Read tshwa Levi 17 Bible Online

Levi 17 - tshwa bible

Levi 17

¹Jehova i wulawula ka Mosi, aku:

²Byela Aroni, ni vana vakwe, ni vontlhe vanana va ka Israeli, uku ka vona: Lezi Jehova a nga zi leletela hi lezi:

³Kani hi wihi munhu wa lixaka la ka Israeli a tlhavako a homu, kutani i yivu, kutani i mbuti lomu wugovelweni, hambu lahandle ka wugovelo,

⁴na a nga yi nehi laha nyangweni ya tabemakeli ga mutlhangano, a kuva a yi nyikela ka Jehova mahlweni ka wutshamu ga kubasa ga Jehova, i tava ni nanzu wa nkhata: hakuva i halatile a nkhata: loye munhu i ta susiwa xikari ka vanhu va ka kabye.

⁵Hikwalaho a vanana va ka Israeli va ta neha a miphahlelo yabye leyi va phahlelako lahandle, hakuva yonawu va fela ku yi neha ka mupristi, mahlweni ka Jehova, wuva muphahlelo wa kurula.

⁶A mupristi i ta nwatsekela a nkhata laha alatini ga Jehova, laha nyangweni ya tabemakeli ga mutlhangano, ni ku hisa mafura a kuva masema yo nanziha ka Jehova.

⁷Va nga ha nyikeli miphahlelo yabye ka madimoni, lawa va bhayako nawo. Lowu wu tava nayo wa pinzukelwa ka zontlhe zizukulwana zabye. [17]

⁸U ta va byela ku ngalo: Kani hi wihi munhu wa lixaka la ka Israeli, hambu muluveli loyi a akileko xikari kabye, a nyikelako a munyikelo wa kuhiswa, kutani muphahlo,

⁹na a nga wu nehi laha nyangweni ya tabemakeli ga mutlhangano, kasi ku ta maha munyikelo ka Jehova, loye munhu i ta susiwa xikari ka va ka kabye.

¹⁰Kani hi wihi munhu wa lixaka la ka Israeli, hambu loku a hi muluveli a akileko xikari kabye, a gako ni lihi lixaka la nkhata, nzi ta mu cuwukisa hi mahlo ya makayi, nzi mu susa ka va ka kabye. [18]

¹¹Hakuva a muhefemulo wa nyama wu lomu nkhateni. Hikwalaho nzi mu nyikile wona a ku maha ha wona a nzhiho wa mihefemulo ya nwina laha alatini, hakuva hi wona nkhata wu mahako nzhiho hi kota ya muhefemulo wu nga ka wona. [19]

¹²Hikwalaho nzi wulile ka vana va ka Israeli, nziku: Ngha ku nga hi kona wa vanana va ka Israeli, hambu muluveli loyi a nga xikari ka nwina, a ta ngaga a nkhata.

¹³Kani hi wihi munhu wa vanana va ka Israeli, hambu muluveli loyi a nga xikari kabye, loku a khomile xihari hambu xinyanyani xi giwako lomu kuhloteni, yena i ta halata a nkhata wa xona a wu seletela hi misava.

¹⁴Hakuva a muhefemulo wa nyama yontlhe wu le nkhateni wa kona. Hikwalaho nzi byelile a vanana va ka Israeli, nziku: Mu ngagi a nkhata ni wa yihi nyama, hakuva a muhefemulo wa nyama yontlhe hi nkhata wa kona; kani hi wihi a wu gako, i ta susiwa. [20]

¹⁵Kani hi wihi munhu loyi a nga xisumbulwa lomu tikweni, hambu muluveli, loku aga a xihari xofa, kutani xo dawa hi zivanza, yena i ta hlaza tinguwo takwe, a hlamba lomu matini, hambu lezo i tava a nga hlazekangi kala laha gambyeni; zonake i tava a hlazekile.

¹⁶Kanilezi loku a nga hlazi tinguwo takwe, ni ku nga hlambi a miri wakwe, i ta rwala a nanzu wakwe.