Read tshwa Isaya 59 Bible Online

Isaya 59 - tshwa bible

Isaya 59

¹Langutani, a woko ga Jehova a gi komangi go kala gi tsanzeka ku hanyisa, Ni ndleve yakwe a yi valekangi ko kala yi tsanzeka kuzwa. [178]

²Kanilezi hi zigoho za nwina zi mu hambanyisileko ni Nungungulu wa nwina, Ni zionho za nwina za mu fihlela a nghohe yakwe, laha kaku a nga zi koti ku muzwa.

³Hakuva a mandla ya nwina ma nyenyezisilwe hi nkhata, Ni titiho ta nwina ti nyenyezisilwe hi kugoha, A milomu ya nwina yi wulawula mawunwa, Ni tirimi ta nwina ti wulawula kubiha.

⁴A ku na munhu a yimelako ku lulama, A nga kona a ti hlamulelako hi zinene. Va tsumba za hava, va wulawula mawunwa; Va xura nyimba ya kukhohlisa, va pswala kubiha.

⁵Va kuhlehela manza ya xihihigani, Va luka wupe ga zitoli. Loyi a gako manza yabye ofa, Ni loku ku fayiwa a ginwe ga wona ko huma nyoka.

⁶A wupe gabye a gi vuni ku ma ha tinguwo, A va zi koti ku ti fenengeta hi mitiro yabye; A mitiro yabye mitiro ya kubiha, Ni mitiro ya tihanyi yi le mandleni yabye.

⁷A mikonzo yabye yi tsutsumela kubiheni, Yi hatlisela ku ya halata a nkhata wu nga hiko na nanzu; A maalakanyo yabye maalakanyo ya kubiha, A kuhahlula ni kulovisa zi lomu tindleleni tabye.

⁸A va tivi nchumu hi ndlela ya kurula, A ku na kululama tindleleni tabye; Va famba hi tindlela to gombonyeka, Ni wihi a ti lanzako a nga tivi kurula.

⁹Hi kota ya lezo a nongameto wu le kule na hina, A kululama a ku hi chikeleli; Hi langutela kuwonekela hi ku ma munyama, Hi cuwukela hlikanhi kanilezi hi famba kuphumeni.

¹⁰Hi hulumetela lomu makhurisini khwatsi zikhumu, Ina, hi hulumetela kota lava va nga hiko na mahlo; Hi khubeka ni hlikanhi khwatsi hi loku ku hi wusiku, Xikari ka lava va nga ni ntamu hi fanana ni vanhu va fileko.

¹¹Hina hontlhe hi dzumadzuma khwatsi hi maurso, Hi tsikwila kukotisa matuva; Hi langutela kululama, hi nga ku woni; Hi cuwukela kuhanyiswa, kanilezi kuva kule na hina.

¹²Hakuva a zihambunyeto za hina zi tele mahlweni ka wena, Ni zionho za hina za hi ranisa; Hakuva a zihambunyeto za hina ha zi wona, Ha zi tiva a zigoho za hina:

¹³Hi hambukile, hi ala Jehova, Hi tlhelela nzhako hi nga lanzeli Nungungulu wa hina, Hi wulawulile zo tsimbeketa vanwani ni kuhluwuka, Hi alakanyela ni ku wulawula mawunwa timbilwini ta hina.

¹⁴A nongameto wu tlhelisilwe nzhako, Ni kululama ku yimile kule na hina, Hakuva zinene zi wile le hubyeni, Ni kululama a ku zi koti ku enghena.

¹⁵Ina, a zinene za vumaleka, Ni loyi a tsikako leʼzo biha wa phangiwa. Jehova i zi wonile, zi mu tsanwisa Hikuva ku nga hi na nongameto.

¹⁶I wonile lezaku a ku na muyimeli, A hlamala hikuva ku nga hi na muhlanguti. Hikwalaho a woko gakwe wutsumbu gi lo mu vunetela, Ni kululama kakwe ku lo mu seketela.

¹⁷I lo ambala kululama ku khwatsi xikatawu xa xiketse, Ni ndlondla ya kuhanyiswa hlokweni yakwe; A ambala tinguwo ta ku ti photela, A fenengela kupangama khwatsi i jasi. [179]

¹⁸I ta va chachazela hi ku ringana ni mitiro yabye, A zanga ka valala vakwe, ni ku tlhelisela ka lava va lwako naye; I ta tlhelisela hi fanelo a matiko ya le bimbini.

¹⁹Lezo va ta chava vito ga Jehova le Muhlwa-gambo, Ni wukulu gakwe le Mutsuwuka-gambo. Laha a nala a tako kukotisa a congo wu khulungako, A moya wa Jehova wu ta mu hlongolisa.

²⁰A mutiruli i tata le Zioni, Ni ka va ka Jakobe lava va hunzulukako zihambunyetweni zabye, Ku wula Jehova. [180]

²¹A xivumelwano xa mina zinwe navo hi lexi, ku wula Jehova. A moya wa mina lowu wu nga hehla ka wena, ni timhaka ta mina leti nzi ti vekileko nonwini wa wena, zi nga ta huma nonwini wa wena, ni milonwini ya vana va wena, hambu milonwini ya vazukulu va wena, kusukela lezi kala kupinzuka, ku wula Jehova.