Read tshwa Levi 14 Bible Online

Levi 14 - tshwa bible

Levi 14

¹Anzhako ka lezo Jehova i lo wulawula ka Mosi, aku:

²Lowu hi nayo wa loyi a nga ni hlokonho, wa siku ga kubasiswa kakwe: Va ta mu neha ka mupristi; [13]

³ni mupristi i ta huma lahandle ka wugovelo aya mu hlola; loku a wona lezaku a hlokonho yakwe yi bolile,

⁴zonake mupristi i ta leletela lezaku loyi a basiswako a nehelwa zinyanyani zimbiri zo hanya, lezi zi hlazekileko, ni sinya ya sedari ni woya go pswhuka, ni hisope.

⁵A mupristi i ta va leletela lezaku a xinwani xinyanyani xi tlhabyelwa lomu ka mbita ya wumba, leyi nga ni mati ma hlazekileko,

⁶zonake i ta teka xinyanyani lexi xi hanyako, ni sinya ya sedari, ni woya go pswhuka, ni hisope, a zi peta zinwe ni xinyanyani lexi xi hanyako lomu ka nkhata wa xinyanyani lexi xi tlhabyelweko hehla ka mati laya ma hlazekileko.

⁷Zonake i ta nwatsekela ha zona a ntlhanu wa zikhati ni zimbiri hehla ka munhu loye a faneleko ku basiswa a hlokonho, a mu byela lezaku u basisilwe, zonake a tsika a xinyanyani lexi xi hanyako xi puruma xi famba khwatini.

⁸Loyi a to basiswa i ta hlaza tinguwo takwe, a cinga misisi yakwe yontlhe, a hlamba hi mati, zonake i tava a hlazekile; anzhako ka lezo yena i ta enghena lomu wugovelweni, kanilezi i ta tshama lahandle ka tenda gakwe ntlhanu wa masiku ni mambiri.

⁹Zonake hi siku ga wuntlhanu ni mambiri, i ta cinga yontlhe misisi yakwe, ni xilevu, ni tisiyi; a cinga yontlhe misisi ya miri wakwe, a hlaza tinguwo takwe, a engeta a hlamba lomu matini, zonake i tava a hlazekile.

¹⁰Hi siku ga wuntlhanu ni manharu, i ta teka tihambana timbiri leti ti nga hiko na bawa, ni kundlwana wa lembe ginwe wu nga hiko na bawa, ni xipanze xa wunharu xa za wukhume xa efa ya mapa yo saseka, ma vuvilweko hi mafura, a kuva munyikelo, ni loga yinwe ya mafura.

¹¹Ni mupristi loyi a basisako, i ta neha a munhu loye a basiswako zinwe ni zilo lezi mahlweni ka Jehova, laha nyangweni ya tabemakeli ga mutlhangano.

¹²Zonake mupristi i teka a hambana yinwe, a nyikela a kuva muphahlo wa milanzu, ni loga ya mafura, a zi nziwitela a kuva munyikelo wa kunziwitela mahlweni ka Jehova.

¹³Zonake i ta tlhava a hambana laha ka wutshamu legi va Chavelako ka gona a muphahlelo wa kuonha ni munyikelo wa kuhiswa, laha ka wutshamu ga kubasa; hakuva a muphahlo wa milanzu ngwa mupristi, kota muphahlo wa kuonha; a zilo lezi zi basile nguvu.

¹⁴A mupristi i ta teka a nkhata wa muphahlo wa milanzu, a tota a ndleve ya xinene ya loyi a basiswako, ni laha ka litiho la hombe la canja ga xinene, ni laha ka litiho la hombe la konzo wakwe wa xinene.

¹⁵Zonake kambe a mupristi i ta teka a loga ya mafura a ma chela lomu canjeni gakwe ga xibhabha.

¹⁶Zonake mupristi i ta peta a litiho lakwe la canja ga xinene lomu ka mafura laya ma nga lomu canjeni ga xibhabha, a nwatsekela hi litiho leli li nga ni mafura ntlhanu wa zikhati ni zimbiri mahlweni ka Jehova.

¹⁷Kasike a mafura laya ma salako lomu canjeni gakwe, a mupristi i ta ma tota laha ka ndleve ya xinene ya loyi a basiswako, ni ka litiho la hombe la canja ga xinene, ni ka litiho la hombe la konzo wa xinene, hi le hehla ka nkhata wa muphahlo wa milanzu.

