Read tshwa Levi 23 Bible Online

Levi 23 - tshwa bible

Levi 23

¹Jehova i lo wulawula ka Mosi, aku:

²Byela a vanana va ka Israeli, uku ka vona: Leyi hi mibuzo ya Jehova leyi mu ta nga leletela lezaku yiva mitlhangano ya kubasa: a mibuzo ya mina hi leyi:

³Ku ta tiriwa ntlhanu wa masiku ni ginwe; kanilezi hi siku ga wuntlhanu ni mambiri i sabado go humula, ga mutlhangano wu basileko; mu nga tiri ntiro ha gona. I sabado ga kubasa ga Jehova lomu mitini ya nwina yontlhe. [34]

⁴Leyi hi mibuzo ya Jehova, hi lezaku mitlhangano yi basileko leyi mu to leletela vanhu ha yona hi zikhati za yona:

⁵Hi hweti yo sangula, ka siku ga 14, laha gambyeni i Pasika ya Jehova;

⁶zonake hi siku ga 15 lomu ka hweti, mubuzo wa zibaba zi nga hiko na comelo, wu mahelwako Jehova; ntlhanu wa masiku ni mambiri mu taga zibaba lezi zi nga hiko na comelo.

⁷Hi siku go ranga, mu tava ni mutlhangano wa kubasa; mu nga tiri ntiro ha gona.

⁸Lomu ka masiku ya ntlhanu ni mambiri mu ta nyikela ka Jehova a muphahlelo wa kuhiswa hi nzilo. Hi siku ga wuntlhanu ni mambiri ku tava mutlhangano wa kubasa, kanilezi mu nga tiri ha gona ni ntiro munwe wo tika.

⁹Jehova i lo engeta a wulawula ka Mosi, aku;

¹⁰Byela a vanana va ka Israeli, uku ka vona; Loku mu chikela ka tiko legi nzi mu nyikileko, mu taku loku mu tshovela, mu teka a nyanza yo ranga mu heleketa ka mupristi.

¹¹Yena i ta nziwitela a nyanza leyo mahlweni ka Jehova, kasi ma amukeleka; ni mupristi i ta yi nziwitela hi siku gi gamelako ga sabado.

¹²A siku lego mu nziwitelako a nyanza mu ta nyikela a hambana yi nga hiko na bawa, ya lembe ginwe a wukale, a kuva munyikelo wo hiselwa Jehova.

¹³Mu ta engetela a muphahlo wa zakuga hi tipimo timbiri ta wukhume ta efa ga mapa yo saseka laya ma vuvilweko hi mafura; zi ta nyikelwa ku maha muphahlelo wa kuhiswa lowu wu nga ni masema yo nuhela ka Jehova; a munyikelo wa kunwa wu tava xipanze xa wumune xa hini ga vinya.

¹⁴Mu ngagi a zibaba, hambu mavele laya ma wocilweko, kutani mavele laya ma kalako ma nga se buva, kala ku chikela a siku lego mu ta nga heleketa ha gona a munyikelo wa Nungungulu wa nwina; lexi xi tava xileletelo xa kala kupinzuka zizukulwaneni za nwina ka wontihe matiko laya mu ta nga aka ka wona.

¹⁵Kusukela a siku legi gi gamelako sabado, gi nga siku legi mu ta nga heleketa ha gona a nyanza ya ku nziwitela, mu ta hlaya maviki laya ma mbheleleko ku maha ntlhanu ni mambiri.

¹⁶Mu hlayela 50 wa masiku ku chikela ka siku legi gi gamelako sabado ga ntlhanu ni mambiri, zonake mu ta nyikela ka Jehova a munyikelo wa mavele maswa.

¹⁷Mu ta neha zibaba zimbiri za munyikelo wa ku nziwitela, na zi hi lezi zi humako mitini ya nwina, na zi hi za tipimo timbiri ta wukhume ta efa ga mapa yo saseka lezi zi bhikilweko ni comelo; hi yona mihanzu yo ranga ya Jehova.

¹⁸Mu ta nyikela zibaba, zinwe ni ntlhanu wa ziyivana ni zimbiri za lembe ginwe a wukale, lezi zi nga hiko na bawa, ni role, ni tihamba timbiri ta munyikelo wa kuhiswa wa Jehova, zinwe ni minyikelo ya zakuga ni zakunwa; ziva muphahlo lowu wu hiselwako Jehova, lowu wu nga ni masema yo nuhela ka Jehova.

¹⁹Ni kambe mu ta nyikela hi mhongo ya muphahlelo wa kuonha, ni tihamba timbiri ta lembe ginwe a wukale, a kuva za muphahlelo wa kurula.

²⁰A mupristi i ta zi nziwitela zinwe ni zibaba za mihanzu yo ranga a kuva munyikelo wa ku nziwitela mahlweni ka Jehova; zi tava za kubasa za Jehova zinwe ni tihamba timbiri, zonake zi tava za mupristi.

²¹Ka gwalego siku mu ta ramba mutlhangano lowu wu basileko; mu nga tiri hambu ni ntiro munwe wo tika. Lexi xi tava xileletelo xa kala kupinzuka ka zizukulwana za nwina, ka wontihe matlhelo lawo mu ta nga aka ka wona.

