Read tshwa Levi 19 Bible Online

Levi 19 - tshwa bible

Levi 19

¹Jehova i lo wulawula ka Mosi, aku;

²Byela a hlengeletano wontihe wa vanana va ka Israeli, uku ka vona; Basani, hakuva mina rizi basile, mina Jehova, Nungungulu wa nwina.

³Loyi ni loyi a chave a mamani wakwe ni dadani wakwe; ni lezaku a hlayisa masabado ya mina. Hi mina Jehova, Nungungulu wa nwina.

⁴Mu nga khizameli zifananiso, ge hambu ku ti mahela zifananiso zi chululweko. Hi mina Jehova, Nungungulu wa nwina.

⁵Ni loku mu nyikela ka Jehova a muphahlelo wa kurula, mu ta nyikela hi ndlela leyi yi faneleko kasi ma amukelwa.

⁶Wona wu ta giwa hi siku mu phahlelako ni siku gi gamelako; lezi zi to sala kala siku ga manharu, zi ta hisiwa nzilweni.

⁷Loku zi giwa hi siku ga wunharu, ku tava manyala; ni muphahlelo wu nga ta amukelwa.

⁸Loye a ta nga ziga i tava ni nanzu, hakuva i kanyisile lezi zi basiselweko Jehova. A munhu loye i ta susiwa xikari ka va ka kabye.

⁹Loku mu hula lomu tikweni ga nwina, u nga tshoveli u chikela magumo ka simu ga wena, ni kambe u nga kutsuli lezi zi saletelako kutshoveleni ka wena.

¹⁰U nga khayi lezi zi seleko xivineni xa wena, hambu ni ku rolela mihanzu leyi yi wileko lomu masinwini ya wena. U ta yi siyela zisiwana ni valuveli. Hi mina Jehova, Nungungulu wa nwina.

¹¹Mu nga yivi. Mu nga hembelana mawunwa, hambu ni ku khohlisana. [22]

¹²Mu nga hlambanyi mawunwa hi vito ga mina, hakuva lezo ku nyenyezisa a vito ga Nungungulu wa nwina. Hi mina Jehova. [23]

¹³U nga tsimbeketi wakelene na wena, ni ku phanga a zilo zakwe. U nga hlweli ni hakhelo ya xitiri kala ku chikela manziko.

¹⁴U nga rukateli xiwiri; hambu ni ku veka a xikhunguvanyiso mahlweni ka xikhumu; kanilezi u ta chava Nungungulu wa wena. Hi mina Jehova.

¹⁵Mu nga hambanyisi nongameto laha kulamuleni ka nwina; u nga cuwuki a nghohe ya xisiwana, hambu ku yimela a wahombe; kanilezi lamula muakelani wa wena hi nongameto.

¹⁶Loku u fambafamba lomu tikweni ga nwina u nga fambi u lumbeta a va ka nwina, hambu ni ku maha mboni yo vukela a nkhata wa wakelene na wena. Hi mina Jehova.

¹⁷U nga vengi makabye wa wena lomu mbilwini ya wena; u nga tsiki ku luleka muakelani wa wena kasi u nga kumi nanzu hi kota yakwe. [24]

¹⁸U nga ti photeli, hambu ni ku tshama ni timbiti hi vanhu va ka nwina. Kanilezi u ta ranza wakelene na wena kota lezi u ti ranzako wena. Hi mina Jehova. [25]

¹⁹Nwina mu ta hlayisa zileletelo za mina. U nga vumeli xifuyo xa wena xi kanzihiwa hi linwani lixaka. U nga byali timbewu ta tixaka timbiri sinwini ga wena. U nga ambali a nguwo leyi yi lukilweko hi tixaka ti hambeneko.

²⁰Loku munhu a etlela ni wasati loyi a nga khumbi, na a ngha a wutilwe hi wanuna, kanilezi na a nga se ku timiwa, hambu ku tlhatlhiswa, vona vambiri va ta tsayiswa, kanilezi ku nga hi ka kufa, hakuva a wasati i wa nga se tlhatlhiswa.

²¹Ni wanuna i ta neha a hamba ya muphahlelo wa milanzu ka Jehova, laha nyangweni ya tabemakeli ga mutlhangano.

²²Ni mupristi i ta mu mahela a nzhiho mahlweni ka Jehova hi hamba ya muphahlelo wa milanzu, hi kota ya kuonha loku a ku mahileko, zonake i ta tsetselelwa a kuonha loku a ku mahileko.

²³Loku mu chikela ka tiko legi mu yako ka gona, muya byala tisinya ta mihanzu yi giwako ya tixaka ti hambeneko; lomu ka malembe manharu mu ta hlaya mihanzu ya kona kota makhuna. Ni ka nwina yi tava leyi yi nga hiko minkwera, hikwalaho mu nga yigi.

²⁴Kanilezi hi lembe ga wumune, a mihanzu ya kona yontlhe yi tava ya kubasa, mu nga nyika kubonga ka Jehova hi yona.

²⁵Hi lembe ga wuntlhanu, nwina mu taga mihanzu ya kona, kasi tisinya ti fela ku mu pswalela mihanzu yinyingi. Hi mina Jehova, Nungungulu wa nwina.

²⁶Mu ngagi a zilo lezi zi nga ni nkhata. Mu nga mahi wutumbe, hambu ni ku hlahluva. [26]

²⁷Mu nga cingi lomu matlhelweni ya hloko mu yi renzelekela; hambu ni ku cinga lomu matlhelweni ya xilevu xa wena.

²⁸Mu nga ti tlhaveli tihlanga lomu mirini hi kota ya vafileko, hambu ni ku tlhavela madaranganya mimirini ya nwina. Hi mina Jehova.

²⁹U nga nyenyezisi a nhanyana wa wena hi ku mu kucetela wubhayi, kasi a tiko gi nga ti nyiketeli wubhayini, gi tala hi manyala.

³⁰Mu ta hlayisa masabado ya mina; mu hi ni xichavo hi wutshamu ga mina ga kubasa. Hi mina Jehova.

³¹Mu ngayi ka zitumbe ni ka vangoma, mu nga dzuki mu wutisa nchumu ka vona, kasi va nga mu nyenyezisi. Hi mina Jehova, Nungungulu wa nwina. [27]

³²U ta suka u yima mahlweni ka lava va basileko wuvu, u nyika xichawo ka munhu wa hombe, u chava Nungungulu wa wena. Hi mina Jehova.

³³Loku muluveli a akile tikweni ga nwina, mu nga mu xanisi.

³⁴A muluveli loyi a akileko xikari ka nwina, i tava xisumbulwa, a maha munwe wa nwina; u ta mu ranza kota lezi u ti ranzako wena; hakuva nwinawu mu wa hi valuveli tikweni ga le Gipite. Hi mina Jehova, Nungungulu wa nwina.

³⁵Mu nga hambukisi a nongameto kulamuleni, hambu ku hi ku ringanisa a kuleha ka xilo, hambu kupimeni ka lezi zo tika, hambu ni ku pima wunzeni.

³⁶Mu tava ni xikalu xinene, ni maribye ya kona yo lulama; ni efa gi longamileko, ni hini gi lulamileko. Hi mina Jehova, Nungungulu wa nwina, loyi a mu humesileko le Gipite.

³⁷Mu ta hlayisa milayo yontlhe ya mina ni zileletelo zontlhe za mina, mu zi maha. Hi mina Jehova.