¹⁸Ni mafura laya ma ta nga sala lomu canjeni gakwe i ta ma tota laha hlokweni ya loyi a basiswako, zonake a mupristi i ta mu mahela a muphahlo wa nzhiho mahlweni ka Jehova.

¹⁹Zonake mupristi i ta maha muphahlelo wa kuonha, a mu mahela a muphahlo wa nzhiho loyi a basiswako ka chaka gakwe; zonake i ta tlhava a muphahlelo wa kuhiswa.

²⁰A mupristi i ta nyikela a muphahlelo wa kuhiswa ni munyikelo wa zakuga laha alatini, loku a mu mahela nzhiho munhu loye, zonake hi kona a ta nga hlazeka.

²¹Kasi loku xi hi xisiwana, na a nga ringani ku kuma lezo, i ta teka a hambana yinwe leyi yi ta nga nyikelwa a ku maha muphahlelo wa milanzu; yi tava munyikelo wa kunziwitela, kasi ku mu mahela nzhiho. I ta teka ni za wukhume za efa ga mapa yo saseka, laya ma vuvilweko hi mafura zi maha munyikelo wa zakuga, a teka ni loga ya mafura,

²²ni matuva mambiri, kutani mavinyani mambiri ya zipomba, kota lezo a ta nga zi kuma; ginwani gi tava ga muphahlelo wa kuonha, ni ginwani gi tava ga muphahlelo wa kuhiswa.

²³Na yena i ta zi neha ka mupristi hi siku ga wuntlhanu ni manharu, laha nyangweni ya tabemakeli ga mutlhangano mahlweni ka Jehova, zi tava za kubasiswa kakwe.

²⁴A mupristi i ta teka a hambana ya muphahlelo wa milanzu ni loga ya mafura, zonake a zi nziwitela, ziva munyikelo wa kunziwitela mahlweni ka Jehova.

²⁵Zonake i ta tlhava a hambana ya muphahlelo wa milanzu, ni mupristi i ta teka a nkhata wa muphahlelo wa kona, a wu tota laha ka ndleve ya xinene ya loyi a to basiswa, ni laha ka litiho la hombe la canja ga xinene, ni laha ka litiho la hombe la konzo wakwe wa xinene.

²⁶A mupristi i ta chela mafura lomu canjeni gakwe ga xibhabha,

²⁷zonake mupristi i ta nwatsekela ntlhanu wa zikhati ni zimbiri mahlweni ka Jehova hi mafura laya ma nga lomu canjeni gakwe ga xibhabha, a maha lezo hi litiho lakwe la canja ga xinene.

²⁸Zonake mupristi i ta tota hi mafura laya ma nga lomu canjeni gakwe a ndleve ya xinene ya loyi a to basiswa, ni litiho la hombe la canja ga xinene, ni litiho la hombe la konzo wakwe wa xinene, kwalomu a nga tota a nkhata wa muphahlo wa milanzu.

²⁹A mafura laya ma ta nga sala lomu canjeni ga mupristi, i ta tota laha hlokweni ya loyi a to basiswa, kasi ku mu mahela a nzhiho mahlweni ka Jehova.

³⁰Zonake i ta nyikela ginwani tuva, hambu vinyani ga xipomba, kota kukuma kakwe.

³¹Kota kukuma kakwe loku zi hi zinyanyani lezi a zi kumileko, i ta nyikela xinwani akuva xa muphahlelo wa kuonha, ni xinwani xi tava xa muphahlelo wa kuhiswa zinwe ni munyikelo wa zakuga. Lezo a mupristi i ta mu mahela a nzhiho loyi a to basiswa mahlweni ka Jehova.

³²Lowu hi nayo wa ku basisa loyi a nga wa hi ni hlokonho, loku a vumala lezi zi ringeneko a kubasiswa kakwe.

³³Jehova i lo wulawula kambe ka Mosi ni ka Aroni, aku:

³⁴Laha mu ta nga chikela tikweni ga le Kanani, legi nzi mu nyikileko gona, loku nzi neha a ntungu wa hlokonho ka yinwe ya tiyindlu ta tiko legi gi ta ngava ga nwina,

³⁵a nwinyi wa yindlu a ate a ta bikela mupristi, aku: Nzi wonile a xilo xi fananako ni tshasi ga hlokonho lomu ndlwini ya mina.

