Read tshwa Levi 3 Bible Online

Levi 3 - tshwa bible

Levi 3

¹Loku a munyikelo wa munhu wu hi muphahlo wa kurula, ni loku a nyikela a homu, hambu yi hi ya matsune kutani kati, i ta yi nyikela na yi nga hi na bawa mahlweni ka Jehova.

²I ta tlhateka a canja gakwe hlokweni ya muphahlelo wakwe, a tlhava xifuyo laha nyangweni ya tabemakeli ga mutlhangano, zonake a vapristi, a vana va Aroni, va ta nwatsekela a nkhata laha alatini, matlhelo wontihe.

³Zonake a ka muphahlo wa kurula i ta teka mafura laya ma pomelako marumbu, ni wontihe mafura laya ma pambelako marumbu, akuva muphahlo wu hiselwako Jehova,

⁴zinwe ni tiswa timbiri ni mafura laya ma nga laha ka tona, ni laya ma nga laha xiwunwini, ni pambani wa zivinzi, va wu susa hehla ka tiswa.

⁵A vana va Aroni va ta zi hisa laha alatini, le hehla ka munyikelo wa kuhiswa, lowu wu nga le hehla ka tihunyi ti nga nzilweni; wu tava muphahlo wa kuhiswa, wu nga ni masema yo nanziha ka Jehova.

⁶Loku a munhu a ranza ku nyikela munyikelo wa kurula ka Jehova hi zifuyo lezi zi tsongwani, a teke xihari xi nga hiko na bawa, xa matsune kutani kati.

⁷Loku a nyikela yivana, a kuva muphahlo wakwe, i ta yi nyikela mahlweni ka Jehova.

⁸I ta tlhateka a canja gakwe hlokweni ya xifuyo, a xi tlhava mahlweni ka tabemakeli ga mutlhangano, zonake a vana va Aroni va ta nwatsekela a nkhata wa kona alatini, wontihe matlhelo.

⁹Zonake i ta pambula xipanze xa xifuyo lexo xa muphahlo wa kurula a maha muphahlo wu hiselwako Jehova hi mafura ni nkila lowu wu tsemilweko hi laha lidingweni la wona, ni mafura laya ma pomelako marumbu, ni mafura wontihe laya ma pambelako marumbu,

¹⁰ni tiswa timbiri, ni mafura laya ma ti pomeleko laya ma nga xiwunwini, ni pambani wa zivinzi, a wu susa laha ka tiswa.

¹¹Ni mupristi i ta zi hisa alatini, ziva zakuga za muphahlo lowu wu hiselwako Jehova.

¹²Loku a munyikelo wakwe wu hi wa mbuti, i ta wu nyikela mahlweni ka Jehova.

¹³I ta tlhateka a canja gakwe hlokweni ya yona, a yi tlhava mahlweni ka tabemakeli ga mutlhangano, zonake a vana va Aroni va nwatsekela a nkhata wa yona alatini, ka wontihe matlhelo.

¹⁴Zonake i ta maha munyikelo ha yona, wuva muphahlo wu hiselwako Jehova; ma nga mafura laya ma pomelako marumbu, ni wontihe mafura laya ma pambelako marumbu,

¹⁵ni tiswa timbiri, ni mafura laya ma ti pambelako lomu xiwunwini, ni pambani wa zivinzi, a wu susa laha ka tiswa.

¹⁶Ni mupristi i ta zi hisa alatini, ziva zakuga za muphahlo wa kuhiswa, ni masema yo nuhela. A mafura wontihe nja Jehova.

¹⁷Ku tava xileletelo xa kala kupinzuka zizukulwaneni za nwina, kontlhe lomu mu ta nga aka kona; mu nga dzuki muga mafura, hambu ni nkhata. [3]