Read tshwa Levi 27 Bible Online

Levi 27 - tshwa bible

Levi 27

¹Jehova i te ngalo ka Mosi:

²Byela a vanana va ka Israeli, uku ka vona: Loku munhu a ti bohile hi kuhlambanya, lezaku i ta nyikela ka Jehova a mali yi ringanako ni tsengo wa munhu wa kona, u ta hlaya kota lezi;

³loku a hi wanuna wa 20 wa malembe, ni kuya mahlweni ka 60 wa malembe, a kuringanyisa ka wena ku tava 50 wa maxekeli ya siliva, hi lipimo la xekeli ga wutshamu go basa.

⁴Loku a hi wasati, a kuringanyisa ku tava 30 wa maxekeli.

⁵Loku va hi va ntlhanu wa malembe ni kuya mahlweni ka 20 wa malembe, loku a hi tsongwani a kuringanyisa ku tava 20 wa maxekeli; loku a hi nhanyana ku tava 10 wa maxekeli.

⁶Loku a hi hweti yinwe ni kuya mahlweni ka ntlhanu wa malembe, a kuringanyisa ku tava ntlhanu wa maxekeli ya siliva loku a hi mufana; loku a hi nhanyana maxekeli manharu.

⁷Loku a hi loyi a hunzako 60 wa malembe, a kuringanyiswa ku tava 15 wa maxekeli loku a hi wanuna; loku a hi wasati i 10 wa maxekeli.

⁸Kanilezi loku munhu a tsanzeka ku humesa mali hi lipimo la kona i ta yiswa ka mupristi, kasi mupristi i ta ringanyisa a ntamu wa loyi a ti bohileko hi kuhlambanya, hi ku hlaya lezi a zi fuyileko.

⁹Loku ku mahilwe xifungo xa ku nyikela xihari ka tixaka leti ti nga nyikelwako ka Jehova, zontlhe lezi zi nyikelweko ka Jehova zi basile.

¹⁰Ngha va nga zi hunzulusi va nyikela lezi zo saseka matshanwini ya lezi zo biha, hambu ku hunzulusa lezi zo biha matshanwini ya lezi zo saseka; ni loku va humesa zinwani zifuyo matshanwini ya zinwani, zontlhe zi tava zi basile hi wumbiri ga zona.

¹¹Loku ku mahilwe xifungo xo nyikela xifuyo xi nga hlazekangiko, lexi xi nga nyikelwiko ka Jehova, a xifuyo lexo va ta xi yisa ka mupristi;

¹²a mupristi i ta ringanyisa a tsengo wa xona, kutani xi sasekile kutani xi bihile; zonake va ta maha kota lezi wena mupristi u ringanyisako.

¹³Loku a nwinyi a lava ku xi tlhatlhisa, i ta engetela a tsengo wa kona hi xipanze xa wuntlhanu hi kuringanyisa ka wena.

¹⁴Loku munhu a basisela Jehova a yindlu yakwe, a mupristi i ta yi ringanyisa, kutani yi sasekile kutani yi bihile, zonake ku ta mahiwa kota mupristi a ringanyisako a tsengo wa yona.

¹⁵Kanilezi a munhu loyi a yi basiseleko Jehova, loku a lava ku yi tlhatlhisa, i ta engetela hi xipanze xa wuntlhanu ka mali ya yona, zonake yi tava yakwe.

¹⁶Ni loku munhu a lava ku basisela Jehova a nzima ya simu gakwe, ku ta ringanyiswa a tsengo wa gona hi lipimo la timbewu ti byaliwako ka gona, loku gi byaliwa hi homeri ya mavele a tsengo wa gona wu tava 50 wa maxekeli ya siliva.

¹⁷Loku a basisela Jehova a simu gakwe kusukela ka lembe ga jubileu, ku ta mahiwa kuringanisa ka kona kota lezo.

¹⁸Kanilezi loku a basisela Jehova a simu gakwe anzhako ka jubileu, a mupristi i ta ringanyisa a mali hi ku hlaya a malembe lawa ma seleko kuya chikela ka jubileu, zonake a simu gi tava gakwe.

¹⁹Loyi a basiseleko Jehova a simu gakwe, loku a lava ku gi tlhatlhisa, i ta engeta xipanze xa wuntlhanu xa mali leyi yi ringanyisilweko hi mupristi, zonake a simu gi tava gakwe.

²⁰Loku a nga tlharihisi a simu lego, kanilezi a gi xavisa ka munwani munhu, cima gi nga ta ha tlhatlhiswa.

²¹A muxavi wa simu i ta ta huma ka gona hi lembe ga jubileu, zonake gi tava ga kubasa ka Jehova, kota a simu legi gi nyikelweko hi ku hlambanya; gi ta lumba mupristi.

²²Loku munhu a basisela Jehova a simu legi a gi xavileko, na gi nga hi simu ga tshomba yakwe,

²³a mupristi i ta ringanisa a mali ya gona hi ku hlaya malembe kala ku chikela lembe ga jubileu, zonake a munhu loye i ta humesa a mali ya kona gwalego siku, hakuva yi basiselwe Jehova.

²⁴Hi lembe ga jubileu a simu gi ta tlhelela ka muxavisi wa gona, hakuva i simu ga tshomba yakwe.

²⁵A kuringanyisa kontlhe ka wena ku ta mahiwa hi xekeli ga wutshamu ga kubasa; a xekeli gi na ni 20 wa magera.

²⁶Kanilezi ngha munhu a nga basisi matewula ya xifuyo xakwe ku basisela Jehova, hakuva ma sina ma hi yakwe; hambu ma hi matewula ya tihomu kutani matewula ya tiyivu, nia Jehova.

²⁷Loku xi hi xifuyo xi nga hlazekangiko xi ta tlhatlhiswa hi mali leyi u yi ringanisileko, va engetela hi xipanze xa wuntlhanu xa yona; kanilezi loku xi nga tlhatlhiswi, xi ta xavisiwa kota lezi u ta nga ringanyisisa zona.

²⁸Hambu zi hi tano, zontlhe lezi zi yiliselweko Jehova hi kuhlambanya ka munhu za yila; hambu a hi munhu, hambu xi hi xifuyo, hambu gi hi simu ga tshomba, cima zi nga ta xaviswa hambu ni ku tlhatlhiswa; zontlhe lezi zi yilisilweko zi basile nguvu, za Jehova.

²⁹A munhu loyi a yilisilweko a nga ha tlhatlhiswi i ta dawa basi.

³⁰A xipanze xa wukhume xa zontlhe lezi zi tshovelwako, lezi zi pambulweko lomu ka timbewu, ni mihanzu ya tisinya, za Jehova, zi basiselwe Jehova.

³¹Loku munhu a lava ku tlhatlhisa za wukhume zakwe, i ta zi engetela hi xipanze xa wuntlhanu xa zona a tsengo wa zona.

³²Kanilezi a za wukhume za zifuyo lezi za hombe ni lezi za zi tsongwani, zontlhe lezi zi risiwako, a za wukhume ga zona zi ta basiselwa Jehova.

³³Ngha va nga hlawuli lezi zo saseka, kutani lezi za kubiha; ngha va nga humesi xinwe matshanwini ya xinwani. Loku va mahisa lezo, zontlhe zifuyo zi tava zi basileko ni lezi zi humesilweko matshanwini ya zona, zontlhe zi tava zi basileko hi wumbiri ga zona; a zi na ku tlhatlhiswa.

³⁴Leyi hi milayo leyi Jehova a leleteleko Mosi le xitsungeni xa Sinai, kasi yiva milayo ya vanana va ka Israeli.