Read tshwa Isaya 50 Bible Online

Isaya 50 - tshwa bible

Isaya 50

¹Jehova i ngalo: Gi kwihi a papilo ga mamani wa wena ga kualana, legi nzi mu hlongoleko ha gona? Kutani nzi mu xavisile ka wihi wa vamangava va mina ke? Langutani, mu xavisilwe hi kota ya zionho za nwina, Ni mamani wa nwina i hlongolwe hi kota ya zihambunyeto za nwina. [132]

²A xikhati lexi nzi ngata, hikuyini ku nga hi hava muyimeli ke? Ni laha nzi nga vitana, hikuyini ku nga kala ku huma wo hlamula? Xana a woko ga mina gi komile ko kala nzi tsanzeka ku tlhatlhisa ke? Kutani nzi vumala ntamu wa ku hanyisa ke? Languta, hi kukawuka ka mina nza womisa a bimbi, A micongo nzi yi maha xiwula, kasi a zidluwani za bola, zifa hi tora, Hi kota ya ku vumala mati. [133]

³Nzi ambexa matilo hi munyama, Nzi ma fenengeta hi nguwo ya xilenda. [134]

⁴Hosi Jehova i nzi nyikile a lirimi la mupizani, Kasi nzi ta zi kota ku tangalisa loyi a kareleko; Gica ni mixo a! vuxa a ndleve ya mina, A yi vuxa lezaku nzi ingisa kota mupizani.

⁵Hosi Jehova i nzi vululele a ndleve, A nzi alangi, a nzi tlhelelangi nzhako.

⁶Nzi lo nyikela hlana wa mina ka lava va nga nziba, Ni marama ya mina ka lava va nga nzi hlurulela malevu; A nzi fihlangi a nghohe ya mina laha na va nzi rukatela va nzi phelela. [135]

⁷Hakuva Hosi Jehova i ta nzi vunetela, Hikwalaho nzi wa nga wiswangi tingana; Nzi lo maha nghohe ya mina yi fanana ni ribye, Nza zi tiva lezaku nzi nga tawa tingana.

⁸Loyi a nzi yimelako i kusuhi, Himani a ta nga nzi kecara? A hi yimeni zinwe! Himani muranisi wa mina? A tshinele kusuhani ka mina!

⁹Langutani, Hosi Jehova i ta nzi vuna, Himani a to nzi kona ke? Vona vontlhe va ta hlakala khwatsi i nguwo, Va giwa hi tisumba.

¹⁰Himani xikari ka nwina a chavako Jehova, A ingisa a gezu ga nanza gakwe? Loye a fambako munyameni, na a nga hi na kuwonekela, Ngha a tsumba vito ga Jehova, a khegela ka Nungungulu wakwe.

¹¹Nwina nwentlhe mu dzivelako nzilo, Mu hloma tihunyi ti vurako, Fambani malangavini ya nzilo wa nwina, Ni lomu tihunyini mu ti dziveleko. Lezo zi ta mu humela hi lomu canjeni ga mina, Mu ta etlela kuxanisekeni.