²²Ni loku mu tshovela lomu tikweni ga nwina, mu nga tshoveli kala mu chikela mbhinganweni wa simu, kambe u nga kutsuli lezi zi saleteleko. U ta zi siyela zisiwana ni vapfhumba. Hi mina Jehova, Nungungulu wa wena.

²³Jehova i lo wulawula kambe ka Mosi, aku:

²⁴Byela vanana va ka Israeli, uku: Hi hweti ya wuntlhanu ni timbiri, hi siku go ranga ga hweti gi tava siku ga kuhumula, ximuse lexi xi ta nga tivekiswa hi kubiwa ka mimpunzu, hi ntlhangano wa kubasa.

²⁵Mu nga tiri ntiro hambu ni munwe wo tika ha gona, kanilezi mu ta nyikela ka Jehova a muphahlelo wa kuhiswa.

²⁶Jehova i lo engeta a wulawula ka Mosi, aku:

²⁷Hi siku ga 10 ka hweti leyi ya wuntlhanu ni timbiri ku tava a siku ga miphahlelo ya nzhiho; mu tava ni ntlhangano wa kubasa, muva ni hlomulo, mu nyikela ka Jehova a miphahlelo ya kuhiswa.

²⁸Mu nga tiri ntiro hi siku lego, hakuva i siku ga miphahlelo ya nzhiho, legi a nzhiho wa nwina wu nyikelwako ha gona mahlweni ka Jehova, Nungungulu wa nwina.

²⁹Kani hi wihi munhu a nga hiko na hlomulo hi siku lego i ta fuvisiwa ka va ka kabye.

³⁰Ni wihi munhu a tirako hi siku lego, kani hi wihi ntiro, nzi ta mu lovisa lomu tikweni gabye.

³¹Mu nga tiri hambu ni wunwe ntiro. Lowu i nayo wa kala kupinzuka ka zizukulwana za nwina ka matlhelo wontihe lawa mu ta nga aka ka wona.

³²Gi tava siku ga ximuse ka nwina, muva ni hlomulo mihefemulweni ya nwina; mu ta hlayisa a sabado legi ga nwina kusukela gambyeni ga siku ga wuntlhanu ni mune ga hweti, kala gambyeni ga siku gi gamelako.

³³Jehova i lo wulawula kambe ka Mosi, aku:

³⁴Byela a vanana va ka Israeli, uku: Hi siku ga 15 ga hweti ya wuntlhanu ni timbiri, ku tava mutlhangano wa mixaxa, lowu wu mahelwako Jehova lomu ka ntlhanu wa masiku ni mambiri.

³⁵Hi siku go sangula ku tava ni mutlhangano wa kubasa; mu nga tiri ntiro wo tika ha gona.

³⁶Lomu ka ntlhanu wa masiku ni mambiri mu ta nyikela ka Jehova a muphahlelo wa kuhiswa. Hi siku ga wuntlhanu ni manharu mu tava ni mutlhangano wa kubasa, mu nyikela ka Jehova a muphahlelo wa kuhiswa. Mutlhangano wa ximuse, mu nga tiri ntiro wo tika ha gona.

³⁷Leyi hi yona mibuzo ya Jehova, leyi mu ta nga yi tiyisa a kuva mitlhangano ya kubasa; lezaku ku nyikelwa ka Jehova a miphahlelo ya kuhiswa, ni minyikelo ya zakuga, ni muphahlelo, ni minyikelo ya kunwa; a zilo zinwani ni zinwani zi ta humesiwa hi siku ga zona.

³⁸Hehla ka zontlhe lezo mu ta hlayisa masabado ya Jehova, ni ku nyikela ka Jehova a minyikelo yinwani ya nwina, ni miphahlelo yontlhe ya ku tatisa zifungo za nwina, ni minyikelo yontlhe ya kuranza ka nwina.

³⁹Kanilezi hi siku ga 15 ka hweti ya wuntlhanu ni timbiri, laha na mu tshovele mihanzu ya misava, mu ta maha mubuzo wa Jehova wa ntlhanu wa masiku ni mambiri. A siku go sangula gi tava siku go humula, gonawu siku ga wuntlhanu ni manharu gi tava go humula.

⁴⁰Hi siku go ranga mu ta teka a mihanzu ya tisinya to saseka, ni maravi ya micinzu, ni maravi ya tisinya ta lomu khwatini, ni maravi ya mironwa ya micongo, mu ti tsakela mahlweni ka Jehova, Nungungulu wa nwina, lomu ka ntlhanu wa masiku ni mambiri. [35]

⁴¹Lembe ni lembe mu ta mahela Jehova mubuzo lowo lomu ka ntlhanu wa masiku ni mambiri. Lexi xileletelo xa kala kupinzuka ka zizukulwana za nwina. Mu ta maha mubuzo lowo hi hweti ya wuntlhanu ni timbiri.

⁴²Lomu ka ntlhanu wa masiku ni mambiri mu ta tshama lomu ka mixaxa ya mahlavu, vontlhe lava va belekilweko ka va ka Israeli va ta tshama lomu mixaxeni.

⁴³Kasi a vazukulwana va nwina va zi tiva lezaku nzi wa mahile lezaku a vanana va ka Israeli va tshama mixaxeni xikhati lexo nzi nga va humesa le Gipite. Hi mina Jehova, Nungungulu wa nwina.

⁴⁴Zonake Mosi i lo tlhamusela ka vanana va ka Israeli leyi mibuzo ya Jehova.