fihla nzhutini wa canja gakwe; I nzi mahile a paxa wu totilweko, A nzi fihla lomu kocelweni wakwe. [128]

³Aku ka mina: Wena Israeli u nanza ga mina, Legi nzi ta nga ti dumisa ha gona.

⁴Kanilezi mina nzi te ngalo: Nzi tirile mahala, Nzi mbhetile a ntamu wa mina mahala hi lezi zi nga vuniko nchumu; Hambu zi hi tano, Jehova i ta lamula mhaka ya mina, A nchachazelo wa mina wu le ka Nungungulu wa mina.

⁵Makunu Jehova wa wulawula, Loyi a nga nzi wumba rumbyini ga mamani a kuva nanza gakwe, Lezaku nzi wuyiseta Jakobe kakwe, Nzi mu tsombanyisela Israeli; Hakuva nzi dzunzekile mahlweni ka Jehova, Na Nungungulu wa mina i ntamu wa mina.

⁶E ngalo: A zi ringani loku u hi nanza ga mina Lezaku u vuxa a tixaka ta ka Jakobe ntsena, Ni ku wuyiseta lava va ponileko va ka Israeli; Kambe nzi ta ku veka a kuva kuwonekela ka vamatiko, Kasi a kuhanyisa ka mina ka chikela magumelweni ya misava. [129]

⁷Jehova a Mutiruli ni Loyi a Basileko wa ka Israeli, E ngalo ka loyi a vanhu va mu kanyisako, loyi tiko gi mu nyenyako, A nanza ga vafumeli: Tihosi ti ta zi wona ti yima, Ni tihosana ti ta khizamela Jehova loyi a tsumbekako, Ni Loyi a Basileko wa ka Israeli, loyi a ku hlawulileko.

⁸Jehova i ngalo: Nzi ku hlamule xikhatini xa tipswalo, Ni sikwini ga kuhanyiswa nzi ku vunetele. Nzi ta ku lonzowota, nzi ku tiyisa kasi wa fela kuva xivumelwano ni tiko, Ku tlhelisela a misava, ni ku avela vanhu a titshomba leti ti onhekileko, [130]

⁹Lezaku u byela lava va bohilweko, uku: Humani! Ni ka lava va nga munyameni, uku: Ti wonekeliseni! Va taga tindleleni, Va kuma wugelo lomu zitsungeni zontlhe.

¹⁰Va nga tazwa ndlala hambu tora; Ge hambu kuswa hi mumu ni gambo, Hakuva loyi a va zwelako wusiwana i ta va rangela, A va yisa matini ya zibuka.

¹¹Nzi ta bhoxa ndlela zitsungeni zontlhe za mina, Ni magonzo ya mina ma ta seletelwa.

¹²Langutani, vata hi le kule, A vanwani va huma hi le Nwalungu, ni le Muhlwa-gambo, A vanwani va huma hi le tikweni ga Sinima.

¹³Tlhavani zizimba nwina matilo! tsaka wena misava, Bhumani nwina zitsunga, hakuva Jehova i tangalisile a vanhu vakwe, I zwele wusiwana a ka vakwe lava va hlokiswako.

¹⁴Kanilezi Zioni i te ngalo: Jehova i nzi tsikile, A Hosi ya mina yi nzi rivele!

¹⁵Wa zi kota wasati ku rivala a xihlangi xakwe, A nga zweli wusiwana loyi a humileko hi rumbyini gakwe ke? Ina, a nga rivakelwa, Kanilezi mina cima nzi nga ta ku rivala. [131]

¹⁶Languta, nzi ku tsalile zipameni za mandla ya mina, A makhurisi ya wena xontlhe xikhati ma le mahlweni ka mina.

¹⁷A varisanyana va wena vata hi ku tsutsuma, A valovisi ni vahahluli va wena na va kari va suka ka wena.

¹⁸Tlakusa a mahlo ya wena u lunguza: Vontlhe va tsombene, vata ka wena! Khwatsi hilezi nzi hanyako, ku hlambanya Jehova, U ta ti bombisa ha vona khwatsi hi nguwo, U ti ambexa ha vona kota muswika.

¹⁹Hakuva a marumbi ya wena ni ziwula za wena, Ni tiko ga wena gi hahlulweko, Zi nga ta ringana a vaaki va wena, Ni lava va nga ku khadamula va tava kule.

²⁰A vana va wena lava va nga belekiwa xikhatini xa kufelwa ka wena, Va taku tindleveni ta wena: A tiko a gi hi ringani; Hihe tiko kasi ha fela ku aka ka gona.

²¹Zonake u taku mbilwini ya wena: Himani a nzi pswaleleko vana lava? Mina loyi nzi nga kala nzi nga hi na vana, nzi hi ngonwa, Nzi wa hi khumbi, nzi hi nyapepe; himani a va wundlileko? Nzi wa sele nzoce, vona lava va wa hi kwihi?

²²Hosi Jehova i ngalo: Nzi ta tlakusa a canja ga mina ka vamatiko, Nzi yimisa a nghapa ya mina xikari ka mifumo; Zonake va ta neha varisanyana va wena mawokweni yabye, Ni vanhwana va wena va ta va rwala makatleni.

²³A tihosi ti tava vawundli va vana va wena, Ni vazinza va tava vaanwisi vabye; Va ta korama lahasi mahlweni ka wena, Va laza a ntshuri wa mikonzo ya wena. Wena u ta zi tiva lezaku nzi mina Jehova, Ni lezaku lava va nzi lavelelako va nga ta wiswa tingana.

²⁴Xana a nhenha yi nga wutlelwa a muphango wa yona ke? Kutani a muhluli a nga wutlelwa a tiperesu takwe ke?

²⁵Kanilezi Jehova e ngalo: Ina, a tikhumbi ta nhenha ti ta tlhatlhiswa, Ni muphango wa loyi a Wulileko wu ta wutliwa; Hakuva mina nzi talwa ni valala va wena, Nzi ponisa vana va wena.

²⁶A vatsimbeketi va wena nzi ta va gisa nyama yabye, Va ta popiwa hi nkhata wabye wutsumbu, khwatsi hi vinya giswa; Zonake a nyama yontlhe yi ta zi tiva lezaku mina Jehova nzi muhanyisi wa wena, Ni Nyamintamu wa ka Jakobe Mutiruli wa wena.