Read tshwa Levi 20 Bible Online

Levi 20 - tshwa bible

Levi 20

¹Jehova i lo wulawula ka Mosi, aku:

²Engeta u byela a vanana va ka Israeli, uku ka vona: Kani hi wihi xikari ka vanana va ka Israeli, hambu xikari ka valuveli lava va luvelako lomu ka va ka Israeli, loye a nyikelako a nwanana wakwe ka Moloki a ku mu maha munyikelo, hakunene i ta dawa: a vanhu va tiko va ta mu gandla hi maribye.

³Minawu nzi ta cuwukisa hi mahlo ya makayi loye munhu, nzi mu susa xikari ka vanhu va ka kabye, hakuva i nyikele a nʼwana wakwe a ku maha munyikelo ka Moloki, a nyenyezisa wutshamu ga mina ga kubasa, ni ku xanza a vito ga mina ga kubasa.

⁴Loku vanhu va tiko va honisa hi munhu loyi a nyikeleko a nʼwana wakwe ka Moloki, va nga mu dayi,

⁵minake nzi ta cuwukisa kakwe ni ngango wakwe hi mahlo ya makayi, nzi mu susa ka va ka kabye, zinwe ni vontlhe lava va ti nyiketelako wubhayini kota yena, ku bhaya na Moloki.

⁶Loku munhu aya ka zitumbe ni ka vangoma, a bhaya zinwe navo, nzi ta mu cuwukisa hi mahlo ya makayi, nzi mu susa ka va ka kabye.

⁷Hikwalaho mu ta ti basisa, muva lava va basileko; hakuva hi mina Jehova, Nungungulu wa nwina. [28]

⁸Mu ta hlayisa milayo ya mina, mu yi maha. Hi mina Jehova loyi a mu basisako.

⁹Kani hi wihi loyi a rukatelako a raru wakwe kutani nyine wakwe, hakunene i ta dawa; hakuva i rukatele a dadani wakwe ni mamani wakwe. Ni nkhata wakwe wu tava hehla ka yena nwinyi. [29]

¹⁰Ni loku munhu a bhaya ni wasati a tekilweko, a bhaya ni sati wa muakelani wakwe, a wanuna ni wasati lava va bhayileko, vona vambiri va ta dawa. [30]

¹¹Loku wanuna a etlela ni sati wa raru wakwe, a funungula wumbyiri ga raru wakwe, va ta dawa hi wumbiri gabye; a nkhata wabye wu tava hehla kabye.

¹²Ni loku wanuna a etlela ni katamwane wakwe, va ta dawa hi wumbiri gabye; hakuva lezo tingana to tshisa. A nkhata wabye wu tava hehla kabye.

¹³Loku wanuna a etlela ni wanunakulobye, kota ku khwatsi ku etlela ni wasati, va mahile zo yila; hi wumbiri gabye va ta dawa, ni nkhata wabye wu tava hehla kabye.

¹⁴Loku munhu a teka wasati zinwe ni nyine wa kona, kuonha ko tshisa nguvu; va ta hiswa laha nzilweni hi wunharu gabye, kasi a kugoha ka kunghahi ku ngavi kona xikari ka nwina.

¹⁵Loku wanuna a etlela ni xihari, i ta dawa, mu daya ni xihari xa kona.

¹⁶Ni loku wasati a tshinela ka xihari a etlela naxo, hakunene loye wasati i ta dawa, ni xihari xa kona xi ta dawa; a nkhata wakwe wu tava hehla kakwe, zinghaho ni xihari.

¹⁷Loku munhu a teka makabye wakwe, a nʼwana raru wakwe, hambu a nʼwana wa nyine wakwe, a kala a wona wumbyiri gakwe, ni wasati a wona wumbyiri ga wanuna, zi bihile nguvu, vona vambiri va ta loviswa kuwoneni ka va ka kabye; i funungule wumbyiri ga makabye wakwe, yena nwinyi i ta rwala a kugoha kakwe.

¹⁸Loku munhu a etlela ni wasati, na a hi xikhatini xa tihweti takwe, a funungula wumbyiri gakwe, ni lezaku i funungule a hlowo yakwe, yenawu wasati i funungule a hlowo ya nkhata wakwe, vona vambiri va ta loviswa ka va ka kabye.

¹⁹U nga fununguli wumbyiri ga makabye wa mamani wa wena, ni wumbyiri ga hahani wa wena, hakuva hi ku maha lezo ku funungula a xaka ga yena ga zinene; vona va ta rwala milanzu yabye.

²⁰Loku munhu a bhaya ni sati wa nakulobye wa raru wakwe, a funungula wumbyiri ga nakulobye wa raru wakwe; vona va ta rwala a milanzu yabye; va tafa na va nga hi na vanana.

²¹Loku munhu a teka sati wa nakulobye, za yila; hakuva lezo ku funungula wumbyiri ga nakulobye; vona va nga ta kuva na vanana.

²²Lezo mu ta hlayisa milayo ya mina yontlhe, ni zileletelo za mina zontlhe, mu zi maha, kasi a tiko legi nzi mu yisako ka gona a kuya aka, gi nga mu hlati.

²³Mu nga lanzeli mikhuwo ya vanhu va tiko lego nzi va hlongolako mahlweni ka nwina, hakuva va mahile zontlhe lezi zilo, va nzi hlamukisa ha zona.

²⁴Nzi sina nzi mu byelile lezaku: Nwina mu taya fumela a tiko gabye, nzi ta mu nyika gona giva tshomba ya nwina; a tiko gi khulungako masi ni wulombe. Hi mina Jehova, Nungungulu wa nwina, loyi nzi mu hambanyisileko xikari ka matiko.

²⁵Hikwalaho hlawulani a zihari lezi zi hlazekileko xikari ka lezi zi nga hlazekangiko, ni zinyanyani zi hlazekileko xikari ka lezi zi nga hlazekangiko, mu nga ti nyenyezisi hi kota ya zihari, ni zinyanyani, ni zontlhe lezi zi kokakokako laha misaveni; lezi nzi mu byelileko lezaku za yila.

²⁶Nwina mu tava va basileko ka mina, hakuva mina Jehova nzi basile; nzi mu hambanyisile xikari ka manwani matiko, kasi mu fela kuva vanhu va mina.

²⁷Loku wanuna kutani wasati a ta nga wutisa ka tinguluve, kutani loye a nga xitumbe, va ta dawa, va gandliwa hi maribye; a nkhata wabye wu tava hehla kabye.