³⁶Zonake a mupristi i ta va byela ku humesela zibya lomu ndlwini, na a nga se ngaya enghena ku ya wona a tshasi, kasi zontlhe lezi zi nga lomu ndlwini zi nga nyenyeziswi, zonake i ta enghena a hlola a yindlu.

³⁷Yena i ta cuwukisisa a sakaveti, loku a sakaveti legi gi nga laha khurisini ga yindlu, gi hi ni xibalavati xo bhalala kutani xo pswhuka, lexi xi etileko lomu ka khurisi;

³⁸a mupristi i ta huma lomu ndlwini, a yima laha nyangweni ya yindlu, zonake a vala yindlu ntlhanu wa masiku ni mambiri.

³⁹A mupristi i ta engeta kambe aya enghena hi siku ga wuntlhanu ni mambiri, loku a wona a sakaveti na gi enzelekile laha khurisini ga yindlu,

⁴⁰a mupristi i ta va byela a ku susa a maribye laya ma nga ni sakaveti, va ma hoxa lahandle ka muti, a ka wutshamu legi gi nga hlazekangiko.

⁴¹Zonake a yindlu yi ta haliwa kontlhe lomu nzeni, va teka a tsutsungwani lowu va nga wu hala vaya halata lahandle ka muti, laha ka wutshamu gi nga hlazekangiko.

⁴²Zonake va ta teka manwani maribye, va ma vekela wutshanwini ga laya yo sangula; va teka a nzhope yinwani va tshula a yindlu.

⁴³Kanilezi loku a sakaveti gi engeta kambe gi woneka lomu ndlwini, laha na maribye na ma susilwe, ni yindlu na yi halilwe, va engeta va tshula,

⁴⁴zonake a mupristi i ta engeta aya, loku a hlolisisile a sakaveti a wona na gi enzelekile lomu ndlwini, lezoke i hlokonho leyi yo karata yi nga lomu ndlwini; ni yindlu yi yilile.

⁴⁵Zonake va ta khungumula a yindlu, ni maribye, ni mapulangu, ni nzhope, ni misava yontlhe ya yindlu, zontlhe lezo zi ta yiswa lehandle ka muti, ka wutshamu legi gi nga hlazekangiko.

⁴⁶Ka wontihe masiku laya a yindlu yi valilweko, loye a enghenako ka yona, i tava a nga hlazekangi kala laha gambyeni.

⁴⁷Loyi a etleleko ka yona i ta hlaza tinguwo takwe, ni loye a geleko ka yona i ta hlaza tinguwo takwe.

⁴⁸Loku a yindlu yi tshulilwe, ni loku mupristi a hlolile a wona lezaku a sakaveti a gi anzangi lomu ndlwini, i ta wula lezaku a yindlu yi hlazekile, hakuva zi mbhelile lezi zo biha.

⁴⁹Kasi ku basisa a yindlu, i ta teka a zinyanyani zimbiri, ni sinya ya sedari, ni woya go pswhuka, ni hisope;

⁵⁰zonake i ta tlhava a xinyanyani xinwe lomu mbiteni ya wumba leyi yi nga ni mati laya ma hlazekileko.

⁵¹I ta teka a sinya ya sedari, ni woya go pswhuka, ni hisope, ni xinyanyani lexi xi hanyako, a zi peta lomu ka nkhata wa xinyanyani lexi xi tlhabyilweko, ni lomu ka mati laya ma hlazekileko, zonake a nwatsekela a yindlu ntlhanu wa zikhati ni zimbiri.

⁵²I ta basisa a yindlu hi nkhata wa xinyanyani, ni mati ma hlazekileko, ni xinyanyani lexi xi hanyako, ni sinya ya sedari, ni hisope, ni woya go pswhuka.

⁵³Zonake i ta tsika a xinyanyani lexi xi hanyako xi puruma xi famba khwatini. Loku a basisa yindlu hi nzhiho wo maha lezo, zonake yi tava yi hlazekile.

⁵⁴Lowu hi nayo wu yimiselweko wontihe mababyi ya hlokonho, ni ma-tshasi,

⁵⁵ni wa hlokonho ya tinguwo, ni ya tiyindlu,

⁵⁶ni zidlayi, ni zibawa, ni masakaveti,

⁵⁷lezaku kasi zi fela ku kombisiwa loku zi nga hlazekangi, ni loku zi hlazekile. Hikwalaho lowu i nayo wa hlokonho.