Read tshwa Levi 18 Bible Online

Levi 18 - tshwa bible

Levi 18

¹Jehova i lo wulawula ka Mosi, aku:

²Byela a vanana va ka Israeli, uku ka vona: Hi mina Jehova, Nungungulu wa nwina.

³Mu nga mahi lezi va mahako le tikweni ga le Gipite, leyo mu nga wa akile kona. Mu nga mahi lezi va mahako le tikweni ga le Kanani leyo nzi mu yisako kona; hambu ku lanzela mikhuwo yabye.

⁴Mu ta ingisa zileletelo za mina, mu lanzela milayo ya mina, mu famba ha yona. Hi mina Jehova, Nungungulu wa nwina.

⁵Hikwalaho mu ta ingisa milayo ya mina ni zileletelo za mina; a munhu loye a zi mahako i ta hanya ha zona: hi mina Jehova. [21]

⁶Ngha ku nga hi kona wanuna a tshinelako ka xaka gakwe, legi gi nga nyama yinwe naye, a funungula a wumbyiri ga yena. Hi mina Jehova.

⁷U nga fununguli a wumbyiri ga dadani wa wena, hi ku etlela ni mamani wa wena; hakuva i nyine wa wena, u nga fununguli wumbyiri gakwe.

⁸U nga fununguli wumbyiri ga sati wa raru wa wena; hakuva wumbyiri ga raru wa wena.

⁹U nga fununguli wumbyiri ga makwenu, loyi a nga nʼwana wa raru wa wena, hambu nʼwana wa mamani wa wena, loyi a belekilweko laho ngangweni, hambu loku a belekilwe lahandle ka muti, u nga fununguli wumbyiri gabye.

¹⁰U nga fununguli wumbyiri ga zukulu wa wena wa xisati, hakuva wumbyiri ga wenawu.

¹¹U nga fununguli a wumbyiri ga makwenu, a nʼwana sati wa raru wa wena, loyi a pswalilweko hi raru wa wena; hakuva makwenu.

¹²U nga fununguli wumbyiri ga hahani wa wena, hakuva i nkhata munwe ni raru wa wena.

¹³U nga fununguli wumbyiri ga makabye wa nyine wa wena, hakuva i nyama yinwe ni nyine wa wena.

¹⁴U nga fununguli wumbyiri ga nakulobye wa raru wa wena; u nga tshineli ka sati wakwe, hakuva i nyinetsongwani wa wena.

¹⁵U nga fununguli wumbyiri ga katamwane wa wena; hakuva i sati wa nʼwana wa wena, u nga fununguli wumbyiri gakwe.

¹⁶U nga fununguli wumbyiri ga sati wa nakuloni; hakuva mbumbyiri ga nakuloni.

¹⁷U nga fununguli wumbyiri ga wasati ni ga nʼwana wakwe; u nga teki a zukulu wabye u funungula wumbyiri gabye; hakuva maxaka ya wena ya zinene. Hikwalaho lezo manyalataniso.

¹⁸U nga teki a nhombe ya wena, hakuva lezo zi vanga wukhuxu, ku funungula wumbyiri ga nhombe ya wena zinwe ni ga sati wa wena na a ha hanya.

¹⁹U nga tshineli ka wasati u funungula wumbyiri gakwe, na a nga hlazekangi hi kota ya tihweti takwe.

²⁰U nga etleli ni sati wa wakelane na wena, u ti nyenyezisa zinwe na yena.

²¹U nga nyikeli a vana va wena va mahiwa muphahlo ka Moloki. U nga nyenyezisi a vito ga Nungungulu wa wena. Hi mina Jehova.

²²U nga etleli ni wanuna khwatsi hi loku u etlela ni wasati; lezo manyalataniso ya hombe.

²³U nga etleli ni xihari, u ti nyenyezisa ha xona. Ni wasati a nga dzuki a tshinela ka xihari a bhaya naxo; lezo tingana to tshisa.

²⁴Mu nga ti nyenyezisi hi xinwe xa lezi zilo, hakuva a matiko laya nzi ma hlongoleko mahlweni ka nwina, ma ti nyenyezisile hi zontlhe lezo zilo.

²⁵A tiko gi ti nyenyezisile; nzi lamulile kuonha ka gona; lezaku a misava yi hlatile vaaki va gona.

²⁶Kasike nwina mu ta hlayisa milayo na mina ni zileletelo za mina, mu nga mahi ni xinwe xa lezi zinyenyeko, hambu loyi a nga xisumbulwa lomu tikweni, hambu muluveli loyi a nga xikari ka nwina.

²⁷Hakuva wontihe laya manyala ma mahilwe hi vanhu lava va nga wa akile ka tiko lego, na mu nga se va kona nwina, hikwalaho a misava yi nyenyezisilwe.

²⁸Ti woneleni, a tiko gi nga mu hlata, loku mu gi nyenyezisa; kota lezi gi hlatileko a vanhu lava va nga wa hi kona na mu nga se va kona nwina.

²⁹Hakuva vontlhe lava va ta nga maha a xinwe xa manyala lawa, va ta susiwa xikari ka va ka kabye.

³⁰Hikwalaho mu ta hlayisa milayo ya mina, kasi mu nga dzuki mu lanzela ni munwe wa mikhuwo leyi yo biha, leyi yi nga wa lanzelwa hi lava va nga wa hi kona na mu nga se va kona nwina; hikwalaho mu nga ti nyenyezisi ha yona. Hi mina Jehova, Nungungulu wa nwina.